No Tonga mai to ˈu utuafare. E fenua teie e 170 tiahapa motu, i te pae apatoa tooa o te râ i Patitifa. Mea ohie te oraraa i Tonga, aita e uira, aita atoa e pereoo. I to matou râ fare, te vai ra te pape e maa moa. I te taime faaearaa haapiiraa, e tauturu vau e to ˈu na taeae i to matou metua tane ia haapao i te faaapu o te utuafare, i reira i tanuhia ˈi te meia, te tarua, te taro e te maniota. E faufaa hau te reira i te moni iti ta to ˈu metua tane i fanaˈo i te ohipa. Mai e rave rahi hoa e ora ra i te mau motu no Patitifa, mea faatura roa to ˈu utuafare i te Bibilia e ua haere tamau matou i te pureraa. Noa ˈtu râ, ua tiaturi matou e te ravea hoê no te fanaˈo i te oraraa maitai, o te haereraa e ora i te hoê fenua taoˈa rahi aˈe.

 I te 16raa o to ˈu matahiti, ua rave te taeae o to ˈu metua vahine i te mau faanahoraa ia haere to ˈu utuafare e ora i Kalifornia, i Hau Amui no Marite. Mea fifi roa ia farii i te hoê taˈere ê! Noa ˈtu ua rahi mai ta matou moni, ua ora matou i te hoê vahi veve, mea rahi te ohipa ino e te raau taero. Pinepine matou i te faarooraa i te paainaraa o te puhipuhi i te po. Ua riaria te rahiraa o te feia tapiri i te mau pǔpǔ taata rave ino. E rave rahi o te rave i te puhipuhi no te paruru ia ratou aore ra no te faaafaro i te mau tatamaˈiraa. Ua puhipuhihia vau no teie mau tatamaˈiraa e te vai noa ra te hoê ofai puhipuhi i roto i to ˈu ouma.

 I te haapiiraa teitei, ua hinaaro vau e rave mai te feia apî i haaati ia ˈu. Ua amui atu â vau i roto i te mau arearearaa haairiiri, te inu-hua-raa i te ava, te hamani-ino-raa e te faaohiparaa i te raau taero. Ua matau atura vau i te rave i te raau taero paari mau, parauhia cocaïne. No te hoo mai i te reira, ua haamata vau i te eiâ. Noa ˈtu mea haere roa to ˈu utuafare i te pureraa, aita roa ˈtu vau i fanaˈo i te aratairaa o te tauturu mai ia patoi i te mau aniraa ia rave i te ohipa ino. E rave rahi taime i tapeahia vau no ta ˈu mau ohipa ino. Ua ino roa to ˈu oraraa e aita vau i ite eaha te rave. I te pae hopea, ua mau vau i te fare tapearaa.

 I te hoê mahana i 1997, i te fare tapearaa, ua ite te tahi atu taata tapeahia e e Bibilia ta ˈu. E tau oroa Noela i taua taime ra, te hoê taime moˈa roa no te rahiraa o to Tonga. Ua ani mai oia ua ite anei au eaha ta te Bibilia e parau ra no nia i te fanauraa o te Mesia. Aita roa ˈtu vau i ite i te pahonoraa. Ua faaite mai oia i te hoê faatiaraa Bibilia no nia i te fanauraa o Iesu e ua taa ia ˈu aita te mau tapao o te oroa Noela i faahitihia i roto i te Bibilia. (Mataio 2:1-12; Luka 2:5-14) Ua maere roa vau e ua manaˈo vau eaha ˈtu â ta te Bibilia e parau ra. I haere tamau na taua taata ra i te mau putuputuraa a te mau Ite no Iehova i te hebedoma taitahi faatupuhia i te fare tapearaa. Faaoti atura vau i te apiti ia ˈna. Ua tauaparau ratou no nia i te buka Bibilia o te Apokalupo. Noa ˈtu aita vau i taa roa ˈtu i ta ratou i parau, ua taa râ ia ˈu e pauroa tei haapiihia, no ǒ mai ïa i te Bibilia.

 Ua pûpû mai te mau Ite no Iehova i te hoê haapiiraa Bibilia e ua farii au ma te oaoa. No te taime matamua, ua haapii mai au no nia i te parau fafau Bibilia o te paradaiso a muri aˈe i nia i te fenua. (Isaia 35:5-8) Mea papu roa ia ˈu e no te faaoaoa i te Atua, e titauhia ia ˈu ia rave i te mau tauiraa rahi i roto i to ˈu oraraa. Ua taa ia ˈu aita te Atua ra o Iehova e farii ia ˈu i roto i te ao apî mai te peu e tamau vau i te rave i ta ˈu mau peu ino. (Korinetia 1, 6:9, 10) Ua faaoti atura vau i te haavî i to ˈu huru ino, i te faaea i te puhipuhi i te avaava e i te ore roa ˈtu e inu hua i te ava e i te rave i te raau taero.

