Ukundi 4:1-16
4 Nda kũlĩhĩsa vali ovilinga viosi viohali vi lingiwa vemẽhi liekumbi. Nda mola asuẽlẽla a vana va talisiwa ohali kuenda ka kua kaile umue oco a va lembeleke.+ Kuenje vana va va talisa ohali va kuata unene kuenda ka kua kaile laumue oco a va lembeleke.
2 Kuenje nda pandiya vana va fa ale okuti, vana va kasi lomuenyo havoko.+
3 Handi vali, una ka citiwile wa va velapo vosi,+ una okuti ka muile ovina vĩvi vi lingiwa vemẽhi liekumbi.+
4 Kuenje nda mola alikolisilo alua* kuenda uloño wupange u tunda kukuse pokati komanu;+ eci lacovo esanda, oku lupukila konyima yofela.
5 Eveke li kutika ovaka aye kuenda li li nenela olio muẽle enyõleho.*+
6 Epupu limosi liepuyuko lia velapo okuti, apupu avali wupange walua a sule kuenda oku lupukila konyima yofela.+
7 Nda tiamisila vali utima wange kesanda likuavo ka li kuete esilivilo vemẽhi liekumbi:
8 Kuli omunu umue o kasi ulika, ka kuete ekamba; eye ka kuete omõla ndaño manjaye, pole, kupange waye walua ka kuli esulilo. Ovaso aye lalimue eteke a sanjukilile ovokuasi.+ Pole, anga hẽ o lipula eye muẽle hati: ‘Helie ñasi oku talavayela calua kuenda o ndi tateka kovina viwa?’+ Eci lacovo uveke kuenda upange umue ka u kuete esilivilo.+
9 Vavali va velapo okuti umosi o sule,+ momo ovo va kuete onima yiwa* yupange wavo walua.
10 Momo nda umue pokati kavo o kupuka, ukuavo o pondola oku u kuatisa oku katuka. Pole, nye ci pita la una o kupuka okuti, lomue u kuatisa oku katuka?
11 Handi vali, nda vavali va pekela pamosi, va kuata owuya, pole, u o kasi lika liaye, o kuata ndati owuya?
12 Omunu umue o tẽla oku yula u o kasi lika liaye, pole, vana va kasi vavali va pondola oku tamalãla laye. Kuenje ukolo wa kutiwa lutatu lua tĩla* oku lu tepa.
13 Omõla ohukũi okuti ukualondunge, wa velapo osoma ya kuka,+ pole, yeveke, yina okuti ka yi tava kalungulo.+
14 Momo eye* wa tunda vokayike oco a linge osoma,+ ndaño okuti vuviali ukuavo eye wa citiwa okuti ohukũi.+
15 Nda kapako vosi vana va kasi lomuenyo va endela vemẽhi liekumbi, oku kongelamo eci ci pita lumalẽhe o piñala okuti, una o katukila pomangu yukuavo.
16 Ndaño ka kuli esulilo ku vosi vana vo kuatisa, vana va keya noke ka va ka sanjuka laye.+ Eci lacovo esanda, oku lupukila konyima yofela.
Atosi Pombuelo
^ Ale “upange walua.”
^ Lit., “kuenda o kasi oku lia ositu yaye muẽle.”
^ Ale “onima yinene.”
^ Ale “ka ca lelukile.”
^ Pamue yi tiamisiwila komõla o kuete olondunge.
