E mafai o fakamasani a tama‵liki ke a‵lofa ki te Atua, māfai fua e lavea ‵lei ne latou a fakamaoniga me e ola tonu te Atua kae alofa foki a Ia ki a latou. Ke a‵lofa ki te Atua, e manakogina ke iloa ne latou a Ia. (1 Ioane 4:8) E tau o iloa ne latou a mea konei: Se a te pogai ne faite ei ne te Atua a tino? Kaia ne talia ei ne te Atua a logo‵maega? Ne a mea ka fai ne te Atua ki tino i aso mai mua?—Faitau te Filipi 1:9.

Ke fesoasoani atu ki au tama‵liki ke a‵lofa ki te Atua, e ‵tau o fakaasi atu me e alofa eiloa koe ki a Ia. Kafai e lavea ne latou a te mea tenā, ka fakaakoako eiloa latou ki a koe.—Faitau te Teutelonome 6:5-7; Faataoto 22:6.

E ‵mana te Muna a te Atua. (Epelu 4:12) Ke fesoasoani atu ke iloa ne au tama‵liki a akoakoga faigofie. Ke fakaoko faka‵lei atu ki loto o tino, ne fakaaoga ne Iesu a fesili, ne fakalogologo kae fakamatala faka‵lei atu mai te Tusi Tapu. Ke fakaoko faka‵lei atu a akoakoga tāua ki loto o au tama‵liki, ke fakaakoako ki te auala ne akoako atu ei a Iesu.—Faitau te Luka 24:15-19, 27, 32.

E se gata i ei, a tala i te Tusi Tapu e uiga ki faifaiga a te Atua ki luga i tino, e mafai o fesoasoani atu ki au tama‵liki ke iloa kae a‵lofa latou ki te Atua. E mafai o maua i te www.pr418.com a tusi kolā ne fakatoka eiloa mō te pogai tenei.—Faitau te 2 Timoteo 3:16.