АСЬМЕ вакытлэсь азьло VII даурлэн кутсконаз Ассирия дунне вылын самой кужмо империя луиз. Британиысь музейлэн сайтаз верамъя, та империлэн музъемез кыстӥськиз шундыпуксён палан Кипрысен шундыӝужан палан Иранозь. Кыӵе ке аръёсы отчы Египет но пыре вал. Солэн шоркарез, Ниневия, дунне вылын самой бадӟым кар вал. Отын вал туж бадӟымесь статуяос, чебересь садъёс, узыресь дворецъёс но бадӟымесь библиотекаос. Борддоръёс вылысь гожтэмъёс, кудъёсыз шедьтэмын вал вашкала Ниневиялэн интыысьтыз, возьмато, Ашшурбанипал, Ассирияысь мукет кивалтӥсьёс сямен, ассэ «дуннелэн эксэеныз» нима вал шуыса. Малпаны луэ вал, Ашшурбанипал кивалтыку, Ассирияез но солэсь Ниневия шоркарзэ нокин вормыны уз быгаты шуыса.

Озьы ке но Ассирия самой кужмо дыръяз Софония пророк азьло ик вераз Иеговалэсь кылъёссэ: «Со Ассурез [Ассирияез] быдтоз, Ниневияез куашкам юртлы пӧрмытоз, луоё кыр кадь кӧс интылы пӧрмоз» (Соф. 2:13). Нош Наум пророк вераз: «Лушкалэ-талалэ азвесьсэс, лушкалэ-талалэ зарнизэс! [...] Лушкамын, таркамын, тырттэм кельтэмын со»; «Кин тонэ адӟиз, ваньзы тон дорысь бызьыса кошкозы но шуозы: „Ниневия куашкатэмын!“» (Наум 2:9, 10; 3:7). Та азьпалзэ ивортонъёсты кылыса, адямиос паймыны быгатысалзы: озьы луыны быгатэ шат? Кужмо Ассирияез кин ке но вормыны быгатоз-а? Талы оскыны секыт вал.

Но ӵапак озьы ик луиз! Асьме вакытлэсь азьло VII даурлэн пумаз Ассирияез вавилон но мидян калыкъёс киултӥзы. Дыр ортчыса, Ниневияын нокин ӧз улы ини. Со сярысь воксё вунэтӥзы. Нью-Йоркысь одӥг музейлэн сайтаз вераське: «Шор дауръёсы номыр ӧз возьматы ни, отын куке но кар вал шуыса. Ниневия сярысь Библиысь гинэ тодыны луэ вал» (Michael Seymour. Nineveh). Библейской археологической огазеяськонлэн онлайн-архивысьтыз одӥг публикацияз верамъя, XIX даурлэн кутсконаз нокин рос-прос ӧз тоды ини, Ассириялэн быдӟым шоркарез куке но зэмзэ ик вал шуыса (Deborah A. Thomas. Uncovering Nineveh). Но берлогес, 1845-тӥ арын, Остин Лейард, археология удысысь тодосчи, Ниневия сылон интыын гудыса утчаськонъёсты нуыны кутскиз. Со утчаськонъёс дыръя шедьтэмъёс возьматӥзы: Ниневия туж дано кар вал.

Ниневия сярысь азьпалзэ ивортонъёс пыр-поч быдэсмизы. Озьыен, быдэсмоз ваньмыз, мар вераське Библиын туала кивалтӥсьёс сярысь (Дан. 2:44; Усьт. 19:15, 19—21).