Ruhanga akahanga emibiri yaitu n’obusobozi bw’okwekiza. Ekintu obukikusara, rundi obu kikucumita, rundi obwohonoka, omubiri “gukora entekaniza ey’egumire kwetegereza ey’ekonyera ebihooya kukira.” (Johns Hopkins Medicine) Aho n’aho omubiri gutandika kutanga esagama kujwa, gugalihya ebinywa, gujanjaba ekihooya kandi gugumya enyama.

TEKEREZAAHO KINU: Omuhangi waitu obwaraaba yahangire emibiri yaitu n’obusobozi obw’okukiza ebihooya ebya ha mubiri, kinu tikituletera kumwesiga ngu n’asobora kukiza emitima yaitu ey’ecwekere? Omuhandiki wa Zabuli akagamba ngu: “Akiza abayina emitima ecwekere, kandi aboha ebihuta byabu.” (Zabuli 147:3) Baitu obw’oraaba oine obusaasi omu mutima habw’ebintu ebiwarabiremu rundi eby’orukurabamu, nosobora ota kukigumya ngu Yahwe naija kuboha ebihuta byawe​—omu kasumi kanu kandi n’omu kasumi ak’omu maiso?

Ruhanga naraganiza ngu: “Leka okutiina, baitu nyowe ndi naiwe; otafuberra, baitu ninyowe Ruhanga wawe: nyowe ndikuha amani; ego, ndikukonyera.” (Isaya 41:10) Omuntu ow’amanyire ngu Yahwe amufaaho, aba n’obusinge omu mutima kandi aba n’amaani ag’okuraba omu bizibu ebitali bimu na bimu. Omukwenda Paulo akeeta enyehurra enu “obusinge bwa Ruhanga oburukukira okumanywa kwona.” Paulo akongera yagamba ngu: “Ninsobora okukora byona habwogu arukumpa amani.”​—Abafiripi 4:4-7, 9, 13.

Ebyahandiikirwe bitukonyera kwombeka okwikiriza kwaitu omu mirago ya Yahwe habw’akasumi ak’omu maiso. Ekyokurorraho, Okusuku’rwa 21:4, 5 kitugambira Ruhanga eky’arukwija kukora kandi n’ensonga habwaki tusemeriire kumwesiga ngu naija kukikora:

• “Alisusura amaizi gona” ha maiso g’abantu. Yahwe naija kwihaho okubonabona n’okwetuntura kwona, n’ebizibu abantu abamu barora nk’ebitali by’amaani.

• “Nogu akaba aikaliire ha kitebe kyobukama” omu kitinisa kingi omu iguru, nuwe Omukama ow’Obusobozi bwona. Naija kukozesa amaani ge n’obusobozi bwe kutanga okubonabona n’okutuha obukonyezi.

• Yahwe n’akigumiza kimu ngu emirago ye ‘y’okwesiga kandi y’amazima.’ Eki nikimanyisa ngu Yahwe akozesa ibara lye kugumya nk’oku arukwija kuhikiriza emirago ye.

“Kandi alisusura amaizi gona ha maiso gabo; kandi tihakiroho okufa; nobukwakuba okutera empamo, nobukwakuba okurra, nobukwakuba okusasa tibikiroho: ebyokubanza bihoireho. Nogu akaba aikaliire ha kitebe kyobukama yagamba ati Dora, ninfora byona ebihyaka. Yagamba ati handika: baitu ebigambo binu byokwesiga, byamazima.”​—Okusuku’rwa 21:4, 5.

Obuhangwa bwona hamu na Baibuli byoleka emiringo ya Isitwe ow’omu iguru. Ebyahangirwe byo bitusikiiriza kugonza kufooka banywani ba Ruhanga, baitu Baibuli etugambira bbwa eti: “Mwirre haihi Ruhanga, nauwe alibairra haihi.” (Yakobo 4:8) Engeso Ezabakwenda 17:27 rugamba ngu: ‘Tali hara nomu wena halitwe.’

Obw’orayeyongera kumanya Ruhanga, noija kweyongera kukigumya ngu n’akufaaho. (1 Petero 5:7) Obutukigumya ngu Yahwe n’atufaaho, kitugasira kita?

Tekerezaaho eky’okurorraho kya Toru, kuruga omu ihanga lya Japan. N’obwaraaba yakuziibwe nyina Omukristaayo, aketeranizaaho ekitebe ky’enkozi z’ebibi ekirukwetwa yakuza. Nagamba ngu, “naikirizaaga ngu Ruhanga akaanoba, kandi nayehurraga ngu okufa kw’abantu abanaikaraga nabo, kukira muno abo abanagonzaaga kwabahoga kunfubira.” Toru nagamba ngu, enyikara embi ey’akaba arumu hamu n’entekereza etahikire ey’akaba aine bikamuletera kufooka “muntu atarukufaayo ha busaasi obw’abantu abandi.” Kandi nagamba ngu: “Nkaba ningonza kufa nkyali muto hanyuma y’okwita omuntu ruranganwa nukwo nyekorre ibara.”

Baitu hanyuma ya Toru na mukazi we Hannah kwega Baibuli, Toru akakora empinduka ez’amaani omu  bwomeezi bwe n’omu ntekereza ye. Hannah nagamba ngu: “Nkarora musaija wange n’akora empinduka zinu.” Toru hati nagamba, ataine kugurukyagurukya kwona ngu: “Mali haroho Ruhanga arukufaaho buli omuntu wena. Tarukugonza omuntu wena afe, kandi ayetegekere kuganyira abo boona abegarukamu ebibi byabo. Ahuliiriza ebintu ebitutasobora kugambira omuntu ondi oihireho uwe wenka kandi n’ebitasobora kwetegerezebwa ondi wena. Omu kasumi akatali ka hara, Yahwe naija kwihaho ebizibu, okubonabona n’okuganya kwona. N’omu kasumi kanu, atukonyera omu miringo tutarukunihira. Natugonza muno kandi atukonyera.”​—Zabuli 136:23.

Nk’oku ekyokurorraho kya Toru kirukwoleka, kumanya ngu Ruhanga n’asobora​—kandi ngu ali haihi—​kumaraho ebizibu kandi atusiimule amaziga goona, kitukonyera kutunga obwomeezi oburungi hati kandi n’okutunga okunihira okw’akasumi ak’omu maiso. Mananukwo, n’omu nsi enu enyakwijwiremu okubonabona kwingi, engonzi za Ruhanga nizisobora kukugasira.