I TE mau mahana atoa e nehenehe iho â te taata e rave i te tahi mea maitai no te tahi atu. E haapao noa râ te rahiraa ia ratou. Ta tatou ïa e ite nei fatata i te mau vahi atoa. E taviri hanoa te taata i te tahi atu, mea tere ia faahoro i te pereoo, oioi atoa i te tuhi e te iria ia vetahi ê.

Eaha te ite-atoa-hia ra i roto e rave rahi utuafare? E haapao noa vetahi ia ratou. Te taa nei te tahi mau hoa faaipoipo no te mea te manaˈo ra te hoê e mâuˈa noa o ˈna no to ˈna apiti. E faatiatia noa ˈtoa vetahi mau metua i te tamarii e aita e aˈo nei ia ratou. E manaˈo iho â ïa te tamarii ia ratou na mua roa.

Te vai nei râ te mau metua o te haapii nei i ta ratou mau tamarii ia tâuˈa ia vetahi ê na mua. Mea ohie ïa no teie mau tamarii ia faahoa e ia fanaˈo i te taairaa piri e vetahi ê. E mauruuru hanoa ˈtoa ratou. No te aha? Ia au i te Bibilia: “E rahi aˈe te oaoa o tei horoa atu i to tei farii mai.”—Ohipa 20:35, Te Faufaa Api.

Ei metua, ia aha oe ia maitai ta oe mau tamarii? E nafea ia tauturu ratou ia ore e haapao noa ia ratou mai te rahiraa? E hiˈo anaˈe e toru haerea e haapae e e nafea ia na reira.

Te fifi. Ua tapao vetahi feia maimi e mea rahi te taata apî e imi ra i te ohipa ma te manaˈo e e manuïa iho â ratou mai tera noa. No vetahi, e maraa oioi te moni ohipa noa ˈtu e mea maˈua ratou. No te tahi atu, “o vau teie.” Aita ïa ta vera ma e parau. Ia ore râ vera ma e manaˈo mai ia ratou, e hepohepo roa ïa ratou.

Te tumu. Mea faatietie vetahi mau metua i ta ratou mau tamarii. No te aha? Tau matahiti aˈenei, ua parare te manaˈo e mea maitai ia tiaturi roa te tamarii ia ˈna. No reira tera mau metua i manaˈo ai e mea maitai ia haapopou i te tamarii, mea maitai aˈe râ ia faatietie atu. Eiaha ïa te hoê metua e tamaˈi i ta ˈna tamarii no te tahi hape ta ˈna i rave, e toaruaru hoi te tamarii. Ia tamaˈi noa ˈtu oia ia ˈna, e metua ino ïa oia. No reira te mau metua i faaitoitohia ˈi eiaha roa ˈtu e haapeapea i ta ratou mau tamarii.

No reira e rave rahi papa e mama i faatietie noa ˈi i ta ratou mau tamarii noa ˈtu e aita ratou i rave i te tahi mea faahiahia. E tupu roa te tamaaraa no te mau ohipa rii atoa ta te tamarii i rave. Ia hape oia, eita oia e aˈohia. No tera mau metua, ua faatietie anaˈe-hia te tamarii no te maitai ta ˈna i rave ma te ore e haapao i ta ˈna mau hape, e tiaturi rahi ïa o ˈna ia ˈna. Te mea faufaa aˈe no ratou, ia oaoa noa te tamarii. E ere râ te haapiiraa ia rave i te mau mea e oaoa ˈi ratou.

Ta te Bibilia e parau ra. Ia au i te Bibilia mea maitai ia haapopou i te tahi ia tano. (Mataio 25:19-21) Aita anaˈe râ, e hape ïa te manaˈo o te tamarii no nia ia ratou. No reira te Bibilia e parau ai: “Ia manao noa atu te tahi e, e taata rahi oia, ˈe e taata faufaa ore hoi oia, ua vare ïa oia iana iho.” (Galatia 6:3, Te Faufaa Api) Te na ô ra hoi te Bibilia i te mau metua: “Eiaha e haamairi i te aˈo i te tamaiti.” a—Maseli 23:13.

Ta oe e rave. A aˈo i ta oe tamarii ia titauhia e a haapopou atu ia tano. Eiaha e haapopou hanoa ia ratou. Ia au i te hoê buka, e tiaturi te hoê taata ia ˈna ia rahi atu â to ˈna aravihi e to ˈna ite, eiaha râ ia faatietie noa vera ma ia ˈna.—Generation Me.

“Eiaha ia hau te manaˈo ia ˈna iho, i tei au ia ˈna ia manaˈo.”—Roma 12:3

Te fifi. E au ra e aita e rave rahi taata apî i ineine i te faaruru i te fifi ia imi ratou i te ohipa. E maˈeˈe roa vetahi ia faahapa-rii-hia ratou. Area te tahi atu, mea maiti roa ïa i te ohipa. Ia au i te hoê taata papai buka, o Joseph Allen te iˈoa, ua parau te hoê taata apî e eita o ˈna e au i te ohipa mea haumani. E au ra e aita oia i ite e e tuhaa haumani iho â to te mau ohipa atoa. E 23 hoi matahiti to ˈna.—Escaping the Endless Adolescence.

Te tumu. Tau matahiti aˈenei, ua manaˈo e rave rahi metua e mea maitai ia paruru i ta ratou tamarii i te mau fifi rau. Ia fifi ta ratou tamahine i te hoê hiˈopoaraa a te haapiiraa, e farerei ratou i te orometua haapii. Ia papaihia ta ratou tamaiti e te mutoi, na ratou e aufau i te utua. Ia faaruehia ta ratou tamaroa, e faahapehia ïa te potii.

