Ekikaguzo ekirukukwata ha kigendererwa eky’obwomeezi nikisobora kukaguzibwa omu miringo erukwahukana, nka, Habwaki tuli omu nsi? rundi Obwomeezi bwange bwine ekigendererwa? Baibuli n’eyoleka ngu ekigendererwa ky’obwomeezi bwaitu nikyo eky’okutunga enkoragana enungi na Ruhanga. Tekerezaaho ensonga zinu Baibuli ez’ebazaaho.

•   Ruhanga nuwe Muhangi waitu. Baibuli egamba ngu: “[Ruhanga] nuwe yatuhangire, naitwe tuli be.”​—Zabuli 100:3; Okusuku’rwa 4:11.

•   Ruhanga akaba aine ekigendererwa habw’okuhanga ebintu byona otwaliiremu naitwe.​—Isaya 45:18.

•   Ruhanga akatuhanga twine ekyetaago eky’ebintu eby’omwoyo, kandi kinu nikitwarramu n’okugonza kumanya ekigendererwa ky’obwomeezi. (Matayo 5:3) Nagonza tugire ekitwakoraho kuhikiiriza ekyetaago eki.​—Zabuli 145:16.

•   Tuhikiiriza ebyetaago byaitu eby’omwoyo obutwekamba muno kuba n’enkoragana enungi na Ruhanga. N’obukiraaba ngu baingi nibasobora kuteekereza ngu tikirukusoboka kuba banywani ba Ruhanga, Baibuli etwekambisa eti: “Mwirre haihi Ruhanga, nauwe alibairra haihi.”​—Yakobo 4:8; 2:23.

•   Kusobora kufooka banywani ba Ruhanga, tusemeriire kutwaza obwomeezi bwaitu omu mulingo ogurukukwatagana n’ekigendererwa kye. Baibuli ebazaaho ekigendererwa kinu omu Omugambizi 12:13: “Tina Ruhanga, okwatege ebiragiro bye; baitu nibyo byonka bihikiriire omuntu okukora.”

•   Omu kasumi ak’omu maiso, nitwija kwetegerereza kimu ekigendererwa kya Ruhanga obwaramaraho okubonabona kandi akaha banywani be abarukumuramya obwomeezi obutahwaho.​—Zabuli 37:10, 11.