Nda citiwila vosanjala yimue kofeka yo Roma, okuti omanu vaco olohukũi kuenda omo nda kulila. Vosanjala yaco, omuenyo ka wa lelukile. Ame sia kũlĩhĩle inange kuenda sia kuatele ukamba uwa la isiange. Nda kula loku lilongisa ovituwa vio kosamua.

Eci nda kuata ekuĩ lianyamo, haico nda fetika oku nyana. Eci nda tẽlisa 12 kanyamo nda tunda konjo. Vapuluvi alua, isiange wa sukilile oku ka njupa konjo yakuenje velombe vokayike. Nda enda oku lihoyisa lomanu—nda kala ongangala kuenda lomue nda sumbile. Eci nda tẽlisa 14 kanyamo nda tunda konjo kuenje sia tiukile vali. Nda fetika oku sipa loku fenya olodroga kuenda oku kala volokololo. Omo okuti sia kuatele ocitumãlo coku pekela, nda enda oku lala vekãlu limue. Noke ndi sandiliya ovava oku lisukula.

Koku nyana va kolombele nda loñolohele calua—kuenje nda fetika oku tuiyila olonjo volupale. Omo okuti nda kala ongangala nda lalekiwa oco ndi likongele kocisoko cimue colongangala ca kũlĩhiwa kuenje ca nyiha “epuluvili” lioku nyana kolombango. Omo okuti nda kala ongangala, ka pa pitile otembo yalua nda fetika oku sumbiwa lavosi vocimunga caco. Kuosi ngenda uta wange ka u siala, owo wa enda oku lala kovitue. Omuenyo wange watiamẽlele lika kungangala, kolodroga, koku nyana, kupopi ka wa sungulukile, kuenda kukahonga. Akuenje velombe va enda oku ndi sandiliya. Nda kuatiwa olonjanja vialua, loku kapiwa vokayike.

Eteke limue noke yoku tunda vokayike, nda ka nyulile sohãi yange. Nda limbuka okuti, sohãi yange kuenda vapalume vange vavali Olombangi Via Yehova. Ovo va ndi laleka oku enda kohongele Yolombangi Via Yehova. Nda tava kelaleko liaco. Eci tua pitĩla Konjango Yusoma, nda nõlapo oku tumãla ocipepi lepito oco ndi mole wosi iñila lu o tunda. Pole, nda kala luta wange.

Ohongele yaco ya pongolola omuenyo wange. Kokuange ca kala ndokuti, ñasi voluali lukuavo. Va ndi tambula lonjolela yalua. Nda patekela ciwa ukamba kuenda ovituwa viwa Olombangi Via Yehova via lekisa. Ekalo liaco lia litepele calua lomuenyo wange!

Nda fetika oku lilongisa Embimbiliya Lolombangi Via Yehova. Osimbu nda kala oku lilongisa, nda limbuka okuti ndi sukila oku pongolola omuenyo wange. Nda kuama elungulo li sangiwa kelivulu Liolosapo 13:20: “U endaenda la vakualondunge o lingavo ukualondunge, u puãi endaenda laveke o yambuiwa.” Nda limbuka okuti nda sukilile oku tepa ukamba ndi kuete locimunga covingumba. Ka ca lelukile oku ci linga pole, lekuatiso lia Yehova nda ci tẽla.

Nda liyelisavo ketimba. Lelikolisilo lialua, nda siapo oku sipa loku fenya olondroga. Nda teta ciwa esinga liange, nda siapo oku wala ovimbilingu loku vangula upopi ka wa sungulukile. Noke nda fetika oku lava ciwa ovituwa viange.

Omo okuti sia solele oku tanga loku lilongisa, kokuange ca kala ocitangi cinene oku tanga Embimbiliya loku lilongisa. Pole, osimbu nda kala oku likolisilako, nda fetika oku sola Yehova kuenje owanji wutima wange wa fetika oku ndi vetela evelo. Olonjanja vimue nda enda oku kuata ovisimĩlo ka via sungulukile, loku tatãla nda Yehova o pondola oku ngecela omo liovina viosi vĩvi nda lingaile. Vapuluvi aco nda sanga elembeleko poku tanga ulandu wa Soma Daviti ndomo Yehova a ecela akandu aye anene.—2 Samuele 11:1–12:13.

Ocitangi cikuavo nda kuata oku enda konjo lanjo oku kunda. (Mateo 28:19, 20) Nda kuatele ohele yoku li sanga la umue nda valuile ale nda lingile cimue cĩvi kosimbu! Pole vokuenda kuotembo ohele yaco ya fetika oku tepuluka. Nda fetika oku sanga esanju lioku kuatisa vakuetu oku lilongisa catiamẽla ku Isietu wo kilu una ukuakuecela.

Nda lilongisa ndomo Yehova a yovola omuenyo wange! Valua pokati kakamba vange va fa ale va kasi vokayike, pole ame ñuete ekalo liwa kuenda elavoko liwa lio kovaso. Nda lilongisa oku kala embombe kuenda oku pokola loku yuvula onyeño. Cilo ndi kuete ukamba uwa lomanu. Nda sanjukavo omo lioku kuela ukãi umue wa fina londuko, Carmen. Kavali ketu, tu kuete esanju lioku kuatisa vakuetu oku lilongisa Embimbiliya.

Cilo ndi nalavãi umue ukuacili, olonjanja vimue vupange wange mu kongela olombango—pole siendelamo oku ka nyãna pole oku ka yelisa!