Бурган бүгү чүвени көрүп турар база кажан, каяа, канчаар хөделирин боду шиитпирлээр (Чугаалар 15:3; Еврейлерге 4:13). Ынчалзажок Бурган кайда-даа бар деп, Библия өөретпейн турар. Моон алырга, Бурган хуу-бот. Ооң доктаамал турар чери бар.

•   Бурганның мага-боду кандыг? Бурган — сүлде. Ооң мага-бодун кижилер көрүп шыдавас (Иоанн 4:24; Иоанн 1:18). Библейжи көстүүшкүннерде Бурганны кандыг-бир черге көзүлген кылдыр бижиир. Ынчалза-даа ону кайда-даа бар кылдыр көргүспээн (Исайя 6:1, 2; Ажыдыышкын 4:2, 3, 8).

•   Бурганның турар чери. Бурган кижилер чурттаар черде эвес, а дээрлерде чурттап турар (3 Хааннар 8:30). Библияда Бурганның оолдары (ангелдер) бир-ле хүн «Иегованың a мурнунга чыглып келген» деп бижээн. Моон алырга, Бурганның тускай турар чери бар (Иов 1:6, Чаа делегей).

Бурган чүгле дээрде болганда, меңээ дузалап шыдаар бе?

 Ийе. Бурган кижилерге тоомча чок эвес. Ол дээрде-даа болза, ооң сеткилин өөртүксээр кижилерже кичээнгей салып, оларга дузалажып турар (3 Хааннар 8:39; 2 Чылдар 16:9). Бүгү сеткилинден бердинген улус дээш, Иегова канчаар сагыш човап турарын көрүптээлиңер.

•   Мөргүүрүвүске. Иеговага мөргүүвүске, ол бисти дыңнап турар (2 Чылдар 18:31).

•   Муңгараарывыска. «Иегова чүрээнде аарышкылыг улуска чоок; сагыш-сеткили бастырган улусту камгалап турар» (Ырлар 34:18, Чаа делегей).

•   Чүнү канчаар аайын тыппайн баарывыска. Иегова Библияның дузазы-биле угаап билиишкинге, эскериичел чорукка бисти өөредиринге белен (Ырлар 31:8).

Бурган кайда-даа бар деп шын эвес бодалдар

 Бодал. Бурган кайда-даа бар деп, Ырлар 138:8-те бижээн: «Дээрже үне бээр-даа болзумза, Сен ында сен; алдыы оранга чыдып аар-даа болзумза, Сен база ында сен».

 Факт. Бо шүлүкте Бурганның кайдазын айытпаан. Бурганның чедип шыдавас чери чок база каяа-даа ол биске дузалажып шыдаар деп чеченчидип ырлаан.