Olombangi Via Yehova omo liocisola va kuetele Suku kuenda omanu vakuavo, va sanjukila oku kundila esapulo Liembimbiliya komanu vosi oku kongelamo vana va popia hati, “Si kuete onjongole.” (Mateo 22:37-39) Ocisola tu kuetele Suku ci tu vetiya oku pokola kocihandeleko Comõlaye, coku “imbila uvangi.” (Ovilinga 10:42; 1 Yoano 5:3) Poku ci linga, tu vangula lomanu vaco olonjanja vialua catiamẽla kesapulo lia Suku ndeci ovaprofeto va Suku va linga. (Yeremiya 25:4) Omo liocisola tu kuetele omanu, tu likolisilako oku kunda esapulo lieca omuenyo, okuti Olondaka viwa Viusoma” komanu vosi, oku kongelamo vana okuti kefetikilo ka va lekisa onjongole.—Mateo 24:14.

 Tu pondola oku sanga omanu va lekisa onjongole eci tu tiukila kolonjo viomanu vana okuti kefetikilo ka va lekisile onjongole. Kũlĩhisa asunga atatu:

•   Omanu va iluka.

•   Omanu vakuavo tu sanga kolonjo va pondola oku lekisa onjongole.

•   Ekalo liomanu li pongoloka. Ovina vi pita voluali ale ovitangi viomuenyo vi koka okuti omanu vamue va kuata onjongole yoku “lilongisa ovina viatiamẽla ku Suku” kuenje va lekisa ombili kesapulo Liembimbiliya. (Mateo 5:3) Ndaño muẽle omanu vana va siata oku tu lambalala, va pondola oku pongolola ovitima viavo, ndeci ca pita lupostolo Paulu.—1 Timoteo 1:13.

 Pole, ka tu kisika omunu umue oku yevelela esapulo lietu. (1 Petulu 3:15) Tu tava okuti omunu eye o nõla onjila a kuama yatiamẽla kefendelo.—Esinumuĩlo 30:19, 20.