• “A ni titwa ingi hi loko nuna wa mina a yo tshamela ku famba masangu ni nsati mun’wani.”

• “A ni titwa hansi, ni tivona ingi no kala ni nga xonganga ka yena ni tlhela ni nga pfuni nchumu.”

• “A ni nga vulavuli ni munhu hi mhaka leyi, a swi ni dla hi ndzeni ka mbilu.”

• “A ni titwa ingi hi loko Yehovha o kala a nga na mhaka na mina.”

Marito lawa ma kombisa ndlela leyi wansati a titwaka hi yona loko nuna wa yena a sixtira pornografiya. Funtshi loko swi ku a yendla leswo ku ringana tiwheti kumbe malembe ya manyingi a xihundleni, swi nga mu karhatela nsati wa yena ku tlhela a mu tshemba. Wansati mun’wani a te: “Indjhe hi yena nuna wa mina lweyi? Leswi a zaka a yendla leswi, indjhe a swi kona swin’wani a ni fihlelaka swona?”

Nhlokomhaka leyi yi lulamiseliwe ku pfuna wansati lweyi nuna wa yena a tshamelaka ku sixtira pornografiya. a Yi ta komba tindzimana ta Bibele leti nga ta mu tiyisa. Yi ta tlhela yi mu tiyisekisa swaku Yehovha wa mu rhandza yi tlhela yi mu pfuna ku vona leswi a nga swi yendlaka swaku a rhula mbilwini ni ku tama a va kusuhi swinene na Yehovha. b

Hambileswi u nga kalaka u nga swi koti ku landzelela nuna wa wena swaku u tiva hinkwaswu leswi a swi yendlaka, swi kona leswi u nga swi yendlaka swaku u pumba ku vaviseka ka wena u tlhela u rhula mbilu. Pimisa hi tipontu leti landzelaka:

U nga titwi nandzu. Wansati a nga ha titwa nandzu hileswi nuna wa yena a sixtiraka pornografiya. Alice c a a pimisa swaku a a nga li wansati wamunene ka nuna wa yena. A a tivutisa leswi: ‘Hi mhaka muni nuna wa mina a tsakisiwa hi ku txuvukisela vavasati van’wani ku nga li mina?’ Vavasati vanʼwani va titwa nandzu hi leswi va titwisaka xiswona, hikusa va pimisa swaku hi vona va yendlaka swaku xiyimu xi ya xi biha. Daniela a li: “A ni titwa nandzu ni tlhela ni vaviseka hikusa a ni pimisa swaku hi mina ni hahlulaka wukati la hina hi ku tshamela ku titwisa xileswi.”

Loko na wena u titwisa xileswo, tiyiseka swaku Yehovha a nga ku nyiki nandzu hi leswi nuna wa wena a swi yendlaka. Yakobo 1:14 yi li: “Mun’wana ni mun’wana a ringiwa a tlhela a wongiwa hi leswi a swi navelaka.” (Rom. 14:12; Filp. 2:12) Ku hambana ni ku ku nyika nandzu, Yehovha a ku nyika lisima hileswi u tshembekaka ka yena. — 2 Tikro. 16:9.

 Xin’wani xi nga ku pfunaka i ku twisisa swaku kuva nuna wa wena a rhandza ku sixtira pornografiya a swi lavi ku vula leswaku wena a wu munene ka yena. Lava djondzaka timhaka ta ku yelana ni pornografiya va vula leswaku munhu lweyi a rhandzaka ku sixtira pornografiya, a gama a tshamela ku navela ku yendla swilo swa masangu swaku a ku na wansati lweyi a nga kotaka ku swi yendla hi ku ya hi leswi a swi pimisaka.

U nga karhateki ku tlula mpimu. Catherine a a nga pimisi hi nchumu xin’wani, a a tshamela ku pimisa hi swaku nuna wa yena a a tshamela ku sixtira pornografiya, se leswo a swi mu heta matimba hintamu. Frances a te: “A ni karhateka swinene loko ni nga swi tivi swaku nuna wa mina a kwini.” Phela vavasati van’wani va vula swaku va dana loko va li ni vamakwerhu lava va swi tivaka swaku vanuna va vona va sixtira pornografiya, naswona vanhu van’wanyani va vula swaku va titwa va li voxe hileswi va pimisaka swaku van’wanyani a va xi twisisi xiyimu xa vona.

A swi bihanga ku titwisa xileswo, kambe ku tshamela ku pimisa hi swilo swoleswo swi to ku yendla u karhateka ntsena. Se tshamela ku pimisa hi wunghanu la wena na Yehovha. Loko u yendla leswo, swi ta ku vevukela ku tiyisela. — Pis. 62:2; Efe. 6:10.

