КЫЖАНЫГ: Күрүне болгаш шажын башкарыкчылары библейжи медээни тарадырынга күштүү-биле шаптыктап турганнар. Библияны эдилээрин, очулдурарын, хоолгалаарын, а сөөлзүредир парлаарын бо-ла хоруп турганнар. Ийи чижекти көрээлиңер.

• Б. э. чедир 167 хире чыл. Селевкидтерниң ызыгуур дамчаан хааны Антиох Эпифан иудейлерни гректерниң чүдүлгезин хүлээп алыр кылдыр күш-биле албадаар дээш, Еврей Бижилгелерниң шупту хоолгаларын узуткаарын дужааган. Хаанның улузу чүнү кылып турганын төөгүчү Генрих Грец мынчаар бижээн: «Тораның дүрүг номун тып алыр болза, ону бичии кезектерге ора тырткаш, өрттедип база ыдыктыг бижилгеден оожургал дилеп номчуп турган улусту ол-ла черинге өлүрүп турган».

• Ортаакы чүс чылдар. Бөдүүн улус католиктиг догматтарны эвес, а библейжи өөредиглерни суртаалдаарга, католик шажынның чамдык башкарыкчылары аажок хорадап турганнар. Ынчангаш латин дыл кырында Ырылардан аңгыда, Библияның кандыг-бир номнары бар улусту церковька удур кижилер деп чарлап турганнар. «Ол удурланыкчыларны кызымаккай, шынгыы база тура дүшпейн дилеп... каразып турар шупту бажыңнарны болгаш подвалдарны эки хынаңар.... Оода чаңгыс ындыг кижи тывылган бажыңны үреп-бузар ужурлуг» деп чарлыкты бир церковьтуң чөвүлели үндүрген.

Библияның дайзыннары ону узуткап шыдаан болза, ооң медээзин кажан-даа дыңнавас ийик бис.

БИБЛИЯ КАНЧААР КАДАГАЛАТТЫНГАНЫЛ? Антиох Эпифан Израильдиң иудейлерин каржы истеп сүрүп турган. Ынчалза-даа хөй иудейлер өске черлерге база чурттап чораан. Эртемденнерниң саналы-биле алырга, б. э. I-ги векте еврейлерниң хөй кезии Израильден дашкаар чурттап турганнар. Олар Ыдыктыг Бижилгениң хоолгаларын синагогаларынга шыгжап турганнар, ол дээрге салгалдан салгал дамчып келген Бижилгелер-дир. Соонда ону христианнар база ажыглап турган (Ажыл-Чорудулга 15:21).

Ортаакы чүс чылдарда Бурганның Сөзүнге ынак кижилер, истеп сүрүүшкүннер турза-даа, ону очулдуруп, тарадырын уламчылап турган. Тускай парлаар станокту чогаадып үндүрбээнде-ле, XV вектиң ортузунда Библияның чамдык кезектери 33 дылда бар турган чадавас. Үр болбаанда Библияны кидин түлүк очулдуруп, парлап эгелээн.

ТҮҢНЕЛИНДЕ: Күчү-күштүг чагырыкчылар болгаш шажынчыларның талазындан истеп сүрүүшкүннер турза-даа, Библия төөгүде эң-не очулдуртунгур болгаш нептереңгей ном апарган. Бурганның Сөзү чамдык чурттарның хоойлуларынче, культуразынче, дылынче база миллион-миллион кижилерниң чуртталгазынче дыка күштүг салдарны чедирген.