OMU MYAKA EY’ENYUMA ABAKUGU BAIKAIRE NIBASERULIIZAAHO MUNO OBUSAASI OBULEETWA OKUFEERWA. Baitu nk’oku turozere, obuhabuzi oburukukirayo oburungi abakugu obubagaba bukira kwikiranganiza n’amagezi agarukusangwa omu kitabu ekyaira, Baibuli. Kinu nikyoleka ngu obuhabuzi bwa Baibuli nibutugasira na hati. Baitu, omu Baibuli harumu n’obuhabuzi obundi oburukwesigwa. Ebazaaho ebintu ebitutasobora kusanga ahandi hoona kandi ebisobora kuhuumuza muno abo abaferiirwe abantu baabo.

• Nitukigumya ngu abantu baitu abaafiire tibarukubonabona

  Omugambizi 9:5 egamba eti: “Abafire tibamanyire kigambo nekimu.” Baibuli eyongera egamba ngu: “Ebitekerezo bye nubwo bihwaho.” (Zabuli 146:4) Baibuli erengesaniza okufa n’okugwijagira.​—Yohana 11:11, 13.

• Kuba n’okwikiriza okugumire omu Ruhanga ow’okugonza kihuumuza

  Omu Zabuli 34:15 Baibuli egamba ngu: “Amaiso ga [Yahwe] a garora abokuhikirra, namatuge gahurra okukunga kwabu.” Kugambira Ruhanga omulingo turukwehurra kuraba omu kusaba kituhuumuza kukira kubaza n’omunywani. Kitukonyera kugumya enkoragana yaitu n’Omuhangi waitu ow’asobora kukozesa amaani ge kutuhuumuza.

• Tulindiriire akasumi ak’omumaiso akarungi

  Tekerezaaho obusumi obw’omumaiso boona abali omu bituuro obubalihumbuuka bomeere omu nsi! Baibuli ekibazaaho emirundi nyingi. Obweba n’ebazaaho enyikara eziraaba omu nsi kasumi ako egamba eti: “Alisusura amaizi gona ha maiso [gaitu]: kandi tihakiroho okufa; nobukwakuba okutera empamo, nobukwakuba okurra, nobukwakuba okusasa tibikiroho.”​—Okusuku’rwa 21:3, 4.

Baingi abaikiririza omuli Yahwe, basoboire kugumira obusaasi bw’okufeerwa abantu baabo habwokuba baine okunihira okw’okwongera kubarora. Ekyokurorraho, Ann, ow’akaba amazire emyaka 65 omu buswere akafeerwa iba, n’agamba ngu: “Baibuli engumya ngu abantu baitu abaafiire tibarukubonabona kandi ngu Ruhanga naija kuhuumbura boona abaarukwijuka. Buli murundi ntekerezaaho abantu bange abaafiire, nyijuka omurago gunu kandi kindetera kugumira ekintu ekibi muno ekyakambaho omu bwomeezi!”

Tina, outwabalizeeho omu bicweka eby’enyuma n’agamba ati: “Kuruga Timo afa, nyikaire ninyehurra ngu Ruhanga nansagika. Ninyehurra ngu Yahwe aikaire nankonyera omu kasumi k’obujune. Ekindi, omurago gwa Baibuli ogw’okuhumbuuka nagwo gumpuumuza. Gunyekambisa kugumiisiriza kuhikira kimu obundyongera kurora Timo.”

Kusisanaho Ann na Tina, obukaikuru n’obukaikuru bw’abantu nibakigumya ngu emirago ya Baibuli n’eyesigwa. N’obukiraaba ngu nikikugumira kwikiririza omu Baibuli, nitukwekambisa kuseruliirizaaho obwakaiso oburukugumya ngu amagezi agarumu nigakora kandi ngu n’emirago ey’erumu niija kuhikirra. Noija kukyetegereza ngu Baibuli erumu obukonyezi oburukukirayo oburungi hali abo abarukuganya.

Rora vidiyo ezirukubazaaho ensonga enu ha mukura gwaitu ogwa jw.org/ttj

ABAFU BALI MU NYIKARA YA MULINGO KI?

WAKUGONDEZE AMAKURU AMARUNGI?