“Lexi mi nga ta xi kombela ka Papayi hi vito la mina, a ta mi nyika xona.” — Yohani 16:23.

Leswi Yesu a nga swi vula swi hi komba swaku Yehovha a nga swi lavi swaku hi khongela ka yena hi ku tirhisa swifaniso, vakwetsimi, tintsumi, vafi ni swin’wana, kambe a lava hi khongela hi vito la Yesu Kreste. Loko hi khongela hi vito la Yesu, hi kombisa swaku hi swi nyika lisima leswi Yesu a nga hi yentxela swona. Yesu a te: “A ku na munhu lweyi a nga yaka ka Papayi loko ku nga li hi mina.” — Yohani 14:6.

“Mi xi byela leswi nga timbilwini ta n’wina.” — Tipisalema 62:8.

Loko hi khongela ka Yehovha, hi fanele hi vulavulisa xileswi a hi ta vulavulisa xiswona loko a hi vulavula ni papayi lweyi a hi rhandzaka. Ku hambana ni ku yentxa hi ku lerha ka buku kumbe ku phindaphinda marito wolawu ya man’we, hi fanele hi vulavula hi xihlonipho na swi suka mbilwini.

“Ha tshemba swaku Xikwembu xa hi twa loko hi kombela xin’wana ni xin’wana lexi fambisanaka ni ku rhandza ka xona.” — 1 Yohani 5:14.

Hi ku tirhisa Bibele, Yehovha a hi byela swaku a ta hi yentxela yini a tlhela a hi byela leswi a lavaka swaku hi mu yentxela swona. Leswaku Yehovha a twa swikhongelo swa hina hi fanele hi khongela hi ku ya hi leswi “fambisanaka ni ku rhandza” ka yena. A kuva hi kota ku yentxa leswo, ku laveka hi djondza Bibele leswaku hi ta kota ku mu tiva kahle. Loko hi yentxa leswo, a ta swi twa swikhongelo swa hina.

Kombela Leswi U Swi Lavaka. Hi nga ha kombela Xikwembu leswaku xi hi nyika swilo leswi hi swi lavaka siku ni siku. Swa ku fana ni swakudla, mpahla ni ndhawu ya ku tshama kona. Hi nga ha tlhela hi khongela hi kombela leswaku Xikwembu xi hi nyika wutlharhi leswaku hi kota ku yentxa swiboho swa kahle ni ku hi nyika ntamu wa ku tiyisela swikarhatu leswi hi kumanaka na swona. Hi nga ha tlhela hi kombela swaku xi hi nyika lipfumelo, xi hi rivalela swihoxo swa hina ni kuva xi hi pfuna hi swilo swin’wana. — Luka 11:3, 4, 13; Yakobo 1:5, 17.

Khongelela Van’wana. Vapsali lava nga ni lirhandzu va tsaka loko va vona swaku vana va vona va rhandzana. Yehovha na yena a lava swaku vana va yena hinkwavu la misaveni, va rhandzana. Hi mhaka leyo, hi nga khongelela lweyi hi nga chada na yena, vana va hina, maxaka ya hina ni vanghanu va hina. Bibele li hi byela swaku hi fanele hi “khongelelana.” — Yakobo 5:16.

Khensa. Xikwembu i Muvumbi wa hina naswona loko Bibele li vulavula hi xona li li: Xi “mi yentxela swa swinene, xi mi nisela timpfula ni ku mi nyika tinguva ta ku tshovela, xi mi phamela mi xurha ni ku tsakisa timbilu ta n’wina.” (Mintirho 14:17) Loko hi pimisa hi minchumu hinkwayu leyi Xikwembu xi nga hi yentxela yona, swi hi yentxa hi lava ku xi khensa hi xikhongelo. Xin’wana hi nga xi yentxaka a kuva hi kombisa swaku ha xi khensa i ku yingisa minawu ya xona. — Vakolosa 3:15.

Minkama yin’wana hi nga ha hela ntamu loko hi vona ingi swikhongelo swa hina a swi hlamuliwi, kambe leswo a swi vuli swona swaku Xikwembu a xi na mhaka na hina. Vona leswi nga humelela vanhu van’wana, leswi hi kombaka swaku minkama yin’wana swi nga ha lava swaku hi tama hi khongela.

Steve lweyi hi nga vulavula hi yena ka nhlokomhaka ya ku sungula, a li: “Loko a ni nga tamanga ni khongela, a swi ta ni karhatela ku vona swaku swilo a swi ta yampsa hi ku famba ka nkama.” I yini lexi nga mu pfuna? A sunguli ku djondza Bibele naswona li mu pfune ku vona swaku i swa lisima ku tama a khongela. A li: “Ni khongele ka Xikwembu, ni xi khensa hileswi xi nga ni pfuna hi ku tirhisa vanghanu va mina.” Steve a tlhele a ku: “A ni se tshama ni tsakisa xileswi ni nga tsakisa xiswona swoswi.”

Jenny, lweyi a a titwa na a nga faneliwi hi ku twiwa hi Xikwembu, ali: “Loko ni titwa na ni nga li wa nchumu a ni khongela ni kombela swaku Xikwembu xi ni pfuna ku twisisa swaku hi mhaka muni ni titwisa xileswo.” Leswo swi mu pfunise ku yini? Yena a li: “Hambiloko mbilu ya mina yi ni sola, ku vulavula ni Xikwembu swi ni pfune ku tivonisa xileswi Xikwembu xi ni vonisaka xiswona, xi ni vona na ni li wa lisima. Leswo swi tlhele swi ni pfuna swaku ni nga heli ntamu.” Se swi mu pfunise ku yini? Jenny a li: “Xikhongelo xi ni pfune ku vona swaku Yehovha a kona hikakunene, naswona i Xikwembu xa lirhandzu, i Papayi, Munghanu naswona loko ni tama ni lwela ku yentxa ku rhandza ka yena, a ta ni pfuna minkama hinkwayu.”

Vona leswi nga yentxekela Isabel. A nkama a nga kuma nyimba a vavisekile hikusa vadotori va mu byeli swaku a n’wana wa yena a a ta huma na a limalile. Van’wana va mu byeli swaku a xixa nyimba. Se yena a titwise ku yini hi leswo? A te: “Ni hele ntamu naswona hambi hi ku fa a ni swi navela.” A game a yentxa yini? A li: “Ni khongele kanyingi ni kombela swaku Xikwembu xi ni pfuna.” Hi ku famba ka nkama a phulukile naswona a n’wana wa kona a hume na a limalile. Se leswo swi vula swaku Xikwembu a xi swi hlamulanga swikhongelo swa yena? A swi vuli swona, hikusa Isabel a game a ku: “Loko ni vona n’wana wa mina lweyi swoswi a nga ni 14 wa malembe, na a tsakile hambileswi a nga limala, na swi twisisa swaku Yehovha a swi hlamulile swikhongelo swa mina, nawona Gerard n’wana wa mina i nkateko lowu taka hi ka Yehovha.”

Swikombiso leswi hinkwaswu swi hi yentxa hi pimisa hi marito ya mupisalema loko a ku: “Kambe utayingisa a xikombelo xa lavorhula, wena Yehovha. Utatiyisa mbilu ya vona ni kunyikela yingiso lowukulu ka vona.” (Tipisalema 10:17) Leswi swi hi nyika ntamu wa kuva hi tama hi khongela.

Ka Bibele ku ni swikhongelo swa swinyingi leswi Yesu a nga swi yentxa. Lexi tiviwaka ngopfu hi lexi a nga xi djondzisa vadjondzisiwa va yena. Hi nga djondza yini ka xona?