Ntirho wa hina amisaveni hinkwayu wu yendliwa hi ku tirhisa male leyi hina Timboni ta Yehovha hi yi humesaka hi ku swi rhandza. * Ka tindhawu leti hi tlhanganaka ka tona swaku hi gandzela Xikwembu ku ni makaxa lomu ku petiwaka kona minyikelo, tindlela tin’wani ta ku nyikela ta kumeka ka site la Minyikelo. Ka site lelo ku ni tindlela ta ku tala ta ku humesa minyikelo swaku ku seketeliwa a ntirho wa misava hinkwayu ni swaku yi tirhisiwa ka swilaveko swa bandla kumbe ka swilo leswi haswimbirhi.

 Timboni ta Yehovha a ti hlengisiwi swa wukhume kumbe dízimo, ku gindleliwa male leyi va fanele va tsema ka muholo wa vona swaku va yi nyikela. (2 Vakorinto 9:7) Ka mintlhanganu ya hina hinkwayu a ku hlengisiwi male kumbe ku hakelisiwa nchumu swaku u nghena, funtshi vatirheli va hina a va hakeliwi nchumu swaku va tsakamisa vanhu, loko va fambisa nkosi kumbe lomu ku nga fiwa, ka michadu kumbe va yendla mintirho yin’wani ya wukhongeli. A hi kumi male hi ku xavisa swakudla, ka majogu ya ku ganya male, ka mafexta ya ku lava male, ku famba hi kombela male kumbe tindlela tin’wani ta ku fana ni leto. Mavito ya lava va humesaka male a ma hlayiwe lomu ka vanhu. (Matewu 6:2-4) A masite ya hina ni mabuku ya hina a swi na swinavetiso kumbe mapublisidadi leswi hi kumaka male ka swona loko hi swi kombisa.

 Ka mintlhanganu ya mabandla hinkwawu ya Timboni ta Yehovha, ku nghena mani na mani, loku ku hela wheti ku nyikeliwa a relatoriyu la male leyi nga humesiwa ni swaku yi tirhisiwe ka yini. Leswi male yi tirhaka swona swa kambisisiwa nkama ni nkama leswaku male leyi yi nyikeliwaka yi tirhisiwa kahle. — 2 Vakorinto 8:20, 21.

•   Makaxa ya minyikelo: U nga humesa minyikelo ya wena hi ku peta male kumbe xeke ka makaxa lawa ma kumekaka ka Tiyindlo Ta Wugandzeli, ka Salão de Assembleias, kumbe ka ndhawu yin’wani leyi hi tlhanganaka ka yona swaku hi gandzela Xikwembu.

•   Ku nyikela hi ku tirhisa interneti: Ka matiko yamanyingi swa koteka ku tirhisa site leli: “Yendla Minyikelo ka Timboni ta Yehovha” leswaku u nyikela minyikelo hi ku tirhisa a cartão de crédito, cartão de débito, ku rhumela male hi ku tirhisa banku ni tindlela tin’wani ta eletroniku ta ku nyikela hi tona. * Timboni tin’wani ti tilangela ku ‘khweketa xan’wanchumu’ hi ku tirhisa tindlela leti nga lani henhla swaku wheti yin’wani ni yin’wani ku suka male ka tikonta ta tona banku ti nyikela hi yona. — 1 Vakorinto 16:2.

•   Minyikelo leyi nga kunguhatiwa: Tindlela tin’wani ta ku nyikela ti lava u yendla maplanu na u nge se ti tirhisa kumbe u kuma switsundzuxo leswi fambisanaka ni nawu wa tiko. Phela ku yendla leswo swi nga ku pfuna swaku u pumbeliwa ma impoxtu kumbe male yin’wani ka tiko la n’wina. Vanhu va vanyingi va pfuneka swinene hi ku va va tiva leswi va nga swi yendlisaka swona swaku va nyikela hi swilo loko munhu a ha hanya kumbe loko se a file. Hi kombela u vulavula ni filiyali la Timboni ta Yehovha la tiko la wena swaku u tiva swin’wani loko u lava ku nyikela hi ku tirhisa leswi landzelaka:

  •   konta ya banku;

  •   male ya maseguru kumbe male ya reforma (leyi munhu a yi kumaka loko a tshika ku tirha);

  •   tiyindlo;

  •   acções male leyi nga lombisiwa hi majuru;

  •   swilo leswi swi nga nyikeliwaka loko u file (testamento) ni male yin’wani.

 Leswaku u tiva swin’wani hi tindlela ta ku nyikela minyikelo ka tiko la n’wina nghena ka site leli “Yendla Minyikelo ka Timboni ta Yehovha.”