Һәзрити Әйса: «Хәлиқ хәлиқкә қарши, падишалиқ падишалиққа қарши қопиду. Шиддәтлик йәр тәврәшләр йүз бериду, бир җайдин кейин йәнә бир җайда жуқумлуқ кесәлликләр тарқилиду вә ачарчилиқлар болиду»,— дегән (Луқа 21:10, 11, ЙД). Бармақ излириға асасән, бир кишини тонушқа болиду. Худди шуниңға охшаш, бир қатар иш-вақиәләр бирла вақитта йүз бәргәндә, Худаниң Падишалиғи йеқинлап қалғанлиғини көрүп йетәләймиз. Ундақта, шу бир қатар иш-вақиәләр дунияниң һәрқайси җайлирида бирла вақитта йүз бериватамду? Дәлил-испатларни көрүп бақайли.

1. УРУШЛАР

1914-жили Биринчи дуния уруши партлиди. Инсанийәт тарихида бундақ кәң көләмдә инсанларға тәсир қилидиған уруш болуп бақмиған еди. Шуңа тарихшунаслар дайим 1914 жилни дуния тарихиниң бурулуш нуқтиси дәйду. Инсанлар бу урушта танклар, һавадин ташлайдиған бомбилар, автоматлар, зәһәрлик газ вә башқа җәң қураллирини кәң көләмдә ишләткән. Кейинирәк, Иккинчи дуния урушида биринчи қетим атом бомбиси ишлитилгән. Әпсуски, 1914-жилдин та һазирғичә йүз бериватқан дунияниң җай-җайлиридики урушлар сәвәвидин миллионлиған инсанларниң қени төкүлгән.

2. ЙӘР ТӘВРӘШЛӘР

Бир мәнбиниң көрситилишичә, һәр жили вәйран қилиш күчигә егә тәхминән 100 күчлүк йәр тәврәш йүз бериватиду. Америка геология тәтқиқат мәркизиниң билдүрүшичә, 1900-жилдин буянқи елип барған тәтқиқатларға асасланғанда, һәр жили тәхминән 16 чоң йәр тәврәш йүз бериду. Бәзиләрниң қаришичә, йәр тәврәшләр анчә көп әмәс, амма һазир өлчәш техникилири яхшиланғачқа, йәр тәврәшләрниң сани көп дәп елан қилиниватиду. Бирақ қандақла болмисун, дунияниң җай-җайлирида йүз бериватқан шиддәтлик йәр тәврәшләр илгирики вақитларға қариғанда, техиму көп азап-оқубәтләр вә өлүмгә сәвәп боливатиду.

 3. АЧАРЧИЛИҚЛАР

Уруш, чириклик, ихтисадий кризис, деханчилиқ ишлири яхши башқурулмаслиқ яки һава райиниң өзгиришигә қарши тәйярлиқниң болмаслиғи түпәйли дунияда озуқ-түлүк йетишмәслик йүз бериватиду. Дуния ашлиқ тәминләшни планлаш мәркизи 2018-жиллиқ доклатида мундақ дегән: «Дунияниң һәрқайси җайлирида 821 миллион адәм ач қалмақта, 124 миллион адәм қаттиқ ачарчилиқни баштин кәчүрмәктә». Озуқлуқниң йетишмәслиги сәвәвидин һәр жили тәхминән 3 миллион бала өлүп кетиватиду. 2011-жилида өлгән балиларниң 45 проценти озуқ-түлүк йетишмәслик түпәйли өлүп кәткән.

4. КЕСӘЛЛӘР ВӘ ВАБАЛАР

Дуния сәһийә тәшкилати нәшир қилған материалда мундақ дейилгән: «21-әсир башлинип, һазирғичә һәрхил апәт характерлик жуқумлуқ кесәлликләр қайта пәйда болди. Уларниң арисида холера, чума, сериқ қизитма, өпкә яллуғи, тарқилишчан зукам, вә оттура шәриқ нәпәс йоли кесили (MERS). Эбола вә Зика қатарлиқ йеңи кесәлләрму пәйда болди». Әң йеңиси — COVID-19 тарқилишчан таҗсиман вируси. Гәрчә алимлар вә дохтурлар кесәлләр тоғрисида көп үгәнгән болсиму, барлиқ кесәлликләрни давалашниң амалини тапалмиди.

5. ДУНИЯ ҖАЙ-ҖАЙЛИРИДА ВӘЗ ҚИЛИШ

Әйса пәйғәмбәр аламәтниң йәнә бир қисмини бәшарәт қилип: «Бу Падишалиқ хуш хәвири барчә хәлиқләргә йәткүзүлүши үчүн пүтүн дунияда вәз қилиниду вә андин кейин ахири келиду» (Мәтта 24:14, ЙД). Бу дунияда қорқунчлуқ иш-вақиәләрниң йүз бериватқанлиғиға қаримастин, һәр милләттин чиққан 8 миллиондин көпирәк киши 240 дөләттә 1000дин артуқ тилда Худа Падишалиғи һәққидики хуш хәвәрни йәткүзүватиду. Инсанийәт тарихида әзәлдин бундақ иш-паалийәт болуп бақмиған.

Һәзрити Әйса бәшарәт қилған аламәтни әмәлгә ашуруватқан иш-вақиәләр бүгүнки күндә йүз бериватиду. Бу биз үчүн муһим әһмийәткә егә. Сәвәви, Әйса Мәсиһ мундақ дегән «Бу иш-вақиәләрниң йүз бериватқанлиғини көргиниңларда, Худаниң Падишалиғи йеқинлап қалғанлиғини билиңлар» (Луқа 21:31, ЙД).

Һәзрити Әйса тилға алған аламәт вә Муқәддәс китапқа асасән һесапланған вақит бойичә, 1914-жили Худа Өз Падишалиғини асманда тиклиди a. Шу вақтида Худа Әйса Мәсиһни Падиша сүпитидә тәхттә олтарғузди (Зәбур 2:2, 4, 6—9). Пат йеқинда Худа Падишалиғи йәр үстидин һөкүмранлиқ қилишни башлайду вә башқа барлиқ һөкүмәтләрни йоқ қилиду вә инсанларниң мәңгү шат-хорам яшиши үчүн йәр йүзини җәннәткә айландуриду.

Йеқин келәчәктә Әйса Мәсиһ үгәткән дуадики сөзләр әмәлгә ашиду: «Падишалиғиң кәлсун. Сениң ирадәң асманда әмәлгә ашқандәк, йәр йүзидиму әмәлгә ашсун» (Мәтта 6:10, ЙД). Ундақта, 1914-жили Падишалиқ һөкүмранлиқ қилишни башлиғандин буян немә ишларни қиливатиду? Келәчәктә бу Падишалиқ йәр йүзи үстидин һөкүмранлиқ жүргүзүшни башлиғанда, биз қандақ бәрикәтләрдин бәһримән болимиз?