Ne fanau au i Acul, se fa‵kai i koga ma‵luga i te feitu ki togala o Guatemala. Toku kāiga ne tino Ixil, se matakāiga o tino Maya. I tafa o te ‵gana Sepania, ne tupu aka au kae faipati i te ‵gana o te motou fa‵kai. Ne fetaui loa a tausaga kamata o toku olaga mo se vaitaimi o tamā taua i Guatemala telā e nofo ki te 36 tausaga te leva. I te taimi tenei, ne ‵mate eiloa a tino lxil e tokouke.

I te taimi ko fa ei oku tausaga, ne tafao toku taina telā ko fitu ana tausaga mo se tamā pomu kae ne ‵pa fakafuasei. Ne ‵kivi oku mata i te fakalavelave tenā kae se mea fakafanoanoa me ne mate atu toku taina. Mai tua ifo i ei, ne fakamāumāu eiloa te lasiga o toku olaga e pelā me se tamaliki i se fale mō tamaliki ‵kivi i te Fa‵kai o Guatemala, telā ne tauloto ei ki te Braille (‵gana mō tino ‵kivi). Ne seki malamalama katoatoa au i te pogai ne fakatapu au ne tino ga‵lue i konā mai te sau‵tala mo nisi tama‵liki kae ne seki fia ‵saga mai a nisi tamaliki ki a au. Ne seki sologa faeloa au i te nofo tokotasi kae ne olioli malosi au ki te lua masina i tausaga takitasi telā ne mafai ne au o fanatu ki te fale ki toku mātua, telā ne atafai kae loto alofa faeloa. Se mea fakafanoanoa, me ne mate tou fafine kae ko sefulu oku tausaga. Ne logo‵mae malosi au i oku lagonaga ona ko te galo atu o te tino eiloa e tokotasi telā ne alofa mai ki a au.

I te taimi ko 11 oku tausaga, ne toe foki atu au ki toku fa‵kai kae ne kamata o ‵nofo fakatasi mo toku āfa taina mo tena kāiga. Ne tausi ne latou au i te feitu faka-te-foitino kae e seai eiloa se tino ne mafai o fesoasoani mai ki a au i feitu tau lagonaga. I nisi taimi, ne tagi atu au ki te Atua: Kaia ne mate ei toku mātua? Kaia ne ‵kivi ei oku mata?” Ne fai mai a tino me i fakalavelave konei ko te loto o te Atua. Ne fakaiku aka ne au me e seai ne lagonaga o te Atua kae e se ‵lei foki ana faifaiga. A te pogai e tasi fua ne seki mafai o fakamate au me e seai se mea e mafai o fakaaoga ne au ke fai penā.

A te ‵kivi ne fai ei au ke se aoga i te feitu faka-te-foitino kae loto vāivāi. I te taimi koi foliki ei au, ne maneaneagina au i taimi e uke. Ne seki lipoti ne au a amioga solitulafono konā—ne seki mafaufau au me e isi se tino e atafai mai. E faigata o fai‵pati mai a tino ki a au, kae e se faipati atu foki au ki so se tino. Ne seki fiafia au o ‵nofo mo tino kae loto mafatia, kae ne seki talitonu foki au ki so se tino.

I te taimi ko talavou ei au, ne o‵mai ki a au se avā Molimau (se tauavaga) i te vaitaimi o tafaoga i te akoga. Ne fakamolemole atu se faiakoga e tokotasi, telā ne alofa mai ki a au, ke āsi mai lāua ki a au. Ne fai mai ne lāua a te  folafolaga i te Tusi Tapu me ka toe‵tu mai a tino ‵mate kae ka toe ‵kite a mata o tino ‵kivi i te aso tenā. (Isaia 35:5; Ioane 5:28, 29) Ne fiafia au ki mea ne akoako mai ne lāua, kae ko oko eiloa i te faigata ke sau‵tala mo lāua, ona ko te mea e se masani au ki te faipati. Kae faitalia eiloa toku sē faipati, ne tumau eiloa lāua i te āsi mai mo te atafai mo te kufaki ko te mea ke akoako mai ki a au a mea e uiga ki te Tusi Tapu. Ne sa‵sale mai eiloa a te tauavaga tenei i se ono maila tupu te ‵mao i luga i te mauga ke oko mai ki toku fa‵kai.

Ne fakamatala mai ne toku taina a lāua e pelā me ne tino e fai faka‵lei kae ‵ma lā gatu kae e se uke lā tupe. Kae ne fakaasi mai faeloa ne lāua te lā fia‵fia ki a au, mai te aumaiga o tamā meaalofa. Ne maua ne au te lagonaga me ko Kelisiano ‵tonu fua e mafai o fakaasi mai ne latou a te alofa sē fakapito penā.

