¡WIKʼILUK JSITIK SPISIL-ORA!

¿Yabal xjuʼ te ay Machʼa ya yakʼ lamalkʼinal? | ¿Bin ya yalbotik te Biblia?

TSUMA TA

Spisil te organizacionetik ta swolol balumilal ma juʼem yuʼunik te ayuk lamal kʼinale. Jaʼto tal ta Segunda Guerra Mundial maba lajem skʼoplal te wokolile. Ayniwan 2 mil millón ta tul ants winiketik kuxinemik te banti ay te wokolile.

¿Bin yuʼun ma staik lamalkʼinal te ants winiketike? ¿Bin ya yal te Biblia?

Oxchajp skʼoplal te bin yuʼun ma staik lamalkʼinal te ants winiketike

1. Te Biblia jich ya yal: «Te ants winiketik jaʼnax kʼux ya yaʼiy sbaik ta stukelik; ya xbikʼtaj yoʼtanik yuʼun takʼin, ya stoy sbaik, mukʼ skʼoplal ya skuy sbaik, [...] sok ma junuk yoʼtanik, [...] maʼyuk acuerdo ta yoʼtanik, [...] ma snaʼik skomel sbaik, kʼaxto ya x-utsʼinwanik, [...] sok maʼyuk razón ta yoʼtanik, nojel ta toybail te yoʼtanike». Te bitʼil jich stalel te ants winiketike ma spasik tulan ta sleel te lamalkʼinal (2 Timoteo 3:2-4).
2. Te ants winiketik, manchukme tsobolik o stukelik ma xjuʼ yuʼunik schajpanel te swokolik teme ma skʼanbeyik koltayel te Jehovae. a Te Biblia jich ya yal: «Te ants-winic ma haʼuc scuentahinej te be yuʼune» (Jeremías 10:23).
3. Te balumilal ay ta skʼab jtul chopol ajwalil sok te bayal yuʼel «te yak ta sloʼlayel spisil te ants winiketik ta balumilal» (Apocalipsis 12:9). Jaʼ te Satanás, te jaʼnix jich sbiilinoj te Machʼa Chopole. Te bitʼil «jaʼ ay ta skʼab swolol balumilal te Satanás» ma xlaj skʼoplal te wokolil sok te guerraetike (1 Juan 5:19).

¿Machʼa ya xbajt yakʼ lamalkʼinal?

Te Biblia ya yal te jaʼ ya yakʼ lamalkʼinal te Diose, ma jaʼuk te ants winiketike.

«Como ya jnaʼ te bin jnopoj ta acuentahic, xchi te Jehová, ha jnopoj te lec ya xcʼohex, ma haʼuc te ya xcʼax awocolic, ya caʼbeyex te bin yaquex ta smahliyele» (Jeremías 29:11).

¿Bin-utʼil ya skʼotes ta pasel te Diose? Te Biblia jich ya yal: «Te Dios te ya yakʼ lamalkʼinal nopolme ya [stsʼoʼix] ta tekʼel te Satanás» (Romanos 16:20). Te Dios ya xbajt stuuntes jun Wentainel te ay ta chʼulchan yuʼun ya yakʼ lamalkʼinal liʼ ta Balumilal. Te Biblia ya yal te jaʼ «te Wentainel yuʼun te Diose» sok te Ajwalil yuʼune, jaʼ te Jesucristo (Lucas 4:43). Kʼalal ya xwentainwan ta Balumilal te Jesús, ya xkuxinik ta lamalkʼinal te ants winiketik (Isaías 9:6, 7).