Tei te mau vahi atoa anei te Atua?

FAAROO NA ROTO TE REO

Te pahonoraa a te Bibilia

E nehenehe te Atua e ite i te mau mea atoa e e ohipa i te mau vahi atoa ta ˈna e hinaaro. (Maseli 15:3; Hebera 4:13) Tera râ, aita te Bibilia e haapii ra e tei te mau vahi atoa te Atua e tei roto i te mau mea atoa. Te faaite nei râ te Bibilia e e nohoraa taa maitai to te Atua.

Te huru o te Atua: E varua te Atua. (Ioane 4:24) Eita te taata e nehenehe e ite ia ˈna. (Ioane 1:18) I roto i te mau orama ta te Bibilia e faatia ra, ua ite-noa-hia te Atua i te hoê vahi taa maitai. Aita te hoê irava e parau ra tei te mau vahi atoa oia.—Isaia 6:1, 2; Apokalupo 4:2, 3, 8.
Te nohoraa o te Atua: Te parau ra te Bibilia e te parahi ra te Atua “i te raˈi.” (Te mau arii 1, 8:30) Te auraa, aita te Atua e ora ra i nia i te fenua aore ra i roto i te ao nui, i roto râ i te ao varua. Te faatia ra te Bibilia e i te hoê taime, ua “haere mai te mau tamarii a te Atua e faaite ia ratou iho i te aro o Iehova,” a tapao ïa e e nohoraa taa maitai to te Atua.—Ioba 1:6.

Mai te peu aita te Atua i te mau vahi atoa, e nehenehe anei oia e haapao mai ia ˈu iho?

E. Mea haapao roa na te Atua te taata atoa. Noa ˈtu tei te ao varua to ˈna nohoraa, te ite ra te Atua i te feia i nia i te fenua e hinaaro mau ra e faaoaoa ia ˈna, e e hamani maitai oia ia ratou. (Te mau arii 1, 8:39; Paraleipomeno 2, 16:9) Teie te tahi mau ravea e haapao ai Iehova i te feia e haamori ra ia ˈna ma te haavare ore:

Ia pure oe: E nehenehe Iehova e faaroo ia oe i te taime oe e pure ai ia ˈna.—Ioba 13:18.
Ia ahoaho oe: “Te fatata nei Iehova i te feia aau paruparu ra; e te faaora nei oia i te taata aau taiâ.”—Salamo 34:18.
Ia hinaaro oe i te aratairaa: “E haapii atu [Iehova] ia oe, e . . . e aˈo atu [oia] ia oe” na roto i ta ˈna Parau, te Bibilia.—Salamo 32:8.

Manaˈo hape e tei te mau vahi atoa te Atua

Manaˈo hape: Tei roto te Atua i te mau mea atoa ta ˈna i poiete.

Tupuraa mau: Aita te Atua e noho ra i nia i te fenua aore ra i roto i te ao nui. (Te mau arii 1, 8:27) Parau mau, te faaite nei te mau fetia e te tahi atu mau mea poietehia “i te hanahana o te Atua!” (Salamo 19:1) Tera râ, aita te Atua e noho ra i roto i te mau mea ta ˈna i poiete, mai te taata peni aita e noho ra i roto i te mau mea ta ˈna i peni. E taa noa râ ia tatou te huru o te taata peni na roto i te mau mea ta ˈna i peni. Oia atoa, e taa ia tatou “te mau huru maitatai” o te Atua poiete, mai to ˈna puai, to ˈna paari e to ˈna here, na roto i te ao ite-mata-hia e te taata.—Roma 1:20.

Manaˈo hape: Tei te mau vahi atoa te Atua no te ite i te mau mea atoa e ia puai mai oia.

Tupuraa mau: Te varua o te Atua, o to ˈna ïa puai ohipa. Maoti to ˈna varua moˈa, e nehenehe te Atua e ite e e rave i te mau mea atoa, i te mau vahi atoa, i te mau taime atoa ma te ore e tia i taua vahi ra.—Salamo 139:7.

Manaˈo hape: Te haapii ra te Salamo 139:8 e tei te mau vahi atoa te Atua, te na ô ra hoi: “Ia paiuma vau i nia te mau raˈi ra, tei reira oe! ia hohora vau i tau roi i hade, inaha, tei reira atoa oe!”

Tupuraa mau: Aita teie irava e faaite ra i te vahi e tia ˈi te Atua. E parau pehepehe râ teie e faaite mai ra e aita e vahi atea roa ˈˈe no te Atua no te hamani maitai mai ia tatou.

a O Iehova te iˈoa o te Atua i roto i te Bibilia.