Ua hinaaro te hoê metua vahine faaea taa noa, o Desicar to ˈna iˈoa, e poro atu â ma te riro ei pionie tamau. Te ora nei oia i Vénézuéla, te hoê fenua mea rahi te fifi i te pae moni. Ua faaoti papu râ o ˈna e rave i te taviniraa pionie e ua na reira iho â o ˈna. Ua oaoa roa o ˈna. Tupu maira râ te maˈi pee COVID-19.

 I te haamataraa o te maˈi pee COVID-19, ua faaruru o Desicar e rave rahi fifi no te faatano i ta ˈna taviniraa i teie huru tupuraa apî. Mea fifi no ˈna ia papai i te mau rata. Aita atoa oia i nehenehe e faaohipa i te natirara, no te mea mea moni roa te reira i to ˈna vahi. Ua parau o ˈna: “Ua paruparu roa vau. Aita vau i nehenehe e poro mai ta ˈu i matau. Ua manaˈo vau e e ere au i te hoê pionie tamau aravihi.”

 I Tenuare 2021, ua faanaho te amaa a te mau Ite no Iehova no Vénézuéla i te hoê pororaa taa ê. Ua ravehia te mau faanahoraa no te faaohipa e 60 radio e e 7 reni afata teata no te haapuroro i te tahi mau oreroraa parau Bibilia i te roaraa o na 5 hopea hebedoma o te avaˈe. Ua faaitoitohia te mau Ite no Iehova ia titau manihini i te mau taata ia mataitai e ia faaroo atu i te reira. Ua faaineine atoa te amaa i te tahi mau uiraa e irava niuhia i nia i te oreroraa parau tataitahi. Ua nehenehe te mau taeae e tuahine e faaohipa i te reira i roto i ta ratou mau rata e ta ratou mau aparauraa na roto i te niuniu afaifai. Hau atu, ua haafaufaa te amaa i te faaohiparaa i te mau poroi maoti te mau niuniu afaifai i roto i te taviniraa, te hoê ïa ravea pororaa apî no e rave rahi Ite no Iehova i Vénézuéla.

 Ua oaoa o Desicar i te apiti i teie pororaa taa ê. Noa ˈtu aita o ˈna i faaohipa aˈenei i te mau poroi i roto i te taviniraa, ua faaoti o ˈna i te tamata ˈtu. Tera râ, ua hinaaro o ˈna i te tauturu. Teie ta Desicar i parau: “E ere au i te mea aravihi e teie mau ravea apî.” Ua ani o ˈna i ta ˈna tamahine ia haapii atu ia ˈna. E oioi o ˈna i te haapii a ineine atu ai i te apiti i tera taviniraa taa ê.

 Ma te faaohipa i te niuniu afaifai, ua titau manihini o Desicar e rave rahi taata matauhia e ana ia faaroo i te mau oreroraa parau haruharu-aˈena-hia. Ua oaoa roa o ˈna no te mea e rave rahi tei faaroo i te mau oreroraa parau e o tei tuu i te mau uiraa. No te mau taata o tei ore i nehenehe e faaroo, ua ani ratou ia Desicar eaha te manaˈo horoahia i roto i tera mau oreroraa parau. Teie ta Desicar i parau: “Ua faaineine au i te hoê haapotoraa o ta ˈu mau nota e ua hapono atu vau i te reira. Pauroa i te avaˈe, aita vau e rave hau atu i te 5 farerei-faahou-raa. I te hopea râ o te pororaa taa ê, e 112 ïa farerei-faahou-raa ta ˈu!” a

 E tuahine ta Desicar, e ere o ˈna i te Ite no Iehova e te ora ra o ˈna i pihai iho ia ˈna. Ua titau manihini o Desicar ia ˈna no te faaroo i te mau oreroraa parau na roto i te radio. Teie ta Desicar i parau: “Maere roa vau e ua farii ta ˈu tuahine i ta ˈu titau-manihini-raa. Pauroa te Tapati i te hora 8 i te poipoi, e haere au i to ˈna fare e e faaroo mâua i te reira. I te roaraa o te porotarama e ia hope te reira, mea rahi ta ˈna mau uiraa.” Ua putuputu atoa mai te tuahine a Desicar i te Oroa haamanaˈoraa i te pohe o Iesu na roto i te natirara e ua farii o ˈna ia faaohipa Desicar i ta ˈna natirara no te pororaa.

 Te na ô ra o Desicar: “Te haamauruuru nei au ia Iehova. Oia atoa i te mau matahiapo o ta ˈu amuiraa no ta ratou mau faaitoitoraa. Ua tauturu mai ratou ia oaoa faahou vau i roto i ta ˈu taviniraa.” (Ieremia 15:16) E pionie tamau noa â o Desicar e te haapii noa ra o ˈna i te mau pue parau mau Bibilia i te feia anaanatae ta ˈna i matau maoti te mau poroi haponohia.