Ego! Baibuli eruga hali Ruhanga “arukuhumuza abaculezi.” (2 Abakolinso 7:6) N’obukiraaba ngu Baibuli tikiri kitabu ekirukubuumbabuumba ebitekerezo, kikonyiire baingi kweyihamu ebitekerezo eby’okweyita. Amagezi amarungi agarumu naiwe nigasobora kukukonyera.

•  Magezi ki Baibuli ageeha?

•  Baibuli etugambira h’abantu abakaba nibagonza kufa?

•  Byahandiikirwe ki ebisobora kukukonyera kweyihamu ebitekerezo eby’okweyita?

•  Osemeriire kukora ki kakuba munywani wawe agamba ngu nagonza kweyita?

•  Baitu kakuba oba walengereho kweyita omu busumi bwa kara?

• ● Baza enyehurra yaawe.

   Baibuli egamba eti: “Enganjani negonza obusumi bwona, mugenziwe ayazairwe habwobujune.”—Enfumo 17:17.

   Nikimanyisa ki: Nitwetaaga obusagiki bw’abandi obuturukuba twine ebitekerezo ebirukumaramu amaani.

   Obwoculeera, oyetweka omugugu ogusobora kukulema. Baitu obw’ogambiraho abandi omulingo orukwehurramu n’osobora kukehya ha bulemeezi kandi n’orora n’ebintu omu mulingo obaire otarukubiroramu.

   Lengaho kinu: Tunga omuntu ow’orabaza nauwe kiro kinu, n’asobora kuba omu ha b’omu ka rundi omunywani oworukwesiga. a N’osobora n’okuhandiika omulingo orukwehurramu.

• ● Tunga obukonyezi kuruga omu bakugu.

   Baibuli egamba eti: ‘Abomiire tibetaaga omufumu, baitu abarwaire.’—Matayo 9:12.

   Nikimanyisa ki: Tusemeriire kuserra obujanjabi obuturukuba turwaire.

   Ebitekerezo eby’okweyita nikasobora kuba kokurorraho k’oburwaire bw’ebitekerezo rundi obw’omutwe. Nk’oburwaire obundi, tikirukwetaagisa kugira ensoni. Oburwaire bw’omutwe n’ebitekerezo nibusobora kujanjabwa.

   Lengaho kinu: Obukiraaba nikisoboka, serra obukonyezi kuruga hali dakitaali omukugu.

• ● Ijuka ngu Ruhanga n’akufaaho.

   Baibuli egamba eti: “Ebisirya bitano tibiguramu senti ibiri? Kandi nakatahi kamu konka tikeba omu maiso ga Ruhanga . . . . Mutatina: muli bomuhendo okukira ebisirya bingi.”—Luka 12:6, 7.

   Nikimanyisa ki: Oli w’omuhendo hali Ruhanga.

   N’osobora kwehura oli wenka, baitu Yahwe arora byona ebyorukurabamu. N’akufaaho muno n’obukiraaba ngu n’ohurra otakyagonza kwikara oli mwomeezi. Zabuli 51:17 nihangamba ngu, “Omutima ogucwekere, oguzizire, ai Ruhanga, toligugaya.” Ruhanga nagonza oikale oli mwomeezi habwokuba nakugonza.

   Lengaho kinu: Serra obwakaiso omu Baibuli oburukugumya ngu Ruhanga nakugonza. Ekyokurorraho, rora esuura 24 ey’akatabu Draw Close to Jehovah.

• ● Saba Ruhanga.

   Baibuli egamba eti: “Nimunagira okutuntura kwanyu kwona haluwe, baitu nabitaho omutima ebigambo byanyu.”—1 Petero 5:7.

   Nikimanyisa ki: Ruhanga nakuraaliza kumugambira byona ebikuli ha mutima ebirukutalibaniza ebitekerezo byawe.

   Ruhanga n’asobora kukuha obusinge obw’omu mutima hamu n’amaani nukwo ogume. (Abafiripi 4:6, 7, 13) Omu mulingo ogu, asagika abo abamusaba kuruga ha mutima.—Zabuli 55:22.

   Lengaho kinu: Kiro kinu saba Ruhanga. Kozesa ibara lye Yahwe, kandi omugambire omulingo gwonyini ogw’orukwehurramu. (Zabuli 83:18) Musabe akukonyere kwikara ogumire.

• ● Wecumiitirizeeho okunihira kwa Baibuli okw’omu kasumi k’omu maiso.

   Baibuli egamba eti: “[Twine] okunihira okwamazima okutatengetatengeta.”—Abaheburaniya 6:19.

   Nikimanyisa ki: Enyehurra zaawe nizisobora kwikara nizitengetatengeta nk’elyato erirukuraba omu ihunga, baitu okunihira Baibuli okwetuha, nikusobora kukukonyera kutekaana.

   Okunihira oku tibiri bintu ebitwakugondeze ngu bibeho kwonka, baitu nikusigikirra ha murago gwa Ruhanga ogw’okwihaho ebintu byona ebireta obusaasi.—Okusuku’rwa 21:4.

   Lengaho kinu: Manya ebirukukiraho ha mirago erukusangwa omu Baibuli obu n’osoma isomo lya 5 ely’akatu Amakuru Amarungi Kuruga Hali Ruhanga!

