MATAUPU 03
E Talitonu Koe ki te Tusi Tapu?
E maua i te Tusi Tapu a folafolaga mo manatu fesoasoani e uke. Kāti ko fia iloa ne koe a mea e akoako mai i ei kae kāti ko fakaeteete foki koe. E a, e ‵tau o talitonu koe ki folafolaga mo manatu aoga mai i se tusi telā ko leva ‵ki? E a, e mafai eiloa o talitonu koe ki pati i te Tusi Tapu e uiga ki se olaga ‵lei i aso nei kae penā foki i aso mai mua? Ne tali‵tonu eiloa ki ei te fia miliona o tino. Ke onoono aka tatou me e mafai foki koe o talitonu ki ei.
1. E mata, a tala i te Tusi Tapu ne tala ‵tonu?
E fai mai te Tusi Tapu me e maua i ei a “pati ‵tonu o te munatonu.” (Failauga 12:10) E fakamatala mai i ei a mea ‵tonu ne ‵tupu kolā ne aofia i ei a tino ‵tonu. (Faitau te Luka 1:3; 3:1, 2.) Ko oti ne fakamaoni mai ne tino tusitala mo tino suke‵suke ki mea mua a te ‵tonu o taimi ne ‵tupu ei a mea, tino, koga mo mea ‵tupu kolā ne fakaasi mai i te Tusi Tapu.
2. Kaia e mafai o fai atu tatou me koi aoga eiloa te Tusi Tapu?
Ne masani o taku mai i te Tusi Tapu a mea kolā e seki iloa atu i te taimi ne tusi ei. E tasi mai i ei, ko mataupu fakasaienitisi. E uke a vaegā mea penā ne seki tali‵tonu ki ei a tino e tokouke i te taimi ne tusi ei. Kae ko oti ne fakamaoni mai ne poto fakasaienisi ‵fou a te ‵tonu o pati i te Tusi Tapu. E “fakatalitonugina faeloa a mea konā i te taimi nei ke oko eiloa ki te se-gata-mai.”—Salamo 111:8.
3. Kaia e ‵tau ei o tali‵tonu tatou ki pati i te Tusi Tapu e uiga ki aso mai mua?
E aofia i te Tusi Tapu a valoaga * kolā ne ‵valo mai i ei a “mea kolā e seki fai.” (Isaia 46:10) Ne ‵valo tonu mai i ei a mea e uke kolā ne fakataunu kae seki tāitāi o ‵tupu. E maua foki i ei a fakamatalaga e uke ki mea e ‵tau o ‵tupu i te lalolagi i aso nei. I te mataupu tenei, ka iloilo aka ne tatou a nisi valoaga i te Tusi Tapu. E fakaofoofogia ‵ki a te ‵tonu o valoaga konā!
KELI MALOSI IFO
Iloilo a te auala e fetaui ei a poto ‵fou fakasaienisi mo te Tusi Tapu kae sukesuke ki nai valoaga fakaofoofogia i ei.
4. E ‵pau a akoakoga fakasaienisi mo te Tusi Tapu
I aso mua, ne tali‵tonu a te tokoukega o tino me e tu te lalolagi i luga i se mea. Pei te VITIO.
Onoono la ki pati kolā kāti ne tusi i se 3,500 tausaga ko ‵teka i te tusi o Iopu. Faitau te Iopu 26:7, ko sau‵tala ei ki te fesili tenei:
-
Kaia e fakapoi ei te fakamatalaga me e “seai se mea fakatautau ei te lalolagi”?
Ne fatoa iloa atu ne tino a te tamilosaga o te vai i tausaga talu mai te 1800. Kae mafaufau la ki pati kolā ne tusi i te fia afe o tausaga ko ‵teka i te Tusi Tapu. Faitau te Iopu 36:27, 28, ko sau‵tala ei ki fesili konei:
-
Se a tau faka‵tau ki te fakamatalaga i te Tusi Tapu e uiga ki te tamilosaga o te vai?
