Helie ale Nye ci Lomboloka Ondaka ya Suku?

SIKA

Etambululo Liembimbiliya

Upopi wokuti “Ondaka ya Suku” olonjanja vialua yi tiamisiwila kesapulo lia Suku ale kesapulo liosi li sangiwa Vembimbiliya. (Luka 11:28) Povinimbu vimue, upopi wokuti “Ondaka ya Suku” ale “Ndaka”, yi tiamisiwila konduko yesumbilo.—Esituluilo 19:13; Yoano 1:14.

Esapulo limue lia Suku. Ovaprofeto olonjanja vialua via lekisa okuti esapulo va soneha lia kala Ondaka ya Suku. Yeremiya wa fetika esapulo liaye londaka yokuti, “ondaka ya Yehova yeya kokuange.” (Yeremiya 1:4, 11, 13; 2:1) Uprofeto Samuele osimbu ka sapelele la Saulu okuti Suku wo nõla oco a linge o Soma, eye wa popia hati: “Eci a pita ove talama, oco hu sapuile ondaka ya Suku.”—1 Samuele 9:27.

Onduko Yesumbilo. “Ndaka” yi mõlehavo Vembimbiliya ndonduko yesumbilo yi tiamisiwila ku Yesu Kristu, kilu kuenda eci a kala palo posi. Kũlĩhisa ovina vimue vi lekisa esunga liaco:

Ndaka, wa kala ale komuenyo osimbu ovina viosi vikuavo ka via lulikiwile. “Kefetikilo wa kala Ndaka . . . Eye kefetikilo wa kala la Suku. (Yoano 1:1, 2) Yesu, eye ‘uveli woviluvo viosi . . . Pokati kovina viosi, eye wa lulikiwa tete.’—Va Kolosai 1:13-15, 17.
Ndaka weya palo posi ndomunu. “Ndaka wa linga omunu, wa tunga pokati ketu.” (Yoano 1:14) Kristu Yesu, “wa sia cosi a kuatele, wa kala ndupika kuenda wa linga omunu.”—Va Filipoi 2:5-7.
Ndaka, omõla wa Suku. Noke yoku popia okuti “Ndaka wa linga omunu” ndomo ca lomboluiwa, upostolo Yoano wamisako hati: “Tua mola ulamba waye, okuti ulamba umue womõla wongunga wa isia.” (Yoano 1:14) Yoano wa sonehavo hati: “Yesu eye Omõla a Suku.”—1 Yoano 4:15.
Ndaka, o kuete ovituwa ndevi via Suku. “Ndaka wa kala nda suku” ale ‘wa kala suku.’ (Yoano 1:1) Yesu “eye esetahãlo liulamba wa Suku, haeye ocindekaise ca suapo cekalo Liaye.”—Va Heveru 1:2, 3.
Ndaka, wa viala ndosoma. Embimbiliya li popia okuti kutue wa Ndaka ya Suku, kuli “akolowa alua.” (Esituluilo 19:12, 13) Ndaka o tukuiwavo okuti, “Soma yolosoma kuenda Ñala yoloñala.” (Esituluilo 19:16) Yesu o tukuiwa okuti “Eye Soma yolosoma haeye Ñala yoloñala yava va viala.”—1 Timoteo 6:14, 15.
Ndaka, eye kapitiya ka Suku. Onduko yesumbilo yokuti “Ndaka” yi situlula kapitiya Suku a tuma oco a pitiye esapulo kuenda olonumbi viaye. Yesu wa situlula okuti eye wa kala kapitiya ka Suku, poku popia hati: “Isia una wa numa, wa ñundika eci mopia leci mbangula. ... Kuenje ovina mopia, ndi vi vangula ndeci Isia a popia lame.”—Yoano 12:49, 50.