Nda citiwila ko Ciudad Mante, olupale lumue lua posoka kofeka yo Tamaulipas, ko Mesiku. Volupale luaco, omanu va kuete ocituwa coku eca kuenda vakuahenda. Pole omo liungangala, vimbo liaco mua kala ohele yalua.

Ndi mõla wavali pokati komãla vakuãla. Olonjali viange via papatisiwile Vetavo Liokatolika kuenda noke, nda panga onepa kocisoko coku imbila vonembele. Ame nda yonguile oku sanjuisa Suku momo nda kuatele usumba woku sombisiwa kuenda oku imbiwa vifelu otembo ka yi pui.

Eci nda tẽlisa anyamo atãlo, Isiange wa tu siapo. Eci ca ndi kokela esumuo lialua kuenda evalo liutima. Sia kuatele elomboloko liesunga lieci a tu silapo, momo tuo solele calua. Ina yange wa enda oku talavaya calua oco a tu tekule etu tu mãla vakuãla.

Omo liocitangi caco, nda fetika oku linga ukamba lomanu vana okuti va kala akulu vange kosikola. Ovo va ndi longisa oku kemba, oku sipa, oku nyana kuenda oku yaka longunsu yange muẽle. Omo okuti nda solaile calua oku tumĩla vakuetu, nda lilongisa olonjila vialua vioku yaka kuenda oku talavaya lovota. Nda linga umalẽhe umue ongangala. Olonjanja vialua nda panga onepa koku liloya kuenda nda enda oku lemehiwa calua loku ndi sia vetapalo ndu okuti nda fa ale. Nda kokela esumuo lialua ku ina yange eci a ndi sanga loku ndi tuala kosipitali!

Eci nda kuata 16 kanyamo, Jorge ekamba liange liovomõla wa tu nyula konjo. Eye wa tu sapuila okuti Ombangi ya Yehova kuenda o yongola oku tu ĩha esapulo limue li kuete esilivilo. Kuenje wa fetika oku lombolola ovina a tava lekuatiso Liembimbiliya. Lalimue eteke nda tangele ulandu waco kuenje nda vetiyiwa oku lilongisa catiamẽla konduko ya Suku kuenda ocipango caye. Jorge wa tu sapuila okuti o yongola oku tu longisa Embimbiliya. Kuenje tua tava.

Nda komõha calua eci nda lilongisa ocili catiamẽla kondalu yifelu, elongiso limue okuti ka li sangiwa Vembimbiliya. (Osamo 146:4; Ukundi 9:5) Nda lilongisa okuti, si sukila oku kuatela Suku usumba umue ka wa sungulukile. Omo liaco, nda fetika oku u tenda  nda Isia umue ukuacisola okuti o yongola okuti omãla vaye va kuata ekalo liwa.

Osimbu nda amamako oku lilongisa Embimbiliya, nda limbuka okuti ndi sukila oku linga apongoloko kovituwa viange. Nda sukilile oku lekisa umbombe kuenda oku siapo ungangala. Elungulo li sangiwa vukanda wa 1 Va Korindo 15:33 lia ñuatisa. Olio li popia hati: “Akamba vãvi va nyõla ovituwa viwa.’’ Nda limbuka okuti nda ndi yongola oku linga apongoloko kovituwa viange, nda sukilile oku liwekapo oku linga ukamba lomanu va kuete ovituwa vĩvi. Omo liaco, nda fetika oku linga ukamba la vamanji vekongelo okuti ka va tetulula ovitangi viavo poku liyaka ale lungangala, pole va ci linga poku kapako olonumbi Viembimbiliya.

Ovinimbu vikuavo Viembimbiliya via ndi vetiya calua, vi sangiwa vukanda wa Va Roma 12:17-19. Ovio viti: “Ko ka fetuluinyi umue cĩvi leci cĩvi . . . Nda citava, kali vakuambembua lomanu vosi. Akuetu wa soliwi, ko ka fetuluinyi, . . . momo ca sonehiwa citi: “‘Efetuluinyo liange; ame fetuluinya,” oco Yehova a popia.”’ Nda tava okuti Yehova eye o ka malako ekambo liesunga votembo a sokiya. Vokuenda kuotembo nda liwekapo oku kala ongangala.

