Catiamẽla kovolandu omuenyo wa Yesu, upostolo Yoano wa soneha ndoco: “U wa ci mola eye wa cimbila uvangi, okuti lenevo vu kolela. Uvangi waco waye wocili, eye muẽle wa kũliha okuti eci a kasi loku popia cocili.”—Yoano 19:35.

 Esunga lieci tu kolelela kovolandu a sangiwa kelivulu lia Mateo, Marko, Luka kuenda lia Yoano, lieli okuti, otembo va soneha ovolandu aco omanu valua va mola ovina Yesu a linga, handi va kala komuenyo. Ovolandu amue a lekisa okuti, Evanjeliu lia Mateo lia sonehiwa kunyamo wa 41 K.K., noke yanyamo ecelãla tunde eci Kristu a fa. Olonoño vialua vi sima okuti alivulu aco eya oku sonehiwa noke, pole omanu valua va tava okuti alivulu osi Ovisonehua vio Helasi, a sonehiwa kocita catete K.K.

 Omanu vana va kala kumue la Yesu otembo a kala palo posi, okuti va mola ndomo a pondiwa, kuenda va imbila uvangi wepinduko liaye, va tava kovolandu a sangiwa Vavanjeliu. Nda Vovisonehua viaco mua sangiwile ovohembi amue, nda ka va tavele kovohembi aco. Ulongisi umue o tukuiwa hati, Frederick F. Bruce, wa popia hati: “Etosi lia velapo kondaka ovapostolo va kunda lieli okuti, va lombolola ovina via kũlĩhĩwile lolonjeveleli viavo. Ovo ka va popele lika komanu okuti, ‘Tulombangi viovina viaco,’ pole va va sapuila vati: ‘Ndeci wa ci kũlĩhi ene muẽle.’” (Ovilinga 2:22).