Te Biblia bayal buelta ya yal te jaʼ sNichʼan Dios te Jesuse (Juan 1:49). Te kʼalal jich ya yal te Biblia, ya yakʼ ta naʼel te jaʼ te Jpaswanej te Diose sok te jaʼ te J-akʼkuxlejalile. Jich yuʼun te Jesús jaʼ pasbil yuʼun te Diose (Salmo 36:9; Apocalipsis 4:11). Te Biblia maba ya yal te jich la sta yal snichʼnab te Dios te bin-utʼil ya sta yal snichʼnab te ants winiketike.

 Te Biblia jaʼnix jich ya yal te jaʼ «yal-snichʼnab Dios» te chʼul-abatetike (Job 1:6). Jaʼnix jich ya yal te jaʼ «snichʼan Dios» te Adán, te sbabial winike (Lucas 3:38). Pero, te Biblia ya yakʼ ta naʼel te jaʼ mukʼxan skʼoplal te Jesús ta spisil te yal snichʼnab te Diose, melel jaʼ te sbabial te machʼa la spas sok te machʼa mero la spas ta stukele, te maʼyuk machʼa koltayot yuʼune.

•  ¿Kuxinbal ta chʼulchan te Jesús te kʼalal mato xtal ta Balumilale?

•  ¿Bin ya spas-a te Jesús ta chʼulchan te kʼalal mato xtal ta Balumilale?

 Kuxin, jaʼ jun espíritu-a te kʼalal mato xtal ta Balumilal. Jaʼnix te Jesús jich la yal: «Cohemon tal ta chʼulchan» (Juan 6:38; 8:23).

 Te Dios jaʼ la spas ta sbabial te Jesuse. Te Biblia jich ya yal ta stojol te Jesús:

•   «Ha ba-alalil yuʼun spisil bintic pasticlambil» (Colosenses 1:15).

•   Jaʼ «te shahchibal [yuʼun] te bintic pasticlambil yuʼun Dios» (Apocalipsis 3:14).

 Te bin la yal te j-alwanej Miqueas jaʼ kʼot ta pasel ta stojol te Jesuse. Jich la yal: «Nameyix te shahchibal, cʼax bayel haʼbil» (Miqueas 5:2; Mateo 2:4-6).

 Yichʼoj mukʼ yaʼtel ta chʼulchan. Jaʼ yak ta yalbeyel skʼoplal-a te yaʼtel yichʼoje te kʼalal jich la yalbey te Diose: «Jtat, aʼbon quichʼ xan cutsilal ta atojol, ha te utsilal ay cuʼuntic te cʼalal ma to ayuc a te bahlumilale» (Juan 17:5).

 La skoltay te sTat ta spastiklanel spisil te bintik aye. Te Jesús la skoltay te Dios «ta schahpanlanel spisil» te bintik la yichʼ pasele (Proverbios 8:30). Te Biblia jich ya yal ta stojol te Jesús: «Ha ta scuenta te la yichʼ pasel spisil bintic ay ta chʼulchan soc spisil bintic ay ta bahlumilal» (Colosenses 1:16).

 Ta swenta te Jesús te Dios la spas te chʼul-abatetik sok spisil te bintik ay ta chʼulchan sok ta Balumilal (Apocalipsis 5:11). ¿Bin ya skʼan ya yal ini? Jaʼ te la skoltay ta aʼtel te Dios jich te bin-utʼil jtul albañil ya skoltay ta aʼtel jtul ingeniero o arquitecto. Te ingeniero jaʼ ya yal bin ya yichʼ pasel sok bin-utʼil ya yichʼ pasel te aʼtelile; te albañil jaʼ ya skʼotes ta pasel.

 Jaʼ te Kʼopil-a. Te Biblia ya yakʼbey sbiilin Kʼopil te Jesús te kʼalal mato xtal ta Balumilal (Juan 1:1). Te bin ya skʼan ya yal ini, jaʼ te la skʼases ta stojol te chʼul-abatetik te bin ya yal te Diose.

 Jaʼnix jich jaʼniwan te Jesús la skʼasesbey skʼop te Dios ta stojol te ants winiketik. Sok kʼalal te Dios ay bin la yakʼbey snaʼ te Adán sok te Eva ta tsʼunbil kʼinal Edén, jaʼniwan kʼasesbot skʼop yuʼun te Jesuse (Génesis 2:16, 17). Jaʼniwan yan buelta te Jesús te chʼul-abat te la skoltay o la stojobtes te israeletik te kʼalal beenik ta jochol takin kʼinal sok te ya skʼan ya xchʼuunbot te skʼope (Éxodo 23:20-23). a