Ашак-кадай улус самолёттуң ужудукчулары ышкаш демниг, чаңгыс команда боор ужурлуг. Кажан бергелер тургустунуп кээрге, оларга «мен» деп эвес, а «бис» деп боданыры чугула.

БИБЛЕЙЖИ ДҮРҮМ: «Олар ам ийи эвес, а чаңгыс мага-бот боор-дур» (Матфей 19:6).

«Өг-бүле болуру — соло эвес, а дуэт боору-дур. Өг-бүлези быжыг болзун дизе, олар чаңгыс команда дег, демниг болур ужурлуг» (Кристофер).

Чаңгыс эп-сеткил чок ашак-кадай улус бергелер тыптып кээрге, оларны демниг шиитпирлээриниң орнунга, бот-боттарынче ажынып-хорадаарлар. Түңнелинде олар хензиг-ле чүүлден улуг моондакты тургузуп ап болур.

«Өг-бүле улуска чаңгыс демниг команда дег болуру дыка чугула. Бир эвес демниг болбас болза, олар анаа кожалар дег апаар. Ындыг өг-бүлелерге шыңгыы бергелер тургустунуп кээрге, дем чок болганындан олар ону шиитпирлеп шыдавастар» (Александра).

БОДУҢАРНЫ ХЫНАҢАР

• Ажылдап ап турар акшамны чүгле мээң акшам деп санап турар мен бе?

• Дыштанып алыр дээш, кады чурттаан эжимден аңгы туруксап турар мен бе?

• Ашаам (кадайым) дөргүл-төрели-биле чеже-даа эки хамаарылгалыг болза, мен ооң төрелдери-биле чоок харылзажырындан дезип турар мен бе?

КАДЫ САЙГАРЫҢАР

• Кандыг ажылды чаңгыс демниг команда дег эки кылып билир бис?

• Кандыг ажылды оон-даа эки кады кылып болур бис?

• Оон-даа артык демниг, сырый харылзаалыг боорунга биске чүү дузалаарыл?

СҮМЕЛЕР

• Теннистээри ышкаш, сетка ажыр бот-боттарынга удур ойнаарының орнунга, чаңгыс талага чаңгыс команда бооп, ойнаңар.

• «Канчап тиилеп алыйн?» деп боданырының орнунга, «Канчап тиилеп алыр бис?» деп бодаары дээре.

«Кымның шын, кым буруулуг деп кажан-даа маргышпаңар. Өг-бүлеге эп-найырал база тайбың чоруктуң турары чүден-даа артык чугула» (Итан).

БИБЛЕЙЖИ ДҮРҮМ: «Силерниң кижи бүрүзү чүгле бодунуң эвес, а өскелерниң эрге-ажыының дугайында сагыш човаар ужурлуг» (Филипчилерге 2:3, 4).