Li Vivliae chal kʼu yelan stalelal krixchanoetik xchiʼuk chalbe skʼoplal kʼusitik chkʼot ta pasel «kʼalal poʼot xa xlaj skotol li kʼusitik oy ta balumile» (Mateo 24:3). Taje jaʼ li slajebal kʼakʼal chal Vivliae (Daniel 8:19; 2 Timoteo 3:1).

 Li Vivliae yaloj xa onoʼox li kʼusitik chkʼot ta pasel ta slajebal kʼakʼale (Lukas 21:7). Jkʼeltik batel junantik:

 Paskʼop ta buyuk noʼox. Li Jesuse laj yal ti «chlik skontrain sbaik jujun mukʼta jteklum, chlik skontrain sbaik ajvaliletik» (Mateo 24:7). Jech xtok, li ta Apokalipsis 6:4, tskoʼoltas ta jun jkajlej ta kaʼ li paskʼop ti chchʼayes li jun oʼontonal ta balumile.

 Viʼnal. Li Jesuse laj yal ti chtal viʼnale (Mateo 24:7). Li ta Apokalipsise chalbe skʼoplal yan jkajlej ta kaʼ ti chakʼ taluk viʼnal ta spʼejel balumile (Apokalipsis 6:5, 6).

 Tsatsal nikeletik. Li Jesuse laj yal ti ch˗echʼ nikel ta buyuk noʼoxe (Mateo 24:7; Lukas 21:11). Li tsatsal nikeletik taje mas to chkil˗o jvokoltik xchiʼuk ep buchʼutik chcham˗o.

 Tsatsal chamel. Li Jesuse laj xa onoʼox yal ti chtal tsatsal chamel ta buyuk noʼoxe (Lukas 21:11).

 Ch˗epaj choplejal. Akʼo mi oy xa onoʼox kʼusitik chopol chkʼot ta pasel, li Jesuse laj xa onoʼox yal ti mas to ch˗epaj choplejal li ta slajebal kʼakʼale (Mateo 24:12).

 Tsok li balumile. Li ta Apokalipsis 11:18, chal ti krixchanoetike «tsokesik li balumile». Taje maʼuk noʼox skʼan xal ti ch˗epaj li choplejal xchiʼuk li paskʼope, yuʼun te skʼoplal xtok ti tsok li jbalumiltike.

 Tsok stalelal krixchanoetik. Li Vivliae yaloj xa onoʼox ti jutuk mu skotoluk li krixchanoetike «mu kʼusi snaʼ stojik ta vokol, muʼyuk stukʼil yoʼontonik, [...] mi jutebuk oy ta yoʼontonik tspas ta jmoj skʼopik, chchopol loʼiltavanik, mu snaʼ spajes sbaik, simaronik, muʼyuk skʼanojik li kʼusi leke, j˗akʼvanejetik ta kʼabal, pimik ta mantal, xtoyet xa tajek chaʼi sbaik» (2 Timoteo 3:1-4). Li talelaletik taje jaʼ chakʼ kʼotuk ta pasel ti «chtal tsots vokolil» xchiʼuk «toj echʼ noʼox xibal sba».

 Chchʼak sba utsʼ alaliletik. Li ta 2 Timoteo 3:2 xchiʼuk 3, chal ti muʼyuk xa tskʼan sbaik li utsʼ alaliletike xchiʼuk «mu xchʼunbe smantal stot smeʼik» li alab nichʼnabiletike.

 Muʼyuk skʼanojik Dios li krixchanoetike. Kʼalal laj yal Jesus ti «mas xa ep li krixchanoetik ti muʼyuk chkʼanvanike», jaʼ laj yalbe skʼoplal ti muʼyuk xa tskʼanik Dios epal krixchanoetike (Mateo 24:12). Jech xtok, li ta 2 Timoteo 3:4 chal ti ta slajebal kʼakʼale jaʼ skʼanojik kʼusi kʼupil sba chaʼi stukik li krixchanoetike, jaʼ muʼyuk skʼanojik li Diose.

