Адӟись-Ивортӥсьёс асьсэды лякыт возизы адямиосын но, мынам пуныосыным но. Огпол Элейн нимо кышномурт, кудӥз стенд вӧзын сылэ вал, соослы печенье сётӥз. Со пуныосылы туж кельшиз. Соин ик котьку но, куке ми карлэн шортӥз ветлӥмы, пуныосы монэ „печеньеен стенд“ доры кыско вал.

Озьы кӧня ке толэзьёс ӵоже кыстӥськиз. Стенд дорын пуныосылы печенье сёто вал, нош ми Иеговалэн Адӟись-Ивортӥсьёсыныз ог-огмылы кык-куинь кыл вераса вуттӥськомы вал. Но мон соосын туж ик ӧй эшъяськы. Мыным 70 ареслэсь тросгес вал ини. Мон рос-прос ӧй тоды, малы оско Иеговалэн Адӟись-Ивортӥсьёсыз. Азьвыл мон зэмлыкез утчай протестантской черкъёсысь. Но номыр ӧз пӧрмы. Соин ик малпай Библиез ас поннам гинэ лыдӟыны.

Озьы ик мон адӟи, Иеговалэн Адӟись-Ивортӥсьёсыз стендъёсын карлэн мукет интыосаз но сыло шуыса. Ваньзы соос асьсэды туж умой возизы. Котькуд юанлы соос валэктон Библиысь возьмато вал. Та мыным туж кельшиз, соин ик мон соослы тросгес оскыны кутски.

Огпол Элейн мыным шуиз: „Пудо-животъёс — со Инмарлэн кузьымез! Озьы-а?“ Мон шуи: „Зэм но, со озьы ик вань!“ Собере со лыдӟиз мыным Исаиялэсь 11:6—9. Журналэз мон ӧй басьты ке но, та кылъёс мынам сюлмам ик пыризы.

Со дырысен ми Элейн сузэрен но Брент картэныз кӧня ке пол вакчияк вераськылӥмы. Со вераськонъёс туж тунсыкоесь вал. Мон мед валалом шуыса, мар кароно, зэмос христиан мурт луон понна, соос ӵектӥзы мыным лыдӟыны Евангелиосты но Апостолъёслэн ужъёссы книгаез. Ӝоген, 2016-тӥ арын гужем, мон та кузпалъёсын Библиез дышетыны соглаш кариськи.

Мон туж возьмасько вал котькуд дышетонмес но пумиськонъёсты, кудъёсыз Эксэйлык юртын ортчытӥсько. Мон туж шумпотӥсько вал тодыны, малы зэмзэ ик дышетэ Библия. Дышетыны кутскеммы бере арлэсь ӧжыт тросгес ортчиз но, мон пылатӥськи но Иеговалэн Адӟись-Ивортӥсез луи. Али, 79 арес дыръям, мон юн оскисько, шонер сюрес шедьтӥ шуыса. Иегова мыным бадӟым дан сётӥз семьяез пӧлы пырыны».