Te faahiti ra te mau evanelia i te hoê taata, o Ioane Bapetizo to ˈna iˈoa. Ua poro o ˈna i Iudea no nia i te Faatereraa arii a te Atua. Te turu ra anei te mau taata tuatapapa i ta te Bibilia e faaite ra no nia i taua taata ra? A tapao na.

•   Te na ô ra te Bibilia: “Haere maira Ioane Bapetizo e poro i te medebara no Iudea, a parau ai: ‘A tatarahapa, ua fatata mai hoi te Faatereraa arii o te raˈi.’” (Mataio 3:1, 2) Te haapapu ra anei te mau papairaa a te ao i teie faahitiraa? E.

   Ua faahiti o Flavius Josèphe, te hoê taata tuatapapa o te senekele matamua, i te tahi taata o “Ioane Bapetizo” to ˈna iˈoa, tei faaitoito i te ati Iuda ia rave i te mau ohipa parau-tia, ia haamori i te Atua anaˈe e ia bapetizohia ratou.—Antiquités Judaïques, buka XVIII.

•   Te faataa ra te Bibilia e ua faahapa Ioane ia Heroda Anitipa, tei faatere i te mau mataeinaa no Galilea e no Perea. Ua faahua parau o Heroda e ati Iuda o ˈna tei auraro i te ture a Mose. Ua faahapa râ Ioane ia Heroda no te mea ua faaipoipo o ˈna ia Herodia, te vahine a to ˈna taeae. (Mareko 6:18) Te haapapu atoa ra te mau papairaa a te ao i teie mau haamaramaramaraa itehia i roto i te Bibilia.

   Ua parau te taata tuatapapa o Josèphe e ua maamaa roa Anitipa ia Herodia e ma te haama ore, ua ani roa o ˈna ia ˈna ia faaipoipo raua. Ua farii Herodia i ta ˈna aniraa e ua faarue o ˈna i ta ˈna tane a faaipoipo atu ai ia Anitipa.

•   Te faaite ra te Bibilia e ua “haere maira to Ierusalema ia [Ioane] ra, to Iudea taatoa e to te tuhaa fenua taatoa ati aˈe Ioridana, e bapetizohia aˈera ratou e ana i roto i te anavai Ioridana.”—Mataio 3:5, 6.

   Ua turu o Josèphe i taua faahitiraa ra. Ua papai hoi o ˈna e ua haere te nahoa e farerei ia Ioane e ua putapû roa to ratou aau a faaroo ai i ta ˈna i haapii atu.

 Ua tiaturi papu o Josèphe, te taata tuatapapa o te senekele matamua, e ua ora mau o Ioane Bapetizo. E nehenehe atoa tatou e tiaturi papu i te reira.