Xikwembu Xi Ka Tindhawu Hinkwatu Hi Nkama Wolowu Wa Wun’we?
Nhlamulu ya Bibele
Xikwembu xa swi kota ku vona minchumu hinkwayu ni ku yentxa leswi xi swi lavaka ka tindhawu hinkwatu. (Swivuriso 15:3; Vaheberu 4:13) Kambe Bibele a li djondzisi swaku Xikwembu xi le ka tindhawu hinkwatu hi nkama wun’we, li kombisa swaku xona i munhu naswona ku ni ndhawu leyi xi tshamaka ka yona.
Leswi Xikwembu xi nga tshamisa xiswona: Xikwembu i munhu wa ku kala a nga voneki. (Yohani 4:24; 1:18) Bibele li vula swaku lava nga vona Xikwembu va xi vonile na xi li ka ndhawu yin’we, lona a li vuli swaku Xikwembu xi tshama ka tindhawu ta tinyingi hi nkama wun’we. — Esaya 6:1, 2; Nhlawutelo 4:2, 3, 8.
Lomu Xikwembu xi tshamaka kona: Xikwembu xi tshama ka ndhawu ya ku hina vanhu a hi nge swi koti ku yi vona, ku hambana ni lomu hina vanhu hi tshamaka kona, Xikwembu xi tshama a ‘matilweni’. (1 Tihosi 8:30) Bibele li vulavula hi nkama tintsumi ‘ti nga nghena ti nyima phambeni ka Yehovha’ * leswo swi kombisa swaku Xikwembu xi ni ndhawu leyi xi tshamaka ka yona. — Yobo 1:6.
Leswi Xikwembu xi kalaka xi nga li ka tindhawu hinkwatu xi ta swi kota ku ni hlayisa?
Ina. Xikwembu xi ni mhaka ni mun’wana ni mun’wana wa hina, hambileswi xi tshamaka ka ndhawu ya ku kala hi nga swi koti ku yi vona xona xa va vona hinkwavu lava lavaka ku xi tsakisa. (1 Tihosi 8:39; 2 Tikronika 16:9) Vona swaku Xikwembu xi swi kombisa ku yini swaku xi ni mhaka ni lava va xi tirhelaka hi ku tshembeka:
Loko u khongela: Yehovha wa xi yingisa xikongelo xa wena nkama hinkwawu. — 2 Tikronika 18:31.
Loko u tshoveke mbilu: “Yehovha a kusuhi ni lava tshovekeke mbilu, wa va ponisa lava pfotlokeke mbilu.” — Tipisalema 34:18.
Loko u lava ku kombiwa Ndlela: Yehovha a li: “Nitaku nyika ku twisisa naswona ni ta ku djondzisa”. Yena a yentxa leswo hi ku tirhisa Rito la yena ku nga Bibele. — Tipisalema 32:8.
Leswi vanhu va swi vulaka hi kuva Xikwembu xi li ka tindhawu ta tinyingi hi nkama wun’we
Mavunhwa: Xikwembu xi kona ka minchumu hinkwayu leyi xi ga yi yentxa.
Ntiyiso: Xikwembu a xi tshami misaveni kumbe ka minchumu hinkwayu leyi xi nga yi yentxa. (1 Tihosi 8:27) I ntiyiso swaku tinyeleti ni minchumu yin’wana swi “vangamisa Xikwembu”. (Tipisalema 19:1) Kambe ku fana ni leswi munhu lweyi a pendaka makwadru a kalaka a nga tshami ka minchumu leyi a yi yentxaka na xona Xikwembu a xi tshami ka minchumu leyi xi nga yi yentxa. Munhu lweyi a yentxaka makwadru, leswi a swi pendaka swi nga hi byela swaku i munhu wa ku tshamisa ku yini, hi ku fanana a misava yi hi byela hi “wumunhu la xona [Xikwembu] la ku kala li nga voneki” la ku fana ni matimba, wutlharhi ni lirhandzu. — Varoma 1:20.
Mavunhwa: Xikwembu xi fanele xi va ka tindhawu hinkwatu hi nkama wun’we swaku xi ta kota ku vona hinkwaswu leswi yentxekaka ni ku kombisa matimba ya xona.
Ntiyiso: Moya wa ku kwetsima i matimba ya Xikwembu lawa ma tirhaka. Hi ku tirhisa moya wa ku kwetsima, Xikwembu xi nga vona hinkwaswu ka tindhawu hinkwatu na xi nga zanga xi famba ka ndhawu ya kona. — Tipisalema 139:7.
Mavunhwa: Buku la Tipisalema 139:8 li vula swaku Xikwembu xi kona ka tindhawu hinkwatu loko li ku: “Loko a no ya matilweni, a wu ta va u li kona; funtshi loko a no yetlela a Sirheni, a wu ta va u Ii kona.”
Ntiyiso: Ndzimana leyi a yi vulavuli hi lomu Xikwembu xi tshamaka kona kambe yi hi djondzisa swaku a ku na ndhawu ya kule lomu Xikwembu xi nga tsandzekaka ku hi pfuna loko hi li ka yona.
^ par. 3 Yehovha i vito la Xikwembu leli nga ka Bibele.
Ni Mhaka Leyi Yi Ta Ku Tsakisa
TINHLAMULU TA SWIVUTISO SWA BIBELE
Moya Wa Ku Kwetsima I Yini?
Swa twala leswi Bibele li fananisaka moya wa ku kwetsima ni “mavoko” ya Xikwembu.
HI TIVI
Kombela Ku Yendzeliwa Hi Timboni Ta Yehovha
Vona swivutiso leswi Bibele li swi hlamulaka, kumbe u djondza swilo swaswinyingi hi Timboni ta Yehovha.