Masikeke mō Aku Kuli
“I te tau e ‵somo aka ei a lau o lakau, ne olo atu au mo aku tamā kuli e lua o sa‵sale i se kogā koga e tasi o te motou fakai,” ko pati ne tusi mai ne Nick, telā e nofo i Oregon, U.S.A. “Ne ‵tu sāle a Molimau mo olotou ka talai i te sitoa lasi o te fakai. E fai faka‵lei olotou teuga, kae fakatalofa atu ki so se tino mo te fakamisikata.
“Ne atafai a Molimau ki tino kae penā foki ki aku kuli. I te aso e tasi ne tuku mai ne Elaine, telā ne tu i te ka talai, a masikeke ki aku kuli e lua. Fakamuli ifo, i so se taimi e pili atu ei matou ki ka talai, ne ma‵nako eiloa aku kuli o olo ki ka talai ke maua lā masikeke.
“Ne ‵teka atu te fia o masina. Ne fia‵fia malosi a kuli ki lā masikeke, kae ne fiafia foki au o sau‵tala malie mo te kau Molimau. Kae ne seki manako au o sau‵tala fakalevaleva mo latou. Ko 70 tupu oku tausaga kae e se iloa ‵lei ne au a talitonuga a te kau Molimau. Ona ko toku sē fiafia ki te lotu Poletesano, ne mafaufau ifo au me e sili atu i te ‵lei ke fai eiloa ne au aku sukesukega ki te Tusi Tapu.
“I te taimi tenei, ne lavea foki ne au a nisi Molimau i koga kese‵kese o te fakai, e ‵tu i tafa o olotou ka talai. Ne mata fia‵fia faeloa foki latou. Ne fakaaoga faeloa ne latou te Tusi Tapu ke tali aku fesili, kae ne momea aka toku talitonu ki a latou.
“I te aso e tasi ne fesili mai a Elaine, ‘E talitonu koe me i manu ne meaalofa mai te Atua?’ Ne tali atu au, ‘Ao, e talitonu katoatoa au ki ei!’ Tenā ne fakaasi mai ei ne Elaine te Isaia 11:6-9. Mai konā ne manako malosi au o sukesuke ki te Tusi Tapu, kae ne seki manako eiloa au o puke ne tusi mai i a latou.
“I aso mai tua ifo, ne fiafia malosi au ki sautalaga toe‵toe kae ‵gali a matou mo Elaine mo tena avaga ko Brent. Ne fai mai te lā manatu ke faitau au ki te Mataio ke oko ki te Galuega ke maina au i te auala ke fai ei pelā me se Kelisiano tonu. Tenā ne faitau ei au ki ei. E seki leva, kae talia ne au ke fai taku akoga faka-te-Tusi Tapu ne Brent mo Elaine. Te taimi tenā ko te kogāloto o te 2016.
“Ne olioli faeloa au ki taku akoga faka-te-Tusi Tapu i vaiaso katoa mo fakatasiga i te Fale Tapuaki. Ne fakamanuiagina kae fiafia malosi foki au o tauloto ki akoakoga mai te Tusi Tapu. I se tausaga tupu mai tua ifo, ne papatiso au ke fai pelā me se Molimau. Nei la, ko 79 oku tausaga, kae iloa ne au me ko sasale atu au i te auala tonu. Ne fakamanuia au ne Ieova me ne talia ne ia ke aofia au i tena kāiga o tavini tukugina atu.
