Ia au i te buka hopea o te Bibilia, e numera te 666, aore ra e iˈoa, no te puaa taehae e hitu afii e e ahuru tara o te haere mai ra mai roto mai i te miti. (Apokalupo 13:1, 17, 18) Teie puaa taehae, e taipe ïa no te faanahoraa poritita o teie nei ao. Te faatere ra oia “i te mau opu e reo e nunaa atoa.” (Apokalupo 13:7) Te faaite mai ra te numera 666 e aita tera faanahoraa poritita i manuïa i te aro o te Atua. Na te aha e haapapu mai ra i te reira?

  E ere noa i te hoê iˈoa. E auraa to te mau iˈoa ta te Atua e horoa. Ei hiˈoraa, ua horoa te Atua ia Aberama (“Metua teitei [faateiteihia]” te auraa), i te iˈoa Aberahama (“Metua o te hoê nahoa [o e rave rahi]” te auraa). (Genese 17:5) Mai te puaa taehae atoa, ua horoa te Atua i te iˈoa 666 ia au i to ˈna huru.

  Mea hapa te numera ono. Pinepine i roto i te Bibilia, e auraa taipe to te mau numera. Ei hiˈoraa, no te mea tia roa te numera hitu. E nehenehe e ravehia te numera ono (hitu ua tatarahia hoê) no te hoê ohipa e ere i te mea tia aore ra mea hapa i te aro o te Atua. E parau-atoa-hia te numera ono no te mau enemi o te Atua.—Paraleipomeno 1, 20:6; Daniela 3:1.

  E toru taime no te haapapu maitai. E haapapu te Bibilia i te tahi taime i te hoê manaˈo ma te faahiti i te reira e toru taime. (Apokalupo 4:8; 8:13) Te haapapu mai ra ïa te iˈoa 666 e aita roa ˈtu te mau faatereraa a te taata i manuïa i te aro o te Atua. Aita i haere ia ratou ia haamau papu i te hau e te ati ore. O te Faatereraa arii a te Atua anaˈe te hopoi mai i te reira.

Te tapao o te puaa taehae

 Te parau ra te Bibilia e te vai ra te taata o “tei tapaohia i te tapao o te puaa taehae,” no te mea ua “faahiahia” roa ratou ia ˈna, ua pee atu ia ˈna e ua tae roa i te haamori ia ˈna. (Apokalupo 13:3, 4; 16:2) E faahanahana ratou i to ratou fenua, i ta ratou mau pihi aiˈa e ta ratou mau nuu faehau. E nehenehe ïa e parau e haamoriraa tera. Teie tei papaihia i roto i te buka The Encyclopedia of Religion: “Ua riro te here aiˈa ei huru haapaoraa i teie mahana.”

 Eaha te auraa ia tapaohia te hoê taata i nia i te rima atau e te rae i te tapao o te puaa taehae? (Apokalupo 13:16) Ua parau te Atua no te mau faaueraa ta ˈna i horoa i te nunaa Iseraela: “E taamu hoi i nia iho i to outou rima ei tapao; e ia riro hoi mai te haamanaˈoraa i mua mau i to outou na mata.” (Deuteronomi 11:18) E ere te auraa e papai te mau Iseraela i te reira i nia i to ratou rima e to ratou rae, ia vaiiho râ i te Parau a te Atua ia ohipa i nia i ta ratou mau haaraa e to ratou mau manaˈo. E ere atoa ïa te tapao o te puaa taehae i te tapao mau, mai te tǎtau o te numera 666, e tapao taipe râ te reira o te faaite ra o vai ma te vaiiho ra i te faanahoraa poritita ia ohipa i roto i to ratou oraraa. Te feia i tapaohia i te tapao o te puaa taehae e enemi ïa no te Atua.—Apokalupo 14:9, 10; 19:19-21.