Michelle: O Michelle to ˈu iˈoa e to oe?

Sophia: O Sophia to ˈu.

Michelle: Te oaoa nei au i te farerei ia oe. Te pûpû nei au i teie api parau na to oe vahi. Te uihia ra E hinaaro anei oe e ite i te parau mau? Teie ta oe.

Sophia: Ua taaihia anei te reira i te haapaoraa?

Michelle: E. A tapao na e i te api matamua e ono uiraa. Teihea ta oe i ui aˈenei?

Sophia: Ua ite oe, mâuˈa to oe taime ia paraparau mai.

Michelle: No te aha oe e parau ai mai tera?

Sophia: Aita vau i papu e te vai mau ra anei te Atua.

Michelle: Mauruuru no to oe faaiteraa mai i te reira. Tera noa iho â anei ta oe i manaˈo?

Sophia: Aita, na mua ˈˈe e haere na vau i te fare pure. Mea maoro râ teie nei.

Michelle: Aaa! Aita vau i haere mai no te faahepo ia oe ia tiaturi. Tera râ, e hinaaro vau e ite, eaha tei tupu i faaea ˈi oe i te farii e te vai mau ra te Atua?

Sophia: A 17 matahiti aˈenei, ua tupu te tahi ati pereoo i nia i to ˈu mama.

Michelle: Ua pepe o ˈna?

Sophia: E, ua ino roa. Aita faahou ta ˈna e nehenehe e hauti e e haere.

Michelle: Auê te aroha e! Eita e ore e ua peapea roa oe!

Sophia: Ua oti roa vau! Te uiui noa râ ra vau e, ahiri te vai ra te Atua, no te aha o ˈna e vaiiho ai ia tupu tera ati? No te aha te Atua e vaiiho ai ia mauiui tatou mai tera?

Michelle: E hiti mai iho â tera mau uiraa. E hinaaro iho â tatou e ite no te aha i tupu ai te ati? I tahito ra, ua na reira atoa vetahi mau tane e vahine taiva ore i te Atua!

Sophia: Eaha ïa!

Michelle: E. E farii anei oe ia faaite atu vau i te tahi hiˈoraa o te Bibilia?

Sophia: E.

Michelle: A hiˈo na eaha ta te peropheta taiva ore Habakuka i ui i te Atua. Tei roto ïa i te Habakuka 1:2, 3 o te na ô ra: “Te maoro, e Iehova, o ta ˈu tiaororaa, e aore oe i faaroo mai! te maoro o ta ˈu pii-hua-raa ˈtu ia oe, e hamani ino teie e vai nei, e aita oe i faaora! Eaha ra hoi oe i faaite mai ai i te ino?” Ua ui atoa anei oe mai tera?

Sophia: E.

Michelle: Aita te Atua i tamaˈi noa ˈˈe ia Habakuka. Ua parau atu râ ia rahi atu â to ˈna faaroo.

Sophia: Mea anaanatae mau te reira.

Michelle: Te haapii ra te Bibilia e te ite e te tâuˈa ra te Atua i to tatou mau ati.

Sophia: Eaha ta oe e hinaaro ra e parau?

Michelle: A hiˈo na i te faaitehia ra i roto i te Exodo 3:7. E hinaaro anei oe e taio?

Sophia: Na reira ïa. Te na ô ra: “Ua parau maira Iehova, Ua hiˈo papu vau i te pohe o to ˈu ra mau taata i Aiphiti, e ua faaroo vau i to ratou auê i ta ratou mau faaau ohipa; e ua ite hoi au i to ratou oto.”

 Michelle: Mauruuru. Ia au i teie irava, te ite ra anei te Atua i te mau mauiui o to ˈna nunaa?

Sophia: E au ra e e.

Michelle: E aita o ˈna i hiˈo noa i tei tupu. I te pae hopea o te irava, ua parau te Atua: “Ua ite hoi au i to ratou oto.” Tera anei ta te hoê Atua aroha ore e parau?

Sophia: Aita.

Michelle: Mea taa ê ia hiˈo i te tupu ra e ia mauiui a tupu ai te reira.

Sophia: Parau mau.

Michelle: Ma te haamanaˈo i te reira, e taio anaˈe i tei tupu a mauiui ai te nunaa o te Atua. Tei roto ïa i Te mau tavana 10:16. I te pae hopea, te na ô ra: “Aroha ˈtura to ˈna aau i te pohe rahi o Iseraela.” I to oe manaˈo, ua oto anei te Atua a ite ai i te mauiui o to ˈna nunaa?

Sophia: E.

Michelle: Te parau mau, Sophia, te tâuˈa mau maira te Atua. Eita o ˈna e au ia mauiui tatou. Ia oto tatou, e oto atoa o ˈna.

Michelle: Te vai ra te tahi atu manaˈo ta ˈu e hinaaro e faaite atu hou a vaiiho ai ia oe.

Sophia: Ahani na.

Michelle: A hiˈo na i ta te Bibilia e parau ra no nia i te mana o te Atua. E taio mai na oe i te Ieremia 10:12.

Sophia: Te na ô ra: “Na ˈna i hamani i te fenua i to ˈna ra mana, e na ˈna i haamau i te ao atoa nei i to ˈna ra paari, e na ˈna i hohora i te mau raˈi i to ˈna ra ite.”

Michelle: Mauruuru. A feruri na maa taime i te auraa o teie irava. A poiete ai i te ao nui e te mau mea atoa, e puai rahi mau to te Atua, e ere anei?

Sophia: Te reira iho â.

Michelle: E i te mea e e puai rahi to te Atua no te poiete i te mau mea atoa e haaati maira, aita anei to ˈna e mana no te faaore i te ino?

Sophia: Oia.

Michelle: A feruri na i to oe mama. No te aha oe e peapea ˈi ia mauiui o ˈna?

Sophia: No te mea e mama no ˈu, mea here roa iho â na ˈu ia ˈna.

Michelle: Ahani e nehenehe aore ra e mana to oe, e faaora anei oe ia ˈna?

Sophia: Mea papu ïa.

Michelle: Te haapii ra te Bibilia e te tâuˈa maira e te mauiui ra te Atua no tatou. Hau atu â, e puai rahi to ˈna. A feruri na ïa i te Atua e haavî ra ia ˈna ia ore e faaohipa i te reira no te faaore oioi i to tatou mau mauiui.

Sophia: Aita roa vau i feruri aˈenei mai tera.

Michelle: E ere anei i te mea tano ia manaˈo e e tumu ïa te Atua i ore ai i faaore atura i te mauiui? *

Sophia: Peneiaˈe.

Michelle: Te taˈi ra ta oe niuniu, eaha to oe manaˈo e e hoˈi mai au i te tahi atu taime no te pahono i tera uiraa.

Sophia: Na reira ïa, mauruuru. *