Xin’wani xi nga ku pfunaka i ku va u lerha Bibele u tlhela u pimisa hi vavasati va nga kumana ni swikarhatu lava loko va khongelile ka Yehovha va mu kombela swaku a va pfuna va nga tiyisiwa hintamu swinene. I ntiyiso swaku a hi minkama hinkwayu leyi Yehovha a nga susa xikarhatu lexi a va kumana na xona, kambe a va pfunile swaku va rhula. Hi xikombiso, mbilu ya Ana “a yi vava ngopfu” hi mhaka xiyimu lexi a a li ka xona. Kambe loko se a ‘khongele nkama wa ku leha phambheni ka Yehovha’ a game a rhula mbilwini hambileswi xiyimu xa yena xi kalaka xi nga txintxanga. — 1 Sam. 1:10, 12, 18; 2 Kor. 1:3, 4.

Kombela ku pfuniwa hi madoda ya bandla. Madoda ma nga fana ni “ndhawu ya ku tumbela moya . . . ni ndhawu ya ku tumbela xidzedze.” (Esa. 32:2) Funtshi madoda ma nga ha ku komba makwerhu wa xisati lweyi a nga ku tiyisaka a tlhela a ku yingisela kahle nkama lowu u mu byelaka leswi u titwisaka xiswona. — Swi. 17:17.

U nga ha swi kota ku pfuna nuna wa wena swaku a tshika ku sixtira pornografiya. Bibele li vula swaku loko ku ni xikarhatu kumbe nala wamukulu hintamu swinene “vambirhi va yampsa ku tlula mun’we.” (Ekl. 4:9-12) Naswona lava va ku djondza swilo va vula swaku loko nuna na nsati va tirhisana, nuna a nga swi kota ku tshika ku sixtira pornografiya naswona hi ku famba ka nkama nsati a nga ha tlhela a sungula ku mu tshemba nuna wa yena.

I ntiyiso swaku u nga swi kota ku pfuna nuna wa wena ku tshika ku sixtira pornografiya loko yena a tinyimiselile a tlhela a swi lava. Ku nga va swaku se a kombele ku pfuniwa hi Yehovha ni madoda? (2 Kor. 4:7;  Yak. 5:14, 15) Ku nga va swaku ku ni leswi a nga swi yendla leswi nga ta mu pfuna ku hlula moda lowu, swa ku fana ni ku pimisa hi leswi a nga ta li tirhisisa xiswona telefoni la yena kumbe thableti la yena ni ku fambela kule ni swiyimu leswi nga mu yendlaka a navela ku sixtira pornografiya? (Swi. 27:12) Ku nga va swaku a ku byela ntiyiso a tlhela a pfumela ku pfuniwa hi wena? Loko tinhlamulu ta swivutiso leswi ku li ‘ina’ u nga swi kota ku mu pfuna.

Se u nga swi yendlisa ku yini? Vona xikombiso xa Felicia. Yena a chade na Ethan, lweyi nkama na a ha li jovhem a a tshamela ku sixtira pornografiya. Felicia a bula kahle ni nuna wa yena Ethan, funtshi na yena nuna wa yena a titwa a chunsekile ku nkama wun’wani ni wun’wani lowu a twaka swaku a navela ku sixtira pornografiya a tekela ku mu byela. Ethan a hlaya leswi: “Ni bula ni nsati wa mina na ni chunsekile funtshi yena wa ni pfuna ku fambela kule ni minchumu leyi nga ni yendlaka ni wela ka ntlhamu lowu. Naswona nkama ni nkama a tshamela ku ni vutisa swaku swo yini, swa pasa ke. A tlhela a ni pfuna ku pimela matirhiselo ya mina ya interneti.” Se vhela, swa twisiseka swaku na yena Felicia a hi swaku swo mu tsakisa ku tiva swaku nuna wa yena a navela ku sixtira pornografiya. Kambe yena a vula leswi: “Ni tsumbule swaku loko ni tshama ni kwatile ni xukuvalile a ni mu pfuni nuna wa mina swaku a fambela kule ni moda lowu wa ku sixtira pornografiya. Se loko ni mu pfuna kuva a lwisana ni xikarhatu lexi, na yena a gama a ni pfuna leswaku ni pumba ku vava loku ni ku twaka.

Mabulu lawa ma ta pfuna wanuna swaku a hlula moda wa yena wa ku tshamela ku sixtira pornografiya ma tlhela ma pfuna nsati wa yena leswaku a tlhela a mu tshemba. Ku tlula hinkwaswu, loko wanuna a tshamela ku bula na a chunsekile ni nsati wa yena hi swilo swa ku biha leswi a navelaka ku swi yendla, lomu a yaka kona ni leswi a swi yendlaka, swi ta mu vevukela nsati wa yena ku va a mu tshemba hikusa a ta va a nga mu fihleli nchumu.

