I Beresilia, tei roto Ronaldo i te tahi pereoo i û e ua pohe e pae melo o to ’na utuafare, oia atoa to ’na metua vahine e metua tane. Te na ô ra oia, “ua tapeahia vau i te fare ma‘i e piti ava‘e. I muri a‘e noa te parauraahia mai e ua pohe ratou.”

“I te haamataraa, aita vau i farii e ua pohe ratou. Mea nafea ratou pauroa i pohe ai? I to ’u taaraa e parau mau tera, ua mauiui roa vau. Aita vau i oto a‘enei mai tera. I te mau mahana i muri a‘e, ua mana‘o vau i te mea e ua pohe ratou, aita e faufaa ia ora. Tau ava‘e to ’u ta‘i-noa-raa! Ua faahapa vau ia ’u i te vaiihoraa i te tahi atu taata ia faahoro i te pereoo. Ahiri na ’u i faahoro, te ora noa ra paha ïa ratou.”

“Ua tupu te reira a 16 matahiti i teie nei e ua nehenehe au e ora faahou mai ta ’u i matau. Te mihi noa nei râ vau ia ratou e aita â te oto i roto i to ’u aau i ore atura.”

Eiaha e taiâ i te oto i tei pohe. Te parau ra te Bibilia, “e taime to te oto.” (Koheleta 3:1, 4) Te na ô ra Ronaldo: “E hinaaro noa vau e ta‘i i te mau taime atoa e eita vau e tapea ia ’u. Aita e faufaa ia tapea i te roimata, e tamǎrû mai hoi te reira i muri a‘e.” Eita iho â te taata atoa e faaite i to ratou oto ma te hoê â ravea. Ia hi‘ohia to hoho‘a, e au ra e aita oe e oto ra, e ere râ te auraa e ua huna oe i to oe mauiui aore ra ua tano oe i te ta‘iraa.

Eiaha e faataa ê ia oe. (Maseli 18:1) Te na ô ra Ronaldo: “E haavî au ia ’u ia ore ia atea ê i te taata. E haere mai ratou e farerei ia ’u e e farii au ia ratou. E faaite atoa vau i to ’u mau mana‘o horuhoru i ta ’u vahine e to ’u mau hoa piri.”

A faaite noa i te mǎrû ia faahitihia ’tu te parau mauiui mau. Mai te parau atoa, “mea au a‘e mai tera.” Te haamana‘o ra Ronaldo, “ua hinaaro vetahi e tamahanahana ia ’u ma te tahi mau parau, mea ê roa râ to ’u huru i tera taime.” Eiaha e faaea noa i nia i te parau i haamauiui atu, a pee râ i te a‘oraa paari a te Bibilia: “Eiaha oe e haapao i te mau parau atoa i parauhia ra.”—Koheleta 7:21.

A haapii i te parau mau no nia i te tupu ia pohe te taata. Te na ô ra Ronaldo: “I roto i te Koheleta 9:5, te faaite ra te Bibilia e aita te feia pohe e mauiui ra e ua topa to ’u hau i tera mana‘o. Te haapii atoa ra te Bibilia e e tupu te tahi tia-faahou-raa e e faaho‘ihia mai tei pohe i te ora. No ’u, e au e ua reva te feia pohe herehia e au i te tahi atu fenua.”—Ohipa 24:15.

Ua ite anei oe? Te fafau ra te Bibilia e i te hoê mahana na te Atua “e haamou roa i te pohe e a muri noa ’tu.” *—Isaia 25:8.