Святой дух — со Инмарлэн ужась-лэсьтӥсь кужымез, яке кужым, кудӥныз со мае ке лэсьтэ (Михей 3:8; Лука 1:35). Инмар аслэсьтыз святой духсэ котькытчы лэзьыны быгатэ. Кызьы? Со лэзе аслэсьтыз кужымзэ, быдэстон понна сое, мар солы кулэ (Псалтирь 138:7; Апостолъёслэн ужъёссы 10:38, 45).

Библиын «дух» шуыса берыктӥське еврей кыл ру́ах но грек кыл пне́ума. Ӵем дыръя та кылъёс возьмато Инмарлэсь ужась-лэсьтӥсь кужымзэ, яке святой духез (Улон-вылон 1:2). Но Библиын та кылъёс мукет пуштросэн но кутӥсько. Кылсярысь, куке вераськон мынэ:

• шокан сярысь (Аввакум 2:19; Усьтӥськон 13:15);

• тӧл сярысь (Улон-вылон 8:1; Иоанн 3:8);

• улон кужым сярысь, кудӥз котькинэ луло каре (Иов 34:14, 15);

• адямилэн мылкыдыз, малпанъёсыз сярысь (Лыдпусъёс 14:24);

• кин ке сярысь, кинлэн духовной мугорыз, кылсярысь, Инмар яке кылчин сярысь (3 Эксэйлыкъёслэн 22:21; Иоанн 4:24).

Вылӥын верам «дух» кыллэн пуштросъёсызлэн огъясез вань: ваньмыз соос верало со сярысь, мар уг адӟиськы, но мае шӧдыны луэ. Озьы ик Инмарлэн духез но, У. Е. Вайнлэн кыллюкамаз верамъя, «тӧл выллем, адскисьтэм, солэн мугорыз ӧвӧл, но кужмыз вань» (An Expository Dictionary of New Testament Words).

Библиын святой дух сярысь верамын на, со Инмарлэн «киосыз» яке «чиньыосыз» шуыса (Псалтирь 8:4; 18:2; Лука 11:20; ӵошатэ Матфейлэсь 12:28). Кызьы ӧнерчи мае ке аслаз киосыныз но чиньыосыныз лэсьтэ, озьы ик Инмар но аслаз духеныз:

• Дуннеез кылдытӥз (Псалтирь 32:6; Исаия 66:1, 2);

• Библиез гожтӥз (2 Пётр 1:20, 21);

• юрттӥз вашкала ужась-тыршисьёсызлы паймымон ужъёс лэсьтыны но мылысь-кыдысь тодытыны (Лука 4:18; Апостолъёслэн ужъёссы 1:8);

• юрттӥз кылзӥськись адямиослы умой сямъёс будэтыны но соосты возьматыны (Галатъёслы 5:22, 23).

Святой дух — кин ке ӧвӧл

Библиын Инмарлэн духез сярысь, солэн «киосыз», «чиньыосыз» яке «шоканэз» сярысь кадь верамын бере, адӟиське, святой дух — со кин ке ӧвӧл (Потон 15:8, 10). Кызьы ӧнерчилэн киосыз ас понназы, мугортэк, ужаны уг быгато, озьы ик святой дух но Инмартэк ужаны уг быгаты (Лука 11:13). Со лэсьтэ сое гинэ, мае Инмарлэн потэ. Озьы ик Инмарлэн духез Библиын ӵошатӥське вуэн но герӟаське, кылсярысь, осконэн но тодон-валанэн. Ваньмыз со возьматэ, святой дух кин ке ӧвӧл шуыса, со кужым (Исаия 44:3; Апостолъёслэн ужъёссы 6:5; 2 Коринфъёслы 6:6).