 I 1999, hou a faaoti ai au i to ˈu tau faautuaraa, ua faahaerehia vau i te tahi atu fare tapearaa. Hau atu i te hoê matahiti i te maoro, aita vau i amui aˈe e te mau Ite no Iehova. Ua faaoti papu râ vau i te rave â i te mau tauiraa i roto i to ˈu oraraa. I 2000, ua patoi te faatereraa ia faaea vau i te Hau Amui no Marite e ua faahoˈihia vau i Tonga.

 I Tonga, ua imi au i te mau Ite no Iehova e ua rave-faahou-hia ta ˈu haapiiraa Bibilia. Ua au roa vau i ta ˈu i haapii mai. Ua maere roa vau i te iteraa e e niu te mau Ite no Iehova i Tonga i ta ratou haapiiraa i nia i te Bibilia mai te mau Ite no Iehova i Marite i rave.

 Mea tuiroo to ˈu metua tane i roto i te oire no te mea e tiaraa teitei to ˈna i roto i ta ˈna haapaoraa. No reira i te omuaraa, ua riri to ˈu utuafare i to ˈu apitiraa i te mau Ite no Iehova. I muri iho râ, ua oaoa to ˈu na metua i te iteraa e maoti te mau aratairaa Bibilia, ua faaea vau i te ohipa ino e ua maitai mai to ˈu oraraa.

 Hoê o te mau tauiraa fifi roa ˈˈe tei titauhia ia rave, o te faaohipa-hua-raa i te hoê inuraa matauhia i roto i to ˈu taˈere. I te hebedoma taitahi, e inu te mau tane i Tonga e rave rahi hora i te kava, te hoê inuraa tamǎrû hamanihia e te aˈa o te raau tanu no te pepa. I to ˈu hoˈiraa ˈtu i Tonga, ua matau vau i te haere i te hoê vahi inuraa kava fatata i te mau po atoa e i te inu i te kava tae roa ˈtu i te taime ua moˈe roa te hiroˈa. Te fifi, o ta ˈu amuimuiraa e te mau hoa o te ore e pee ra i te mau ture aveia Bibilia. I te pae hopea, ua tauturuhia vau ia taui i ta ˈu mau peu o te haamauiui ra i te Atua. Ua rave au i te mau tauiraa ia nehenehe au e fanaˈo i te haamaitairaa e te farii maitai a te Atua.

 Ua haamata vau i te haere i te mau putuputuraa atoa a te mau Ite no Iehova. Maoti te amuimuiraa e te feia e tutava ra i te faaoaoa i te Atua, ua nehenehe au e patoi i te mau tamataraa. I 2002, ua bapetizohia vau ei Ite no Iehova.

 Ua fanaˈo vau i te faaoromai o te Atua, mai tei faahitihia i roto i te Bibilia: “Mea faaoromai râ [Iehova] ia outou, no te mea aita oia e hinaaro ra ia haamouhia te hoê, te hinaaro nei râ ia noaa i te taata atoa te tatarahapa.” (Petero 2, 3:9) Papu maitai ua nehenehe o ˈna e haamou i teie ao ino mau i na mua ˈtu, ua tiai râ o ˈna i te taime tano ia faatupu atoa te mau taata mai ia ˈu i te auhoaraa e o ˈna. Ua oaoa vau i te manaˈo e te faaohipa ra paha o ˈna ia ˈu no te tauturu ia vetahi ê ia na reira.

 Maoti ta Iehova tauturu, ua faaea vau i te tuino i to ˈu oraraa. Aita vau e eiâ faahou ia vetahi ê no te haamâha i te hoê hinaaro tano ore. Te tutava nei râ vau i te tauturu i to ˈu taata tupu ia riro atoa ei hoa no Iehova. Ma te amuimui i te mau Ite no Iehova, ua farerei au i ta ˈu vahine here o Tea to ˈna iˈoa. E utuafare oaoa ta maua e ta maua tamaroa. Te haapii atu nei matou ia vetahi ê eaha ta te Bibilia e parau ra no nia i te ora mure ore a muri aˈe i roto i te paradaiso î i te hau.