Ṱhanzi dza Yehova vha tevhela nyeletshedzo i bvaho Bivhilini ya u sa fhindula nga zwiṅwe zwifhinga musi vha tshi pomokwa na u goḓwa. Sa tsumbo, Bivhili i ri: “Ane a kaidza mugoḓi u ovha maṱamba.” (Mirero 9:7, 8; 26:4) Nṱhani ha u ḓidzhenisa kha dzitsemano nga nṱhani ha u pomokwa, ri livhisa ṱhogomelo kha u takadza Mudzimu.​—Psalme ya 119:69.

 Ndi ngoho uri “u fhumula hu na tshifhinga tshaho, na u amba hu na tshifhinga tshaho.” (Muhuweleli 3:7) Ri fhindula vhane vha ṱoḓa u ḓivha ngoho zwi tshi bva mbiluni, fhedzi ri iledza u ḓidzhenisa kha u ṱaṱa khani hu sa vhuyedzi tshithu. Nga zwenezwo, ri tevhela zwine ra zwi guda kha Yesu na Vhakriste vha u thoma.

•   Yesu ho ngo fhindula musi a tshi pomokwa phanḓa ha Pilato. (Mateo 27:11-14; 1 Petro 2:21-23) Nga hu fanaho, Yesu ho ngo fhindula musi a tshi pomokwa uri u a ḽesa na u nwesa. Nṱhani hazwo, o tendela nḓila ye a vha a tshi ḓifara ngayo i tshi ḓifhindulela kha vhapomoki vhawe, u tendelana na ngoho ine ya ri: “Vhuṱali vhu vhonala nga mishumo yaho yo lugaho.” (Mateo 11:19) Fhedzi musi zwiimo zwi tshi mu tendela, o vha a sa ofhi u fhindula vhe vha vha vha tshi mu pomoka.​—Mateo 15:1-3; Marko 3:22-30.

   Yesu o funza vhatevheli vhawe uri vha songo kulea nungo musi vha tshi pomokwa. O ri: “Ni takale musi vhathu vha tshi ni sema na u ni tovhola, vha tshi ni pomoka vhuvhi hoṱhe hu u zwifha nga nṱhani ha dzina ḽanga.” (Mateo 5:11, 12) Naho zwo ralo, Yesu o dovha a amba uri musi honoho u pomokwa hu tshi ita uri vhatevheli vhawe vha kone u ṱanziela, u ḓo ita zwe a zwi fulufhedzisa musi a tshi ri: “Ndi ḓo ni ṋea vhuṱali nahone ndi ḓo ni thusa uri ni ḓivhe zwine na ḓo zwi amba, vhahanedzi vhaṋu vhoṱhe vha nga si kone u ni pikisa kana u ni hanedza.”​—Luka 21:12-15.

•   Muapostola Paulo o laya Vhakriste uri vha iledze u ṱaṱa khani dzi sa vhuyedzi tshithu na vhapomoki nahone o ṱalusa dzenedzo khani sa ‘zwithu zwi sa vhuyedzi na zwa mahandana.’​—Tito 3:9; Vharoma 16:17, 18.

•   Muapostola Petro o ṱuṱuwedza Vhakriste uri vha imelele lutendo lwavho musi zwi tshi konadzea. (1 Petro 3:15) Fhedzi o zwi ṱhogomela uri kanzhi zwi nga sumbedzwa nga mishumo nṱhani ha u tou amba. O ṅwala uri: “Nga u ita zwo lugaho, ni fhumudze vhathu vha si na ṱhalukanyo vha sa ḓivhi tshithu.”​—1 Petro 2:12-15.