• ● Kora ekintu ekyokira kugonza.

   Baibuli egamba eti: “Omutima ogwokusemererwa mubazi murungi.”—Enfumo 17:22.

   Nikimanyisa ki: Obutukora ebintu ebiratuletera okusemererwa, nitusobora kweyongera kwehurra kurungi omu bitekerezo.

   Lengaho kinu: Kora ekintu ekikusemeza. Ekyokurorraho, huliiriza ebizina ebirukusemeza, soma ekitabu ekirukugarramu amaani rundi oyejumbire omu mizaano. Noija kweyongera kusemererwa obw’orakonyera abandi, n’omubintu ebirukuzooka nk’ebitaito.—Engeso Ezabakwenda 20:35.

• ● Werolerre kurungi.

   Baibuli egamba eti: “Okwemanyiza okwomubiri nukugasa.”—1 Timoseo 4:8.

   Nikimanyisa ki: Tugasirwa obutukora ebisasaizi, tukabyama ekirukumara, kandi tukalya ebyokulya ebirumu ekiriisa.

   Lengaho kinu: Rubatarubata kumara nk’edakiika 15 buli kiro.

• ● Ijuka ngu enyehurra hamu n’ebintu ebindi omu bwomeezi bihinduka.

   Baibuli egamba eti: “Timurukumanya ekiribaho [nyenkya].”—Yakobo 4:14.

   Nikimanyisa ki: N’obukiraaba ngu oine ekizibu ekirukukutuntuza kandi eky’otasobora kumaraho, nikisobora kuba ky’akacu kake.

   N’obworaaba oli munyikara enyakugumire kwingana nkaha, n’esobora kuhinduka nyenkya. Nahabweki serra omulingo ogw’okukigumira. (2 Abakolinso 4:8) Enyikara yaawe ey’etanguhire n’esobora kuhinduka, baitu kakuba oyeyita tosobora kukihindura.

   Lengaho kinu: Soma Ebyahandiikirwe ebirukubazaaho abantu abahoirwemu amaani baahurra nibagonza kweyita. Kandi orole omulingo enyikara yabo yahikire yahinduka, obundi omu mulingo ogubakaba batarukunihira. Wetegereze bimu ha byokurorraho.

 Ego. Baibuli ebazaaho abantu abamu abaagambire ngu, “Ningonza kufa.” Ruhanga atabahane, baitu akabakonyera. Naiwe n’asobora kukukonyera.

Eriya

•  ● Akaba nuwe oha? Eriya akaba ali nabbi omumanzi. Baitu nauwe akahika yahwamu amaani. Yakobo 5:17 nihagamba ngu “Eriya akabali muntu ayakwasirwe byona nkaitwe.”

•  ● Habwaki akaba nagonza kufa? Haroho obuyayehuliire ali wenka, atiinire, kandi nk’owataine mugaso. Nahabweki akasaba ati: “[Yahwe], ihaho obwomezi bwange.”—1 Ekyabakama 19:4.

•  ● Kiki ekyamukonyire? Eriya akagambira Yahwe nk’oku akaba nayehurramu. Ruhanga akamugarramu ata amaani? Ruhanga akooleka ngu n’amufaaho kandi yamwoleka na n’amaani ge. Akagumya Eriya ngu akaba nakyayetaagwa kandi yamuha n’omuntu ow’okumukonyera.

•  ▸ Somaho Eriya: 1 Ekyabakama 19:2-18.

Yobu

•  ● Akaba nuwe oha? Yobu akaba ali musaija omuguuda muno ayaheerezaaga Ruhanga ow’amananu n’obwesigwa.

•  ● Habwaki akaba nagonza kufa? Yobu akatunga ebizibu bingi omu bwomeezi bwe. Akafeerwa itungo lye lyona. Abaana be boona bakafeera omu kigwererezi. Akakwatwa oburwaire obw’amaani. Hanyuma bakamuhangirra kandi bamujunaana ngu nuwe akaba ayeretiire ebizibu binu. Yobu akagamba ati: “Ninuga obwomezi bwange; tindukwenda okwomera.”—Yobu 7:16.

•  ● Kiki ekyamukonyire? Yobu akasaba Ruhanga kandi yabaza n’abantu abandi. (Yobu 10:1-3) Akagarurwamu amaani munywani we arukwetwa Erihu ow’akaba namusaalirirwa, kandi yamukonyera kurora enyikara ye omu mulingo oguhikire. Ekirukukirayo, Yobu akaikiriza obuhabuzi n’obukonyezi bwa Ruhanga.

•  ▸ Somaho Yobu: Yobu 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Musa

•  ● Akaba nuwe oha? Musa akaba ali mwebembezi wa Isaleri eya kara kandi ali nabbi.

•  ● Habwaki akaba nagonza kufa? Musa akaba aine emirimo nyingi, abantu baikaraga nibamuhakaniza, kandi akahurra ajwahire. Nahabweki akakunga hali Ruhanga ati: “Onyitire kimu nkwesengeriize.”—Okubara 11:11, 15.

•  ● Kiki ekyamukonyire? Musa akagambira Ruhanga omulingo akaba nayehurramu. Ruhanga akakonyera Musa yamukeehezaaho emirimo nukwo aleke kwetuntura.

•  ▸ Somaho Musa: Okubara 11:4-6, 10-17.