Olondaka viwa vi tunda ku Yehova Suku yesanju una o yongola okuti apata osi a kuata esanju. (1 Timoteo 1:11) Yehova eye usovoli wolohuela. Oku tokekisa olohuela ci kuete esilivilo momo ci ecelela oku kuata ocitumãlo cimue ca koka coku tekuila omãla. Akristão va sukila oku sumbila ovihandeleko viofeka viatiamẽla koku sonehisa olohuela.—Tanga Luka 2:1, 4, 5.

 Suku o tenda ndati olohuela? Eye o yongola okuti olohuela viulume lukãi vi kala otembo yosi. Akristão va sukila oku sumbila ovihandeleko viofeka viatiamẽla koku sonehisa olohuela. (Luka 2:1, 4, 5) Yehova o yongola okuti alume kuenda akãi vavo va likolela pokati. (Va Heveru 13:4) Eye o suvuka oku linyãla. (Malakiya 2:16) Pole, ecelela okuti Akristão va linyala loku kuela onjanja yavali nda umue pokati kavo wa linga ukahonga.—Tanga Mateo 19:3-6, 9.

 Yehova wa lulika ulume lukãi oco va likuatise pokati. (Efetikilo 2:18) Ulume omo okuti eye utue wepata, o sukila oku tekula vakuanjo yaye kuenda oku va longisa ovina viatiamẽla ku Suku. Eye o sukila oku likolisilako oku lekisa ocisola kukãi waye. Ulume lukãi va sukila oku lisola kuenda oku lisumbila pokati. Omo okuti, alume kuenda akãi vosi yavo ka va lipuile, va sukila oku lilongisa oku li ecela pokati oco va kuate esanju volohuela.—Tanga Va Efeso 4:31, 32; 5:22-25, 33; 1 Petulu 3:7.

 Nda ove kumue lohueli yove vu kuete ovitangi volohuela viene, vu sukila oku likolisiliko oku likuatela ocisola pokati.  (1 Va Korindo 13:4, 5) Ondaka ya Suku ka yi longisa okuti oku tepa olohuela, oyo onjila yoku potolola ovitangi.—Tanga 1 Va Korindo 7:10-13.

 Yehova o yongola okuti vu kuata esanju. Eye eca kokuene alungulo a ku kuatisi oku kuata esanju komuenyo. Handi vali, o yongolavo okuti vu kuatisiwa lolondunge violonjali viene kuenda ulandu womuenyo wavo. (Va Kolosai 3:20) Yehova o yongola okuti vu kuata esanju li tunda koku linga ovina vi sanjuisa Ululiki wene kuenda Omõlaye.—Tanga Ukundi 11:9–12:1; Mateo 19:13-15; 21:15-16.

 Vu sukila oku likolisilako oku sanda okulia, onjo, kuenda uwalo wavo. (1 Timoteo 5:8) Pole, oco omãla vove va kuate esanju liocili, o sukila oku va longisa oku sola Suku kuenda oku va longisa ovina viatiamẽla kokuaye. (Va Efeso 6:4) Ongangu yene yoku lekisa ocisola ku Suku, yi pondola oku vetiya omãla vene oku ci linga lutima wosi. Nda wa eci kokuavo elongiso li tunda Vondaka ya Suku, va ka kuata ovisimĩlo via sunguluka.—Tanga Esinumuĩlo 6:4-7; Olosapo 22:6.

 Omãla va pondolavo oku kuatisiwa calua nda wa va kolisi loku va pandiya. Ovo va sukilavo elungulo kuenda epindiso. Epindiso liaco, li va teyuila kovituwa vĩvi vi pondola oku nyõla esanju liavo. (Olosapo 22:15) Pole, epindiso ka citava okuti li eciwa lungangala ale lonyeño.—Tanga Va Kolosai 3:21.

Olombangi Via Yehova via siata oku sandeka alivulu alua a sonehiwa locimãho coku kuatisa olonjali kuenda omãla. Olonumbi vi sangiwa valivulu aco via tunda Vembimbiliya.—Tanga Osamo 19:7, 11.