Ruhanga akomamu bamu h’Abakristaayo abesigwa abarukwija kuhumbuuka bagende omu iguru hanyuma y’okufa. (1 Petero 1:​3, 4) Hanyuma y’okukomwa, basemeriire kwikara baine okwikiriza okugumire n’okwetwaza omu mulingo Ruhanga asiima nukwo batafeerwa omugisa gunu ogw’okutunga empeera yabo omu iguru.​—Abefeso 5:5; Abafiripi 3:​12-​14.

Abo Abarukugenda omu Iguru Nibaija Kukorayo Ki?

 Nibaija kuheereza hamu na Yesu nk’abakama na banyakatagara kumara emyaka 1,000. (Okusuku’rwa 5:​9, 10; 20:6) NIbaija kuba “iguru erihyaka,” rundi gavumenti ey’omu iguru, ey’eralema ‘ensi empyaka,’ rundi abantu omu nsi. Abalemi banu abaralemera omu iguru, nibaija kukonyera abantu omu nsi kufooka abahikiriire nk’oku Ruhanga akaba n’agonza ha kubanza.​—Isaya 65:17; 2 Petero 3:​13.

Bantu Baingaha Abaragenda omu Iguru?

 Baibuli eyoleka ngu abantu 144,000 nibaija kuhumbuka bagende omu bwomeezi obw’omu iguru. (Okusuku’rwa 7:4) Omu kwolekwa okurukusangwa omu Okusuku’rwa 14:​1-3, omukwenda Yohana akarora “Omwana Gwentama gwemeriire ha rusozi Sayuni, kandi hamu nauwe akasirira mu bukumi buna mwenkumi ina.” Omu kwolekwa kunu, “Omwana Gwentama” nuwe Yesu. (Yohana 1:​29; 1 Petero 1:​19) “Orusozi Sayuni” nirukiikirra ekiikaro ekya haiguru muno Yesu hamu na 144,000 ekibarukwija kuba barumu hamu nauwe obubaraaba nibalemera hamu omu iguru.​—Zabuli 2:6; Abaheburaniya 12:22.

 Abo ‘abaayeserwe, abaakomerwemu’ kulema na Yesu omu Bukama nibabazibwaho nka “igana like.” (Okusuku’rwa17:14; Luka 12:32) Kinu nikyoleka ngu nibaija kuba bataito kakuba obalengesaniza n’entaama za Yesu zoona.​—Yohana 10:16.

Ebisuba ebirukukwata hali abo abarukugenda omu iguru

 Ekitahikire: Abantu abarungi boona bagenda omu iguru.

 Ekihikire: Ruhanga n’araganiza kuha abantu baingi abarungi obwomeezi obutahwaho omu nsi.​—Zabuli 37:11, 29, 34.

•   Yesu akagamba ngu: “Busaho muntu aratembere omu iguru.” (Yohana 3:13) Akooleka ngu abantu abarungi abaafiire atakaizire omu nsi nka Iburahimu, Musa, Yobu, na Daudi, batagende omu iguru. Engeso Ezabakwenda 2:29, 34. Oihireho, bakaba abaine okunihira okw’okuhumbuuka kwikara omu nsi.​—Yobu 14:13-​15.

•   Okuhumbuuka okw’abo abarukugenda omu iguru kwetwa “okuhumbuka okwokubanza.” (Okusuku’rwa 20:6) Kinu nikyoleka ngu halibaho okuhumbuuka okundi. Nikwija kuba okw’omu nsi.

•   Baibuli eyegesa ngu hansi y’obulemi bw’Obukama bwa Ruhanga, ‘okufa tikulibaho.’ (Okusukurwa 21:​3, 4) Omurago gunu nigukwataho ensi habwokuba okufa tikukabaga omu iguru.

 Ekitahikire: Buli muntu ayecweramu obwaraaba naija kutunga obwomeezi omu nsi rundi omu iguru.

 Ekihikire: Ruhanga nuwe arukucwamu noha omu Bakristaayo abesigwa aratunga “empera eyokweta kwa Ruhanga okwahaiguru,” ekirukumanyisa, okunihira okw’okutunga obwomeezi omu iguru. (Abafiripi 3:​14) Ruhanga obw’aba n’akoma abaragenda omu iguru, tasigikirra ha kugonza okw’okugenda omu iguru omuntu okw’aine.​—Matayo 20:20-​23.

 Ekitahikire: Okunihira okw’okutunga obwomeezi obutahwaho omu nsi kw’abantu aba hansi, kandi kwabo bonka abatasemeriire kugenda omu iguru.

 Ekihikire: Abo abaratunga obwomeezi obutahwaho omu nsi, Ruhanga abeeta “abantu bange,” “abakome bange,” na ‘abo abahairwe omugisa hali Yahwe.’ (Isaya 65:21-​23) Nibaija kuba n’omugisa gw’okuhikiriza ekigendererwa kya Ruhanga hali abantu​—obwomeezi obutahwaho kandi obuhikiriire omu rugonjo rwa Ruhanga omu nsi.—​Okubanza 1:​28; Zabuli 115:16; Isaya 45:18.

 Ekitahikire: Omuhendo gw’abantu 144,000 abarukubazibwaho omu Okusuku’rwa gw’akokurorraho.

 Ekihikire: Nobukiraaba ngu ekitabu ky’Okusuku’rwa kirumu emihendo ey’akokurorraho, emu ha mihendo n’eba etali y’akokurorraho. Ekyokurorraho, kibazaaho “amabara ikumi nabiri, agabakwenda ikumi nababiri Abomwana Gwentama.” (Okusuku’rwa 21:14) Wetegereze obwakaiso oburukwoleka ngu omuhendo tiguli gw’akokurorraho.

 Okusuku’rwa 7:4 niholeka ngu “omuhendo gwabu abatairweho akokurorraho[rundi, abo abagumiibwe kugenda omu iguru] kasirira mubukumi buna mwenkumi ina.” Hanyuma y’okubabazaaho, enkarra ezirukwongeraho zibalengesaniza n’ekitebe ekyakabiri: “ekitebe ekingi omuntu wena ekyatasobora okubara.” Abo ‘ab’ekitebe ekingi’ nabo Ruhanga abajuna. (Okusuku’rwa 7:​9, 10) 144,000 obuguraaba guli muhendo gw’akokurorraho, kandi nigubazaaho ekitebe ekitaine muhendo, mali tikyakusobokere kumanya embaganiza enyakuli hagati y’ebitebe binu bibiri. a

 Kwongerraho, abantu 144,000 babazibwaho ‘nk’abaguzirwe omu bantu okuba ebyana ebyomuganuro.’ (Okusuku’rwa 14:4) Abo abataito abakomerwemu nubo barukumanywa nka “ebyana ebyomuganuro”. Kinu kisoborra kurungi abo abarukwija kulema hamu na Yesu omu iguru, obu nibalema abantu abatarukusobora kubarwa abarukwija kuba omu nsi.​—Okusuku’rwa 5:​10.