Вань. Библиын гожтэмын оскытыса веранъёс, кудъёсыз возьмато, Инмар вань шуыса. Библия мылкыдмес ӝутэ «визьмын валаса» Инмарлы оскыны (Римъёслы 12:1; 1 Иоанн 5:20). Ӵектӥськомы тӥледлы эскерыны Библиысь куд-ог оскытыса веранъёсты:

• Быдэс дунне но улон сярысь малпаськыса, валаны луэ, Кылдытӥсь вань шуыса. Библиын гожтэмын: «Котькуд коркаез кин ке но пуктэ; нош ваньзэ пуктӥсь-лэсьтӥсь луэ — Инмар» (Еврейёслы 3:4). Та огшоры валэктон ке но, со трос дышетскем адямиосты но оскытэ *.

• Котькуд адямилэн тодэмез потэ, малы со улэ. Огшоры мылпотонъёсты быдэсъяса гинэ, сое тодыны уг луы. Со понна милемлы кулэ Инмарез тодыны но солы йыбыртъяны. Библия дышетэ, ми Инмарлэн матысь эшъёсыз луыны быгатӥськомы шуыса (Иаков 2:23; Усьтӥськон 4:11). Инмарез тодон но солы йыбыртъян мылкыдмы возьматэ: Инмар вань, озьы ик Кылдытӥсь адямиосты яратэ. Солэн потэ, ми та мылкыдмес мед быдэсъяломы шуыса (Матфей 4:4).

• Библиысь азьпалзэ тодытыса веранъёс гожтэмын вал быдэсмемзылэсь кӧня ке дауръёслы азьлогес. Соос быдэсмизы ӵапак соку, куке быдэсмыны кулэ вал. Та азьпалзэ ивортонъёслэн шонер но пыр-поч луэмзы возьматэ, соос адямиослэсь потыны ӧз быгатэ шуыса (2 Пётр 1:21).

• Библиез гожъясь адямиос тросгес тодӥзы соослэсь, кинъёс соос дыръя ик улӥзы. Кылсярысь, вашкала дыръёсы тросэз адямиос оскизы: музъем сылэ слон, кырпарсь, ош яке кыӵе ке мукет пудо-живот вылын. Нош Библиын гожтэмын вал, Инмар «музъемез номыртэм интые ошиз» шуыса (Иов 26:7). Озьы ик Библия шонер валэктэ, кыӵе музъемлэн формаез. Отын вераське, со шар шуыса (Исаия 40:22). Тросэзлэн малпамзыя, таӵе мур тодон-валанъёсты Библиез гожъясьёслы Инмар вераз.

• Библия трос секыт юанъёслы валэктонъёс сётэ. Та юанъёслы валэктонъёс шедьтытэк, тросэз адямиос Инмарлы оскемысь дугдо. Кылсярысь: Инмар яратӥсь но ваньзэ быгатӥсь ке, соку малы музъем вылын сомында лек ужъёс но курадӟонъёс? Малы та дуннеын оскись адямиос, умой ужъёс интые, ӵем дыръя лек ужъёс лэсьто? (Титлы 1:16).