Baibuli ebazaaho tatu omurundi gumu gwonka omu Ebyabalevi 19:28, nambere harukugamba ngu: “Mutalyesara engondo ha mubiri gwanyu.” Ruhanga akaha ekiragiro kinu hali ihanga lya Isaleri, obw’akaba nabahukaniza hali abantu abaasaraga emibiri yabo nibeteekaho obwokurorraho rundi amabara aga ba ruhanga baabo. (Ekyebiragiro 14:2) N’obukiraaba ngu ekiragiro kinu kikaheebwa Abaisaleri bonka, kikuru muno kwekebiija omusingi ogunyakukirumu.

Omukristaayo asemeriire kweteera tatu rundi ekisisani ky’ekintu ekindi?

 Enkarra zinu niziija kukukonyera kutekerezaaho ensonga enu:

•   “Abakazi becume bonka nebyokujwara ebisemiire . . . nobuculezi.” (1 Timoseo 2:9) Omusingi gunu nigukwataho abakazi n’abasaija. Tusemeriire kuteekamu ekitiinisa enyehurra ez’abantu abandi kandi tuleke kwetaho muno omutima.

•   Abantu abamu bagonza kwoleka ngu nubo barukwecweramu rundi ngu baine obugabe kukora kyona ekibarukugonza, kandi abandi beteera tatu kwoleka ngu nubo barukulema emibiri yabo. Baitu Baibuli etererra Abakristaayo eti: “Muheyo emibiri yanyu nkekyonzira ekyomiire, ekirukwera, ekisemeriire Ruhanga, nukwo kuhereza kwanyu okwamagezi.” (Abarumi 12:1) Kozesa ‘okwetegereza kwawe okw’amagezi’ kumanya ensonga habwaki n’ogonza kweteera tatu. Obw’oraaba n’ogonza kweteera tatu ngu habwokuba nikyo kiri ha mulembe rundi ngu n’ogonza kwoleka nk’oku oli omu h’abantu ab’ekitebe, ijuka ngu enyehurra yaawe egi n’esobora kutaikaraho nk’egi tatu okweraikaraho. Nahabweki kwekebiija kurungi enyehurra yaawe nikisobora kukukonyera kukora encwamu ey’amagezi.—Enfumo 4:7.

•   “Ebitekerezo ebyomwekambi bireta omweru: baitu omuntu wena ayanguhiriza, ayanguha okusega.” (Enfumo 21:5) Encwamu ey’okweteera tatu ekira kukorwa omuntu nayanguhiriza, baitu n’esobora kukwataho enkoragana ye n’abandi kandi nikisobora n’okumugumira kutunga omulimo. Ekindi, obusaalizi na sente ez’orukwetaaga kusobora kweyihaho tatu nibiija kuba bingi muno. Kuseruliiriza hamu n’abantu abakora omulimo ogw’okusiimuraho abantu tatu, nibyoleka ngu hanyuma y’okweteera tatu, abantu baingi muno beijukya encwamu yabo.