Lalimue eteke njivalako ocina ca pita lame eteke limue luteke eci nda kala oku tiukila konjo. Ocisoko cimue camalẽhe ci panga onepa kocimunga cikuavo colongangala, ca ndi tipula kuenda usongui wocimunga caco wa mbeta vonyima loku kaluka hati: “Liteyuila!” Vepuluvi liaco nda likutilila ku Yehova loku pinga oco a ndi kuatise kocitangi caco. Ndaño okuti nda kuatele ongusu yoku fetuluinya pole sia ci lingile. Veteke lia kuamamo nda ñualehela lusongui wocimunga caco okuti wa kala lika liaye. Nda kuata onyeño yalua kuenda nda kuata onjongole yoku fetuluinya, pole nda pinga vali ku Yehova oco a ndi kuatise oku likandangiya. Nda komõha eci umalẽhe waco amẽla kokuange loku popia hati: “Ngecele omo liovina via pita hẽla luteke. Njongola oku kuama ongangu yove. Njongolavo oku lilongisa Embimbiliya.” Nda limbuka okuti ca kuata esilivilo oku likandangiya konyeño! Omo liaco, tua fetika oku lilongisila kumosi Embimbiliya.

Kotembo yaco epata liange lia liwekapo oku lilongisa Embimbiliya. Pole, nda nõlelepo oku amamako oku lilongisa kuenda sia ecelele okuti cimue ci ndi tateka oku ci linga. Nda kũlĩhĩle okuti oku kuata ukamba lafendeli va Suku ci ñuatisa oku yuvula ovisimĩlo ka via sungulukile kuenda oku kala lepata nda sukilile. Nda amamako oku lilongisa Embimbiliya kuenje kunyamo wo 1991 nda papatisiwa.

Omo liesumuo nda kuatele nda enda oku tumĩla vakuetu kuenda nda kala ongangala. Pole, Ondaka ya Suku ya pongolola omuenyo wange. Cilo, nda siata oku sapela ovina viatiamẽla Kembimbiliya lomunu wosi o yongola oku yevelela. Ñuete esumũluho lioku talavaya kupange wakundi votembo yosi vokuenda kueci soka 23 kanyamo.

Nda talavaya ko filiale Yolobamgi Via Yehova kofeka yo Mesiku. Ko filiale yaco oko nda kũlĩhĩla manji umue ufeko o tukuiya hati Claudia kuenje kunyamo wo 1999 oco tua kuela. Ngeca olopandu ku Yehova omo a ndi sumulũisa lukãi waco ukuekolelo!

Tua kala vekongelo lielimi lioku ilaika lio ko Mesiku oku kuatisa ovisitatũi oku lilongisa eci catiamẽla ku Yehova. Noke, tua tumiwa kolupale luo Belize oco tu longise Embimbiliya komanu va kasimo. Ndaño okuti ka tu kuete ovina vialua kulo pole tu kuete ovina viosi tu sukila vi tu nenela esanju. Ka tu pondola oku ci sokisa lovina vikuavo.

Noke liontembo yimue, ina yange wa fetika vali oku lilongisa Embimbiliya kuenda wa papatisiwa. Huvange, ukãi waye kuenda omãla vaye, cilo va lingavo Olombangi Via Yehova. Vamue pokati kakamba vange nda kundila esapulo Liusoma cilo va kasivo oku vumba Yehova.

Omanu vamue vepata lietu va fa omo okuti ka va liwekelepo oku kala olongangala. Nda sia liwekelepo oku kuama onjila yaco, citava okuti nda nda fila kumue lavo. Ngeca olopandu ku Yehova omo a ñuatisa oku kuata ukamba laye kuenda ukamba lafendeli vaye okuti lepandi kuenda ohenda va ndi longisa oku kapako olonumbi Viembimbiliya komuenyo wange.