“Nda vu pinga cimue ku Isia, eye u cĩhi vonduko yange.”—Yoano 16:23.

Olondaka via Yesu vi situlula okuti Yehova o yongola okuti tu likutilila kokuaye, pole, ka tu ci lingi pocakati coviñumañuma, ale colosandu, cangelo ale comanu va fa, tu ci linga vonduko ya Yesu Kristu. Eci tu likutilila vonduko ya Yesu, tu lekisa okuti tu kuete elomboloko liokuti Suku o yevelela olohutililo vietu, omo lieci Yesu a tu lingila. Yesu hati: “Lomue iya ku Isia, te lame.”—Yoano 14:6.

“Peseleli ovitima viene kokuaye.”—Osamo 62:8.

Eci tu likutilila ku Yehova, tu sukila oku vangula ndu okuti, tu kasi oku vangula la isia umue ukuacisola. Tu sukila oku vangula laye lesumbilo kuenda lutima wosi okuti, ka tu tangi velivulu limue ale oku pitolola cimue tua patekela.

“Nda tu pinga ovina viosi vi likuata locipango caye, eye o tu yeva.”—1 Yoano 5:14.

Vembimbiliya, Yehova o tu sapuila eci eye a ka tu lingila kuenda eci eye a yongola okuti, oco tu linga. Oco olohutililo vietu vi taviwe la Suku, tu sukila oku likutilila ndomo ci “likuata locipango caye.” Oco tu ci linge tu sukila oku lilongisa Embimbiliya, oco tu kũlĩhe ciwa Suku. Nda tua ci linga, olohutililo vietu vi ka sanjuisa Suku.

Likutilila Asukila Ove. Tu pondola oku likutilila ku Suku poku pinga ovina tu sukila eteke leteke ndeci okulia, uwalo kuenda onjo. Tu likutililavo oku pinga olondunge oco tu nõle onjila ya sunguluka kuenda oku pinga ongusu oco tu pandikise kovitangi. Tu pondolavo oku pinga ekolelo, ongecelo kuenda ekuatiso lia Suku.—Luka 11:3, 4, 13; Tiago 1:5, 17.

Likutilililako Vakuene. Olonjali vina vi sole omãla vavo, vi sanjuka eci omãla vavo va lisole pokati. Yehova o yongolavo okuti omãla vaye palo posi va lisola omunu lukuavo. Ca sunguluka oku likutililako ohueli yetu, omãla vetu, epata lietu kuenda akamba vetu. Ndonge Tiago wa soneha hati: ‘likutililili pokati.’—Tiago 5:16.

Eca Olopandu. Catiamẽla Kululiki wetu, Embimbiliya li popia hati: “Wa linga ovina viwa poku wĩhi ombela ya tunda kilu, apako vovovo alio, loku yukisa ovitima viene lokulia kuenda esanju.” (Ovilinga 14:17) Eci tu sokolola kovina viosi Suku a tu lingila, tu vetiyiwa oku eca olopandu vietu kokuaye pocakati cohutililo. Tu pondolavo oku eca olopandu ku Suku poku pokola kokuaye.—Va Kolosai 3:15.

Olonjanja vimue tu sumua omo ohutililo tua linga lutima wosi ka yi kasi oku tambuluiwa lonjanga. Anga hẽ eci ci lekisa okuti Suku ka tu kapeleko? Sio, hacoko! Kũlĩhĩsa ovolandu a kuãimo a lekisa okuti, eci tu sukila oku linga, oku amamako oku likutilila.

Steve wa tukuiwa ale vocipama catete, wa popia hati: “Nda ka ca kaile olohutililo, nda si kasi vali komuenyo.” Nye co vetiya oku pongoloka? Eye wa fetika oku lilongisa Embimbiliya kuenda wa lilongisa esilivilo lioku likutilila loku amamako oku ci linga. Steve wa popia hati: “Nda likutilila ku Suku oku u pandula omo liekuatioso liosi nda tambula kakamba vange. Cilo ñuete vali esanju okuti kosimbu ci sule.”

Nye ci popiwa catiamẽla ku Jenny una wa simĩle okuti ka sesamẽla oku yeviwa la Suku? Eye hati: “Eci nda liyeva okuti si silivila, nda likutilila ku Suku oco a ñuatise oku limbuka esunga lieci si silivilila.” Eci co kuatisa ndati? Eye hati: “Oku eca olopandu ku Suku ca ñuatisa oku litenda ame muẽle ndomo eye a ndi tenda kuenda oku limbuka okuti ndaño utima wange u ndi pisa, Suku ka ndi pisa. Ca ñuatisavo oku amamako oku likolisilako.” Lonima yipi? Jenny hati: “Ohutililo ya ñuatisa oku tenda Yehova ndomunu ukuacisola, Suku ukuakutata, Isia kuenda ekamba o ka ndi kuatisa olonjanja viosi osimbu ndi amamako oku likolisilako oku linga eci eye a yongola.”

Kũlĩhĩsavo ulandu wa Isabel. Eci eye a mina, ndotolo yaye wo sapuila hati omõlaye o ka citiwa ocilema. Eye wa yeva esumuo lialua. Toke muẽle vamue vo vetiya oku pulumula. Eye hati: “Nda kuata lika onjongole yoku fa, omo liesumuo nda kuata vutima.” Nye eye a linga? Eye wa popia hati: “Nda likutilila ku Suku olonjanja vialua oku pinga ekuatiso.” Vokuenda kuotembo, wa cita omõlaye Gerard, eye wa kala muẽle ocilema. Anga Isabel wa liyeva okuti, Suku wa tambulula olohutililo viaye? Oco! Lonjila yipi? Isabel hati: “Eci ndi mola omõlange okuti cilo o kuete 14 kanyamo kuenda o kuete esanju komuenyo ndaño lulema waye, ndi limbuka okuti eye etambululo lia velapo liolohutililo viange, haeye esumũlũho Yehova Suku a nyĩha.”

Olondaka viaco viutima wosi vi tu vetiya oku sokolola kolondaka Viukualosamo viokuti: “A Yehova, o yeva yeva uteto wava va kangisua. O kolisa ovitima viavo. O va vonguila etũi liove.” (Osamo 10:17) Tu kuete asunga awa oku amamako oku likutilila ku Suku!

Vembimbiliya tu sangamo olohutililo vialua via Yesu. Ya kũlĩhĩwa vali yina a longisa kolondonge viaye. Nye tu pondola oku lilongisilako?