Библиын верамын, Инмарлэн но солэн Пиезлэн нимъёссы вань шуыса. Нош нокытын но верамын ӧвӧл, святой духлэн нимыз вань шуыса (Исаия 42:8; Лука 1:31). Куке Стефан, Иисуслэн дышетскисез, адӟон адӟиз, со инмысь адӟиз Инмарез но со вӧзысь Иисусэз гинэ. Библиын верамын: «Стефан, Святой Духен тыр луыса, инме учкиз но Инмарлэсь пиштӥсь данлыксэ, Инмарлэн бурпалаз сылӥсь Иисусэз адӟиз» (Апостолъёслэн ужъёссы 7:55). Нош святой дух, Инмарлэн ужась-лэсьтӥсь кужымез, Стефанлы та адӟонэз адӟыны юрттӥз.

Мар верало. Святой дух — со одӥгез, кин Святой Троица пӧлы пыре, кызьы адӟиське 1 Иоаннлэн 5:7, 8.

Кызьы со зэмзэ ик. 1 Иоаннлэн 5:7, 8 вань таӵе кылъёс: «Инмын... Атай, Кыл но Святой Дух. Соос куинез одӥг луо. Музъем вылын но куинь шара ивортӥсь». Но тодосчиос, эскеронъёс ортчытыса, валазы, апостол Иоанн та кылъёсты ӧз гожты шуыса. Соин ик соосты Библилэн люкетэныз лыдъяны уг луы. Профессор Брюс Мецгер гожтӥз: «Та кылъёс шонересь ӧвӧл. Соос Выль Сӥзёнын луыны кулэ ӧвӧл» (A Textual Commentary on the Greek New Testament).

Мар верало. Библия святой дух сярысь улэп мар ке сярысь кадь вера. Со возьматэ, святой дух улэп мар ке шуыса.

Кызьы со зэмзэ ик. Библия куддыръя святой дух сярысь улэп мар ке сярысь кадь вера. Кылсярысь, Иисус святой духез «Буйгатӥсь» (параклит) шуыса нимаз, кудӥз шара вералоз, дышетоз, кылоз, ивортоз, данэ поттоз но мае ке басьтоз (Иоанн 16:7—15). Но со уг возьматы, святой дух со кин ке улэп мар ке шуыса. Библия озьы ик визьлык, кулон но сьӧлык сярысь улэп мар ке сярысь кадь вера (Мадёнъёс 1:20; Римъёслы 5:17, 21). Кылсярысь, отын верамын, визьлыклэн «нылпиосыз» вань шуыса. Нош сьӧлык сярысь верамын, со ӧрекча, вие но мылкыд каронъёсты пуромытэ шуыса (Лука 7:35; Римъёслы 7:8, 11).

Мар верало. Святой духлэн нимыз понна пылатӥськон возьматэ, святой дух улэп мар ке шуыса.

Кызьы со зэмзэ ик. Библиын куддыръя «ним» кыл кутӥське кинлэсь ке кужымзэ яке кыӵе инты басьтэмзэ возьматон понна (Кыкетӥ Закон 18:5, 19—22; Есфирь 8:10). Озьы ик удмурт кылын но вань веран — «катлэн нимыныз». Но та веран уг возьматы, кат улэп мар ке шуыса. Адями, кудӥз святой духлэн «нимыз понна» пылатӥське, вала, кыӵе кужымез святой духлэн но кыӵе инты со басьтэ Инмарлэсь эриксэ быдэстонын (Матфей 28:19).

Мар верало. Иисуслэн апостолъёсыз но мукет дышетскисьёсыз, кудъёсыз улӥзы нырысетӥ даурын, оско вал, святой дух улэп мар ке шуыса.

Кызьы со зэмзэ ик. Библия но, история но уг верало, со зэм шуыса. «Британской энциклопедиын» верамын, святой духез улэп маин ке лыдъян сярысь ужпум кутӥзы шуыса а. в. 381-тӥ арын Константинополь черкын. Со дырлы берпуметӥез апостол кулэм дырысен 250 арлэсь кемагес дыр ортчемын вал ини.