Hai, Ṱhanzi dza Yehova a vha bvisi tshafumi; mushumo washu u tikedzwa nga u ḓifunela nga zwa masheleni nga vhathu vhane vha sa bulwe nga madzina. Tshafumi ndi mini nahone ndi ngani Ṱhanzi dza Yehova vha sa bvisi tshafumi?

 Ndaela ya u bvisa tshafumi kana u ṋeela tshafumi tsha thundu yau, yo vha i tshipiḓa tsha Mulayo we wa ṋewa lushaka lwa kale lwa Isiraele. Naho zwo ralo, Bivhili i zwi bvisela khagala uri wonoyu Mulayo​—u katela na “ndaela ya u kuvhanganya tshafumi”​—a u shumi kha Vhakriste.​—Vhaheberu 7:5, 18; Vhakolosa 2:13, 14.

 Nṱhani ha uri Ṱhanzi dza Yehova vha bvise tshafumi na zwiṱhavhelo, vha edzisa Vhakriste vha kale nahone vha tikedza vhuḓinḓa havho nga nḓila mbili: nga u huwelela na u funza vha sa badelwi na nga u tikedza nga miṋeelo ya u ḓifunela.

 Nga zwenezwo ri tevhela vhulivhisi ha Bivhili ho ṅwalelwaho Vhakriste: “Muṅwe na muṅwe nga a ite zwe a phetha mbiluni yawe, a songo zwi ita o ṱungufhala kana nga u tou kombetshedzea, ngauri Mudzimu u funa ane a ṋea o takala.”—2 Vhakorinta 9:7.