Mea tano iho â ia paruru i te tamarii. Ia paruru-roa-hia râ ratou, e ô mai te manaˈo e aita e faufaa ia amo i te hopoia no ta ratou e rave. Ia au i te hoê buka, ia ore ratou e haapii i te faaoromai i te mauiui e te inoino e ia ore e huti mai i te haapiiraa, e paari mai ïa teie mau tamarii ma te manaˈo noa ia ratou. E ma te tiaturi i te metua e ia vetahi ê ia noaa mai ta ratou e hinaaro.—Positive Discipline for Teenagers.

Ta te Bibilia e parau ra. Te faaite ra te Koheleta 9:11 e e fifi iho â tatou paatoa, te feia maitai atoa. Ei hiˈoraa ua faaruru te aposetolo Paulo e rave rahi fifi i te roaraa o ta ˈna taviniraa. Ua huti mai râ oia i te haapiiraa. Ua papai oia: “Ua ite hoi au i te faaoromaˈi i te mau mea atoa . . . Ua haamātauhia vau i te ora ma te paia ˈe ma te poia, ma te navai ˈe ma te navai ore.”—Philipi 4:11, 12, Te Faufaa Api.

Ta oe e rave. Ia au i te Galatia 6:5, na te taata iho e amo i ta ˈna hopoia. A tutava i te pee i teie aratairaa Bibilia ia au i te faito matahiti o te tamarii. Ia papaihia ta oe tamaiti e te mutoi, mea maitai aˈe e na ˈna iho e aufau i te utua i ta ˈna moni. Ia fifi ta oe tamahine i te hoê hiˈopoaraa a te haapiiraa, e nehenehe te reira e haaferuri ia ˈna a faaineine maitai atu ai no to mua ˈtu hiˈopoaraa. Ia faaruehia ta oe tamaroa e te hoê potii, a tamahanahana ˈtu. E i te taime tano, a tauturu ia ˈna ia feruri i teie uiraa, ‘Te vai ra anei te tahi mea ta ˈu e nehenehe e haamaitai?’ Ia faaruru te mau tamarii i to ratou mau fifi, e haapii ratou eaha te rave, a tiaturi atu ai ratou ia ratou. Mai te peu e e paruru roa ino te metua ia ratou, eita te tamarii e ite e nafea.

“E hiˈopoa maite na râ te taata atoa i ta ˈna ihora ohipa, e riro tana oaoaraa ia ˈna iho i reira.”—Galatia 6:4

Te fifi. I te uiuiraahia vetahi feia apî, e 81 i nia i te hanere tei parau e ta ratou fa matamua “ia monihia ïa ratou.” To muri roa te tautururaa ia vetahi ê. Eita râ te tutavaraa ia onahia e faaoaoa. Ia au i te tahi mau maimiraa, e hepohepo roa te taata ia tapi i te mau taoˈa materia. Mea rahi te maˈihia e te ino te feruriraa.

Te tumu. Ua paari mai vetahi tamarii i roto i te mau utuafare nounou taoˈa. Ia au i te hoê buka, te hinaaro nei te mau metua ia oaoa ta ratou tamarii. E taihaa râ ta ˈna e hinaaro. E hoo mai ïa te metua i te reira. E oaoa râ te tamarii maa taime noa. E titau mai â o ˈna i te tahi atu taihaa.—The Narcissism Epidemic.

No te mau poroi faatianiani e hiaai noa ˈi te taata e hoo mai. “Mea maitai aˈe tera no oe” e “Tano maitai tera no oe.” Ua vare e rave rahi taata apî i tera mau poroi. I teie nei, mea rahi ta ratou tarahu eita e pee ia aufau.

Ta te Bibilia e parau ra. Te faaite ra te Koheleta 7:12 e e hinaaro iho â tatou i te moni. Te faaara atoa maira râ te Bibilia e ‘o te nounou moni te tumu o te mau ino atoa, i te titau-noa-raa i te reira ua patiatia pupu roa te tahi pae ia ratou iho i te oto e rave rahi.’ (Timoteo 1, 6:10) Eiaha ïa tatou e tapi i te mau mea materia, ia mauruuru râ i tei hinaaro-mau-hia. Ta te Bibilia ïa e faaitoito maira.—Timoteo 1, 6:7, 8.

“Area te feia e mârô e ia rahi te taoˈa, e roohia ïa i te ati, e te marei, e te nounou maamaa e rave rahi, e ino ai te taata.”—Timoteo 1, 6:9

Ta oe e rave. Ei metua, a feruri eaha to oe manaˈo i te moni e te mau mea ta oe e hoo mai. A tapi i te mea faufaa aˈe no oe e a haapii i ta oe mau tamarii ia na reira ˈtoa. Ia au i te hoê buka, e nehenehe te metua e haaferuri i ta ˈna tamarii ia hoo mai i te tahi mea i te tau hoo-mâmâ-raa. Ia uiui te tamarii e tera mau anei ta ratou e hinaaro aore ra eita. Aore ra mea mâmâ iho â anei tera mea. E no te aha ratou i hoo mai ai i te reira. Peneiaˈe na vera i parau atu.—The Narcissism Epidemic.

Eiaha roa e hoo mai i te tahi “taihaa” no te haamoe i te hoê fifi utuafare e titauhia ia faaafaro. Ia au i te hoê buka, e ere i te hooraa mai i te tiaa e te pute e afaro ai te fifi. Mea maitai râ ia manaˈo, ia feruri maite e ia taa i to vetahi ê huru.—The Price of Privilege.