31 Yenyenye yunyamo 2020, * Ombonge Yolupale Luo Berezovsky Vimbo Lio Kemerovo

Anyamo avali vokayike

Khasan Kogut

• Unyamo Woku Citiwa: 1983 (Volupale luo Shahrisabz, vimbo lio Uzbekistan)

• Ulandu Womuenyo: Wa fetika oku lilongisa Embimbiliya vokuenda kunyamo wo 1990. Kunyamo wo 2004, wa ilukila ko Rusia kuenda wa tambula unungafeka wo Rusia. Kunyamo wo 2010, wa kuela la Yekaterina. Kunyamo wo 2012, omõlaye Timofey, wa citiwa.

Kosãi Yevambi Linene wo 2018, akuenje velombe va nyañumõla volonjo ecelãla Violombangi Via Yehova kuenda va ambata olotelefone, olotablet, olokomputador kuenda vikuavo. Noke liolosãi vimue, manji Kogut lukãi waye va vilikiyiwa kombonge oco veye vope ocimalẽho cimue ca ambatiwile. Eci va pitĩlako keteke 6 ya Kayovo yunyamo wo 2019, manji Kogut wa kapiwa vokayike. Wa lundiliwa okuti, wa panga onepa kovopange ocisoko cimue “colongangala” omo okuti, manji Kogut wa enda oku panga onepa kolohongele vietavo.

Noke lioku kala vokayike oloneke vivali, manji Kogut wa tumiwa oku kala konjo ndomandekua. Eye wa kala konjo ndomandekua ci pitahãla 200 koloneke osimbu ka tambuile elianjo kosãi Yenyenye yunyamo wo 2019. Esombiso liovicapa viaye kombonge via fetika noke liolosemana vimue.

Osimbu epata Kogut li talamẽla otembo ombonge yi tukula onjila yi nõliwapo, ovo va kasi oku amamako oku yeka ku Yehova ovilemo viavo viosi, lekolelo liokuti, Yehova o va tata. —1 Petulu 5:7.