Ekibi kiri kikorwa kyona, enyuhurra, rundi entekereza etarukukwatagana n’endengo za Ruhanga. Nikitwarramu kucwa ebiragiro bya Ruhanga kurabira omu kukora ebintu ebibi, rundi ebitahikiriire omu maiso ga Ruhanga. (1 Yohana 3:4; 5:17) Ekindi, Baibuli eyoleka ngu omuntu obwalemwa kukora ekihikire, aba akozere ekibi.​—Yakobo 4:17.

 Omu ndimi ezakozesiibwe kuhandiika Baibuli, ekigambo ekihindurwa ekibi nikimanyisa “kutaisa” rundi kulemwa kuteera ekintu. Ekyokurorraho, haali haroho abaserikale omu Isaleri eya kara abakaba bamanyire kukozesa kurungi emyesuuso kuhika ha rulengo ngu ‘tibataisaaga.’ Kakuba ebigambo ebi bihindurwa nk’okubiri nibiba nibisomwa “tibasiisaga.” (Ekyabacwi 20:16) Nahabweki, kukora ekibi nikimanyisa kutaisa endengo za Ruhanga ezihikiriire.

 Nk’Omuhangi waitu, Ruhanga aine obugabe obw’okututeraho endengo ezitusemeriire kworobera. (Okusuku’rwa 4:11) Nitujunanizibwa omu maiso ge habw’omulingo twetwazaamu.​—Abarumi 14:12.

Mali nikisoboka kwetantarra kimu kusiisa?

 Nangwa. Baibuli n’egamba ngu “bona bakasisa, kunu tibahikire ha kitinisa kya Ruhanga.” (Abarumi 3:23; 1 Ekyabakama 8:46; Omugambizi 7:20; 1 Yohana 1:8) Habwaki kiri kiti?

 Abantu ab’okubanza Adamu na Hawa, bakaba bataine kibi ha kubanza. Eki kiri kiti habwokuba bakahangwa omu kisisani kya Ruhanga kandi baali bahikiriire (Okubanza 1:27) Baitu obubajemiire Ruhanga bakafooka abatahikiriire. (Okubanza 3:5, 6, 17-19) Obubazaire abaana, bakabazaara baine ekibi n’obutahikirra. Omukama Daudi ow’Isaleri akagamba ati: “Nkazaarwa nyine ekibi.”​—Zabuli 51:5, “NWT.”

Ebibi ebimu by’amaani kukira ebindi?

 Ego. Ekyokurorraho, Baibuli n’egamba ngu abasaija aba Sodomu eya kara bakaba bali “basisi mali mali” kandi ngu okusiisa kwabo kukaba kuli “kwamahano.” (Okubanza 13:13; 18:20) Leka tubazeeho ensonga isatu ezisobora kutukonyera kumanya ekibi obukiraaba kiri ky’amaani rundi nangwa.

1.   Kibi kya mulingo ki. Baibuli netuhabura kutakora ebibi eby’amaani, ekyokurorraho kwejumbira omu bikorwa eby’obusiihani, kuramya ebisisani, kwiba, obutamiizi, obunyagi, kwita, n’okwejumbira omu bikorwa eby’oburogo n’oburaguzi. (1 Abakolinso 6:9-11; Okusuku’rwa 21:8) Baibuli eyongera ebazaaho ebibi omuntu ebyakora atabandize kubitekerezaaho rundi atakigenderiire nk’okubaza rundi kukora ebintu ebisaaliza abandi. (Enfumo 12:18; Abefeso 4:31, 32) Baitu nabwo, Baibuli etutererra kwerindira kimu ekibi kyona, habwokuba nikisobora kuturugirramu kukora ekibi eky’amaani tukacwa ekiragiro kya Ruhanga.​—Matayo 5:27, 28

2.   Ekigendererwa. Ebibi ebimu abantu babikora habwokuba tibamanyire Ruhanga eby’agonza. (Engeso Ezabakwenda 17:30; 1 Timoseo 1:13) N’obukiraaba ngu ebibi nk’ebyo Baibuli tebiitira riiso, n’eyoleka ngu by’embaganiza hali ebyo omuntu eby’akora akigenderiire. (Okubara 15:30, 31) Omuntu obwakora ekibi akigenderiire ‘omutima gwe guba mubi.’​—Yeremiya 16:12.

3.   Emirundi kibaireho. Baibuli n’eyoleka ngu haroho embaganiza hagati y’omuntu kukora ekibi omurundi gumu n’okwikara n’akikora emirundi nyingi kumara akasumi. (1 Yohana 3:​4-8) Abo ‘abagenderra okusiisa,’ na hanyuma y’okumanya ekihikire, Ruhanga naija kubacwera omusango.​—Abaheburaniya 10:26, 27.

 Omuntu ow’akozere ekibi eky’amaani n’asobora kwehurra ngu omuntu we ow’omunda namucumita muno habw’ensobi ey’akozere. Ekyokurorraho, Omukama Daudi akahandiika ati: “Ebyokusiisa byange bimpikire ha mutwe: nkenketo enkoto bindemeriire kimu.” (Zabuli 38:4) Baitu Baibuli n’eha okunihira kunu: “Omubi aleke omuhandagwe, nomuntu atahikiriire aleke ebitekerezobye: agaruke hali [Yahwe], nauwe alimuganyira; agaruke hali Ruhanga waitu, baitu alikira okuihaho obubi.”​—Isaya 55:7.