Tu Lilongisa Eci Catiamẽla ku Suku Kovaprofeto Vaye
Kosimbu Suku wa eca kovaprofeto esapulo limue likuete esilivilo, oco va li sapuile komanu. Anga hẽ esapulo liaco li tu lekisa ndomo tu tambula asumũlũho a Suku? Oco. Tu kũlĩhĩsa eci tu pondola oku lilongisila kovaprofeto vatatu vakuekolelo.
AVIRAHAMA
Suku hokuacameko kuenda o yongola oku sumũlũisa omanu vosi.
Suku wa likuminya kuprofeto Avirahama hati, “apata osi oluali a sumũlũhila kokuove.”—Efetikilo 12:3.
Eci ci tu longisa nye? Suku o tu sole calua kuenda o yongola oku sumũlũisa apata osi alume lakãi kuenda omãla va pokola kokuaye.
MOSE
Suku ukuahenda kuenda o sumũlũisa vana va likolisilako oku u kũlĩha.
Ukuonene wosi wa eca kuprofeto Mose unene woku linga ovikomo. Mose wa likutilila hati: “Ndongise ovituwa viove okuti hu kulĩha si kala ciwa love.” (Etundilo 33:13) Suku wa sanjukila epingilo lia Mose kuenje wo sumũlũisa lukũlĩhĩso kuenda olondunge wolonjila viaye lovituwa viaye. Mose wa lilongisa okuti Ululiki, “Suku yohenda, ukuacali.” —Etundilo 34:6, 7.
Eci ci tu longisa nye? Suku o yongola okuti vosi yetu tu sumũlũisiwa nda tua likolisilako oku u kũlĩha ciwa. Vovisonehua vi Kola, eye o tu lekisa ndomo tu u fendela kuenda o yongola oku tu lekisa ohenda yaye loku tu sumũlũisa.
YESUS
Yesu wa lekisa ohenda poku sakula ovovei osi
Tu pondola oku tambula asumũlũho ka a pui a Suku, nda tu lilongisa catiamẽla ku Yesu, kovina eye a linga, levi a longisa.
Vondaka ya Suku mu sangiwa ovolandu alua atiamẽla komuenyo wa Yesu kuenda kalongiso aye. Suku wa eca ku Yesu unene woku linga ovikomo ndeci, oku patulula ovaso olomeke, oku sakula ovisitatũi kuenda ovilema. Toke muẽle wa pindula vana va fa. Yesu wa lekisa asumũlũho Suku a ka nena komanu vosi kovaso yoloneke. Eye wa lombolola ndomo omunu lomunu pokati ketu a pondola oku kuatisiwa lasumũlũho aco hati: “Omuenyo ko pui u lomboloka okuti ovo va ku kũlĩha okuti ove lika wu Suku yocili kuenda una ove wa tuma, Yesu Kristu.”—Yoano 17:3.
Yesu wa kala ukuacikembe, wombokele kuenda wa kala ukuahenda. Alume lakãi, omãla, lakulu va liongoluila kokuaye poku tava kelaleko liaye liokuti: “Lilongisili kokuange, momo ame ndomboka haime ndonjuka vutima kuenje vu sanga ekavuluko kovimuenyo viene.” (Mateo 11:29) Yesu wa litepele lomanu vakuavo kotembo yaye momo va enda oku tata lãvi akãi, pole, eye wa enda oku tata akãi lohenda, oku va kapako kuenda lesumbilo.
Eci ci tu longisa nye? Yesu wa lekisa ocisola cocili komanu kuenda wa sia ongangu yiwa ndomo tu tata vakuetu.
YESU HASUKUKO
Ovisonehua vi Kola vi tu longisa okuti, “kokuetu kuli Suku umosi lika” kuenda Yesu Kristu wa kala onumiwa ya Suku. (1 Va Korindo 8:6) Yesu wa lekisa okuti Suku wo velapo kuenda eye wo tuma palo posi. —Yoano 11:41, 42; 14:28. *
^ tini. 17 Oco o kũlĩhe ovina vikuavo viatiamẽla ku Yesu, tanga ocipama 8 kuenda 9 combrochura, Verdadeira Fé—O Segredo de Uma Vida Feliz vonumbi yetu yo internet www.pr418.com.
Ove o ka ci Sola
APULILO ATAMBULUIWA LEMBIMBILIYA
Anga hẽ Yesu eye Suku Tõlo?
Nye Yesu a popia catiamẽla kocikele caye oku ci sokisa leci ca Suku?