-
Mai tau faitauga ki tusi fai‵tau konā, e mata, ne fakamalosi aka ei tou loto talitonu ki te Tusi Tapu?
5. Ne ‵valo mai i te Tusi Tapu a mea tāua kolā ne ‵tupu
Faitau te Isaia 44:27–45:2, ko sau‵tala ei ki te fesili tenei:
-
Ne a fakamatalaga likiliki ne ‵valo mai i te Tusi Tapu i se 200 tausaga mai mua o fakatakavale a Papelonia?
Ne fakamaoni mai ne tala mua me ne fakatakavale ne Kulesa, te tupu o Pelesia, mo tena kautau a te fa‵kai o Papelonia i te 539 T.L.M. * Ne faka‵tafe ne latou a te vaitafe telā ne puipui ei te fa‵kai. I te taimi ne ulu atu ei latou i mataloa kolā ne ma‵tala mai fua, ne puke ne latou te fa‵kai e aunoa mo se taua. I aso nei, i se 2,500 tausaga mai tua ifo, koi masei eiloa te fa‵kai o Papelonia. Onoono la ki mea ne ‵valo mai i te Tusi Tapu.
Faitau te Isaia 13:19, 20, ko sau‵tala ei ki te fesili tenei:
-
E fakamaoni mai pefea ne mea ‵tupu ki Papelonia a te fakataunuga o te valoaga tenei?
Fakamaseiga o Papelonia i Iraq i aso nei
6. Ne ‵valo mai i te Tusi Tapu a mea e lavea ne tatou i aso nei
E fakaasi mai i te Tusi Tapu me i aso konei ko “aso fakaoti.” (2 Timoteo 3:1) Onoono la ki mea ne ‵valo mai i te Tusi Tapu e uiga ki ‵tou aso nei:
Faitau te Mataio 24:6, 7, ko sau‵tala ei ki te fesili tenei:
-
Ne a mea ‵tupu fakaofoofogia ne fai mai te Tusi Tapu me ka lavea atu i aso fakaoti konei?
Faitau te 2 Timoteo 3:1-5, ko sau‵tala ei ki fesili konei:
-
Ne a uiga masani o tino i aso fakaoti kolā ne fakamatala mai i te Tusi Tapu?
-
Ne a nisi uiga o tino ko oti ne lavea ne koe?
MEA E FAI MAI NE NISI TINO: “A te Tusi Tapu se tusi o tala ‵kai.”
-
I tau kilokiloga eiloa, se a te ‵toe fakamaoniga sili me i te Tusi Tapu e fakatalitonugina?
MANATU AOGA
E fakaasi mai i tala mua, poto fakasaienisi, mo valoaga me e mafai o talitonu koe ki te Tusi Tapu.
Fesili
-
E mata, e ‵tonu a tala i te Tusi Tapu?
-
Ne a nisi akoakoga fakasaienisi e ‵pau mo te Tusi Tapu?
-
Se a tau faka‵tau, e mata, e ‵valo mai i te Tusi Tapu a mea ka ‵tupu i aso mai mua? Kaia e fai mai ei koe penā?
NISI FAKAMATALAGA
E mata, e isi ne poto fakasaienitisi kolā e se ‵pau mo te Tusi Tapu?
“E Mata, e ‵Pau Akoakoga Fakasaienisi mo te Tusi Tapu?” (Mataupu i te neti)
Ne a fakamatalaga ‵tonu e uiga ki “aso fakaoti”?
Tauloto ki te fakataunuga o valoaga i te Tusi Tapu e uiga ki te Emupaea o Eleni.
Onoono ki te auala ne ‵fuli ei ne valoaga i te Tusi Tapu a te kilokiloga a se tagata ki te Tusi Tapu.
“Ne Seki Talitonu Au me e Ola te Atua” (Te Faleleoleo Maluga, Napa 5 2017)
^ pala. 9 A valoaga ko fekau mai te Atua e uiga ki mea ka ‵tupu i aso mai mua.
^ pala. 25 T.L.M. ko “Tausaga Lauga Mua,” kae ko te T.A. ko “‵Tou Aso Nei.”
