LOKO a wu yo pfuxela ilha la Sangir Besar aIndonésia ka malembenyana lawa ma nga hundza, a wu ta va u vone 3 wa vamakwerhu va hina va xisati ka praya leli li nga kona ka ndhawu liyani. Vamakwerhu lava va tiviwa kahle ka ilha leliyani hi ku rhandza ku chumayela ni ku pfuna vanhu swaku va li twisisa kahle Bibele. Kambe ka khambi leli, a va yendla ntirho wa ku hambana swinene ni ntirho wa ku chumayela.

Vamakwerhu lava a va nghena ndzeni ka lwandle va rholela maribye va huma na wona praya. A maribye wolawo a ma li makulu lakaku ma fana ni bola. Hi wugamu, a va gama va ma teka va ma khemelela hi ku tirhisa hamela leswaku ma va matsongo hintamu. A va teka maribye wolawo va gama va ma peta ka emplama kumbe bakidi va muka na wona, se va gama va ma peta ka masaka yamakulu leswaku va xavisela vanhu lava a va gama va ma peta ka camião swaku va ya ma tirhisa loko va hamba xitaratu.

Mun’wani wa vamakwerhu va xisati lava a va yendla ntirho wolowo a ku li Hulda. Swiyimu swa Hulda a swi mu pfumelela ku heta nkama wa wunyingi na a li ka ntirho lowu. Loko a wo swi lava a a ta tirhisa male hinkwayu leyi a a yi kuma hi ku yendla ntirho lowu swaku a xava swilo leswi a swi laveka kaya. Kambe swoswi se a a lava ku hlengeleta male swaku a yendla nchumu xin’wani. A a lava thableti leli a li ta mu pfuna kuva a nghena ka JW Library^®. Hulda a a swi tiva swaku mavhidiyo ni swilo swin’wani leswi nga ka JW Library a swi ta mu pfuna ka ntirho wa yena wa ku chumayela swi tlhela swi mu pfuna swaku a swi twisisa kahle leswi a a swi djondza ka Bibele.

Hulda a hete wheti ni hafu na a heta mawora mambirhi na a tirha ka ntirho lowu wa ku khemelela maribye siku ni siku, leswaku a kota ku tata camião hi wona. Se hi ku yendla ntirho lowu, a swi kotile ku kuma male ya ku yenela swaku a xava thableti.

Hulda a li: “Hambileswi a ni karhalile hintamu ni tlhela ni twa swifuta hileswi a ni khemelela maribye, nkama ni nga sungula ku tirhisa thableti la mina la nyuwani ni khohlwe ku vava hinkwaku loku a ni ku twa, hikusa a thableti leli a li ni pfuna ka ntirho wa ku chumayela li tlhela li ni pfuna swaku ni lunghiselela mintlhanganu hi ndlela ya ku vevuka.” Hulda a tlhela a vula swaku a thableti la yena li mu pfunile nkama ku nga sungula korona swaku a khoma mintlhanganu ni bandla hikusa mintlhanganu se a yi khomiwa hi ku tirhisa interneti, naswona na wona ntirho wa ku chumayela a wu yendliwa hi telefoni. Ha tsaka swinene na Hulda hileswi a nga swi kota ku fikelela leswi a a swi lava.