Hai. Ṱhanzi dza Yehova ndi Vhakriste vhane vha thea zwine vha zwi tenda kha Maṅwalo. Naho vhathu vha vhuṅwe vhurereli vha tshi funza uri u kuvhangana ha Vhayuda ngei Palestina zwi tshimbidzana na vhuporofita ha Maṅwalo, Ṱhanzi dza Yehova a vha tendelani na zwenezwo. A vha tendi uri zwenezwi zwiitea zwa politiki zwo bulwa nga ho livhaho hu tshee nga phanḓa Maṅwaloni. Zwi re zwone ndi uri Maṅwalo ha tikedzi muvhuso naho u ufhio wa politiki kana u hulisa muṅwe murafho kana vhaṅwe vhathu u fhira vhaṅwe. Tshiingamo, tshine tsha vha magazini wa lwa mulayo wa Ṱhanzi dza Yehova, tsho bula nga hu pfalaho uri: “Maṅwalo ha tikedzi Vhuzion ha lwa politiki.”

 Encyclopædia Britannica i ṱalusa Vhuzion sa “dzangano ḽa lushaka ḽa Vhayuda ḽine tshipikwa tshaḽo ha vha u sika na u tikedza shango ḽine ḽa ḓo dzula Vhayuda ngei Palestina.” Ḽi bva kha vhurereli na kha politiki. Ṱhanzi dza Yehova a vha tikedzi pfunzothendwa ya vhurereli ya Vhuzion nahone a vha dzhii sia na luthihi kha politiki ya Vhuzion.

 Ndangulo ya Ṱhanzi dza Yehova ndi ya vhurereli nga ho fhelelaho nahone a i tikedzi dzangano naho ḽi ḽifhio ḽa vhurereli, u katela na Vhuzion. Zwi a ḓivhea vhukuma uri Ṱhanzi dza Yehova a vha dzhii sia na luthihi kha zwa politiki nahone kha maṅwe mashango Ṱhanzi dzo tovholwa lu vhavhaho nga nṱhani ha u hana u dzhia sia kha zwa politiki. Ri a tenda tshoṱhe uri ndi Muvhuso wa Mudzimu wa ṱaḓulu fhedzi, une wa ḓo ḓisa mulalo kha ḽino ḽifhasi; a hu na muvhuso wa vhathu kana dzangano ḽine ḽa ḓo kona u khunyeledza zwenezwi.

 Maitele a mutheo a zwine zwa tendwa nga Ṱhanzi dza Yehova, hu sa londwi hune vha dzula hone, ndi u thetshelesa milayo ya mivhuso i vha vhusaho. A vha vutsheli vhavhusi kana u ṱanganela kha nndwa.