 Muʼyuk lek ti kʼu yelan chichʼik ta mukʼ Diose. Li ta 2 Timoteo 3:5, chal ti chichʼik ta mukʼ Dios yilel li krixchanoetike, pe muʼyuk chakʼ ta xkuxlejalik li kʼusi chale.

 Mas to chkaʼibetik smelolal li albil kʼopetik ta Vivliae. Li slivroal Daniele chal ti mas to chkaʼibetik smelolal kʼusi chal Vivlia «mi kʼot li slajebale». Jech kʼuchaʼal ta sventa li kʼusitik chkʼotanuk ta pasel avie (Daniel 12:4).

 Ta xichʼ cholel mantal ta spʼejel balumil. Xi onoʼox yaloj li Jesuse: «Li lekil aʼyejetik ta sventa li Ajvalilale ta xichʼ cholel ta spʼejel balumil» (Mateo 24:14).

 Li krixchanoetike mu xchʼunik xchiʼuk chlabanvanik. Li Jesuse laj yal ti jutuk mu skotoluk li krixchanoetike mu stsakik ta venta li sprevailtak ti chakʼ ta ilel ti ta slajebal xa kʼakʼal kuxulutike (Mateo 24:37-39). Li ta 2 Pedro 3:3 xchiʼuk 4, chal ti chlabanvan li krixchanoetike xchiʼuk ti muʼyuk tstsakik ta venta li kʼusitik yakal chkʼot ta pasele.

 Chkʼot ta pasel skotol li albil kʼopetike. Li Jesuse laj yal ti ta jmoj yorail chkʼot ta pasel skotol li albil kʼopetik ta slajebal kʼakʼale, maʼuk noʼox junchib (Mateo 24:33).

 Jech. Li kʼusitik chkʼot ta pasel ta spʼejel balumile xchiʼuk li kʼusitik lek xcholet chal ta Vivliae chakʼ ta ilel ti lik ta 1914 li slajebal kʼakʼale. Li jabil taje jaʼo lik li Baʼyel Mukʼta Paskʼop ta spʼejel Balumile. Kʼelo li videoe xchiʼuk akʼo venta ti jaʼ svinajeb ti kuxulutik xa ta slajebal kʼakʼal li kʼusitik yakal chkʼot ta pasele:

 Li ta 1914, jaʼo lik ajvalilajuk ta vinajel li Ajvalilal yuʼun Diose. Jtos ti kʼusi la spas li ajvalil taje jaʼ ti la sjip yalel ta balumil li Diablo xchiʼuk li spukujtake. Jaʼ yuʼun, liʼ xa noʼox ta balumil tspas mantale (Apokalipsis 12:7-12). Li xchopol talelal krixchanoetike jaʼ svinajeb ti pasbilik ta mantal yuʼun li Satanase. Jaʼ yuʼun, toj «tsots vokolil li ta slajebal xa kʼakʼale» (2 Timoteo 3:1).

 Epal krixchanoetike tsvul˗o yoʼontonik ta skoj ti tstsatsaj li kuxlejale xchiʼuk ti ep buchʼutik chil svokolike. Junantike chiʼik˗o ti xuʼ xkakʼbe jba jvokoltik ta jujuntale.

 Pe junantik krixchanoetike oy kʼusi lek smalaojik akʼo mi tsvul˗o yoʼontonik li kʼusitik yakal chkʼot ta pasele. ¿Kʼu yuʼun? Yuʼun xchʼunojik ti jutuk xa skʼan slajesbe skʼoplal vokolil li Ajvalilal yuʼun Diose (Daniel 2:44; Apokalipsis 21:3, 4). Jun yoʼonton tsmalaik ti xkʼot ta pasel li kʼusi yaloj Diose. Chpatbat˗o yoʼontonik li kʼusi laj yal Jesus liʼe: «Li buchʼu chkuch yuʼun kʼalal to ta slajebe jaʼ ta xkol» (Mateo 24:13; Mikeas 7:7).