Ne sukesuke au ki te Tusi Tapu mo te fesoasoani o Tusi mō tino ‵Kivi. E tiga eiloa ne malamalama faka‵lei au i mea ne tauloto ne au, ne faigata eiloa ke talia ne au a nisi mea. E pelā mo te faigata ke talitonu me e atafai tonu mai eiloa te Atua ki a au kae e mafai foki ne nisi tino o fakaasi mai a lagonaga o te Atua ki a au. Ne malamalama au i te pogai ne talia ei ne Ieova mō se vaitaimi a mea ma‵sei, kae ne faigata ki a au ke kilo atu ki a ia e pelā me se Tamana alofa tonu. *

Ne fesoasoani malielie mai eiloa a mea ne tauloto ne au mai te Tusi Tapu ke ‵fuli taku kilokiloga. E pelā mo te iloaga ne au me e ‵loto ‵ki a lagonaga a‵lofa o te Atua ki tino kolā e logo‵mae. Ne fai mai te Atua e uiga ki ana tino tapuaki kolā ne fai fakamaseigina: “Ko oti ne lavea ne au te fakapologa fi‵ta o tino Isalaelu . . . E iloa ne au olotou puapuaga katoa.” (Esoto 3:7) I te taimi ne kamata ei o fakatāua ne au a uiga ‵gali o Ieova, ne fakamalosi aka ei au ke tuku atu toku ola ki a ia. I te 1998, ne papatiso ei au e pelā me se Molimau a Ieova e tokotasi.

I se tausaga mai tua ifo o taku papatisoga, ne kau atu au ki se akoga mō tino ‵kivi i tafa o te fa‵kai o Escuintla. Ne iloa ne se toeaina i te fakapotopotoga i konā a te faigata ki a au ke kau atu ki fakatasiga ona ko te nofo atu i toku fa‵kai. A te ‵toe fakapotopotoga pili mai e tu i te suā feitu o te mauga telā ne ‵mai i ei a te tauavaga Molimau ke suke‵suke matou, kae ko oko eiloa i te faigata ki a au ke fanatu ki ei. Ke fesoasoani mai, ne maua ne te toeaina se kāiga Molimau i Escuintla telā ne loto fiafia ke fanatu au ke ‵nofo mo latou kae fesoasoani mai ke kau atu ki fakatasiga a te fakapotopotoga. Ke oko mai eiloa ki te aso nei, ne tausi mai latou ki a au e pelā me se tino tonu o te lotou kāiga.

E uke ‵ki a tala e mafai o fakamatala atu ne au e uiga ki te alofa tonu ne fakaasi mai ne tino o te fakapotopotoga ki a au. Mai i tala katoa konei, ne fakatalitonu mai i ei me e pelā me se Molimau a Ieova, ko aofia eiloa au i Kelisiano ‵tonu.—Ioane 13:34, 35.

Ko ‵galo atu oku lagonaga sē aoga e aunoa mo se fakamoemoega. Ko aoga katoatoa eiloa nei toku olaga. E pelā me se tavini galue tumau i te galuega ko te faiga o akoakoga a Molimau a Ieova, ko saga tonu atu au ki te akoakoga o nisi tino ki muna‵tonu tāua i te Tusi Tapu i lō te mafaufau fua ki toku sē katoatoa. Ne maua foki ne au a te tauliaga ke tavini atu e pelā me se toeaina i te fakapotopotoga kae fai foki i ei ne au a lāuga faka-te-Tusi Tapu. Ne maua ne au te tauliaga ke fai a lāuga faka-te-Tusi Tapu i fono i atufenua kolā e ‵kau atu ki ei a te fia o tino.

I te 2010, ne oti mai au i te Akoga Fakamasani mō Tavini Fesoasoani (ko fakaigoa nei ki te Akoga mō Tino Talai o te Malo) telā ne fai i El Salvador. Ne fakatoka au ne te akoga tenei ke fakataunu faka‵lei oku tiute i te fakapotopotoga. A te kau atu ki te akoga tenei ne fai ei ke momea aka oku lagonaga ki toku tāua kae alofagina ne Ieova te Atua, telā e mafai ne ia o fai so se tino ke fetaui ‵lei ki tena galuega.

Ne fai mai a Iesu: “E sili atu te fiafia o te tino telā e tuku atu ana mea i lō te maua ne ia.” (Galuega 20:35) I aso nei, e mafai o fai ‵tonu atu au me i a au ko fiafia, kae faitalia oku lagonaga mua, nei la, ko maua ne au te lagonaga me ko mafai o fesoasoani atu au ki nisi tino.