Хөй кижилер чүдүлге черлеринче барбастаан, чүге дээрге олар Бургандан удуртулганы болгаш оожургалды оон албайн турар. Ынчаарга Иегованың Херечилериниң ужуражылгаларынче чүге баар болза экил?

Буянныг, эки кижилер-биле аралажып турар бис. Бирги векте христианнарны бөлүк-бөлүк чыыштар кылдыр каттыштырган турган. Аңаа олар Бурганга чүдүп, Ыдыктыг Бижилгени өөренип, бот-боттарын деткижер аргалыг турган (Еврейлерге 10:24, 25). Оларның аразынга чылыг-чымчак хамаарылга турган, ынчангаш кижи бүрүзү бүзүрели чаңгыс ха-дуңма аразынга бодун ёзулуг эш-өөрлүг кылдыр миннип турган (2 Фессалоникчилерге 1:3; 3 Иоанн 14). Бис оларның үлегерин эдерип, шак-ла ындыг өөрүшкүнү миннип турар бис.

Библейжи хоойлу-дүрүмнерни ажыглаарын өөренип турар бис. Бурганның дугайында билип алыр дээш, эрткен үеде эр-даа, херээжен-даа улус ажы-төлү-биле кады чыглып турган деп Библияда бижээн. Бис база ол үлегерни эдерип турар бис. Амыдыралга библейжи дүрүмнерни канчаар ажыглаарын билип алырынга биске дуржулгалыг башкылар дузалап турар (Ы. х. к. 31:12; Неемия 8:8). Күзелдиг улус библейжи сайгарылгага болгаш ыры күүседиринге киржип болур. Ол дээрге Бурганны алгап-мактаар кайгамчыктыг арга-дыр (Еврейлерге 13:15).

Бүзүреливисти быжыглап турар бис. Павел элчин хуралдарның бирээзинге: «Шагдан бээр силерни көрүксеп келдим... ниити бүзүреливис-биле: бодумну — силернии-биле, а силерни — бодумнуу-биле удур-дедир деткижеривис дээш, силерге ужуражыксадым» — деп бижээн (Римчилерге 1:11, 12). Ха-дуңма-биле доктаамал аралажыры бүзүреливисти быжыктырып, Бурганның хоойлулары-биле шиитпирлиг чурттаарывыска дузалап турар.

Дараазында болур ужуражылгавысче силерни сеткиливистиң ханызындан чалап тур бис. Бис силерниң келгениңерге дыка өөрүүр бис. Кирери халас, кандыг-даа акша чыылдазы чок.

• Иегованың Херечилери ужуражылгаларын эрттиреринге үлегерни кайыын алганыл?

• Иегованың Херечилериниң ужуражылгаларынче чүге баар болза экил?