U vona swaku na wena u nga swi yendla swa ku fana ni leswi leswaku u pfuna nuna wa wena? Loko ku li swaku u nga swi yendla, u swi vonisa ku yini ku va wena ni nuna wa wena mi bula hi nhlokomhaka leyi na mi li xikan’we? Yi ta mu pfuna swaku a tshika ku sixtira pornografiya naswona yi ta ku pfuna wena leswaku u tlhela u sungula ku mu tshemba. Nkama lowu u mu byelaka leswi wena u titwisaka xiswona, yena a nga fanelanga a ku vekela xiviti kumbe a kwata hi leswo. Kambe a fanele a zama ku twisisa leswi wena u titwisaka xiswona. Phela lexi wena u xi lavaka i ku va u mu pfuna ku va a tshika moda lowu wa ku sixtira pornografiya ni ku va u tlhela u mu tshemba. Se hi wumbirhi ka n’wina mi fanele mi bula mi tlhela mi djondza swaku kasi i ntxini lexi yendlaka munhu a swi navela hintamu ku sixtira pornografiya ni ku vona swaku i mpsini leswi nga yendliwaka leswaku munhu a wu tshika moda lowu. d

 Loko u chava swaku loko u bula hi mhaka leyi ni nuna wa wena a nga tshuka a kwata, swi ngo yini u kombela doda leli hi wumbirhi mi li tshembaka swaku li va na n’wina nkama lowu mi bulaka? Khumbuka swaku hambiloko nuna wa wena a wu hlulile moda lowu wa ku sixtira pornografiya swi nga ha teka nkama wa ku leha swaku u tlhela u mu tshemba, kambe u nga godoli. Zama ku vona swilo swaswitsongo leswi se swi nga yampsa ka muchadu wa wena. Tiyiseka swaku loko mu lehisa mbilu, hi ku famba ka nkama muchadu wa n’wina wu ta tlhela wu tiya. — Ekl. 7:8; 1 Kor. 13:4.

Loko swi ku nuna wa wena a tlhele a wa a ku tundzu, a sixtira pornografiya kuve se ku hundze malembe ni malembe na a nga ha sixtiri swi la ku hlaya swaku yena i mudjohi wa ku kala a nga tisoli kumbe a nga ta tshuka a swi kotile ku tshika ku sixtira pornografiya? Ihim, a swi lavi ku hlaya leswo. Phela munhu loko swi mu nghenile nyameni swa ku sixtira pornografiya i nyimpi ya ku yi nga tshuka yi teka wutomi la yena hinkwalu swaku a swi tshika. Minkama yin’wani, hambiloko se ku hundze malembe na a nga ha sixtiri, a nga tshuka a wa a ku tundzu a swi sixtira. Se leswaku leswo swi nga yendleki swi lava swaku a tivhikela hintamu swinene, a yendla hinkwaswu leswi a nga swi kotaka swaku a tshama na a tivhikelile hambiloko se ku hundze malembe na a nga wanga ka ntlhamu wolowo. (Swi. 28:14; Mat. 5:29; 1 Kor. 10:12) Swi lava leswaku ‘a txintxa mapimiselo ya yena ma va ya nyuwani’ a tlhela “a nyenya swa ku biha” swa ku fana ni pornografiya ni swilo swa chaka swinene swa ku fana ni masturbação kumbe ku tlangatlangisa swirho swa yena munhu leswaku a titsakisa ntsena hi tlhelo la masangu. (Efe. 4:23; Pis. 97:10; Rom. 12:9) Indjhe nuna wa wena a tinyimiselile ku yendla hinkwaswu leswi? Loko swi ku a tinyimiselile, a ta swi kota wu hlula ndzingo lowu wa ku sixtira pornografiya. e

Se u ta ku yini loko nuna wa wena a nga swi lavi ku tshika moda wa yena wa ku sixtira pornografiya? Swi nga yendleka u tshamela ku hela ntamu, u kwata u tlhela u titwa na u tshikiwile. Kambe lexi nga ta ku pfuna swaku u rhula mbilu, i ku swi tshikela Yehovha. (1 Ped. 5:7) Tama u tshinela kusuhi na Yehovha hi ku djondza, ku khongela ni ku pimisa hi leswi u swi djondzaka. Loko u yendla leswo, u nga tiyiseka swaku Yehovha na yena a ta tshinela ka wena. Hilani swi nga kombisiwa hi kona ka Esaya 57:15, Yehovha a kusuhi ni “lava tikiseliwaka ni lava tivekaka hansi” naswona a lava ku va pfuna leswaku va tlhela va tsaka. Yendla hinkwaswu swaku u tama u va Mukreste wa ku wupfa. Kombela ku pfuniwa hi madoda naswona tiyiseka swaku siku lin’wani nuna wa wena a nga ha txintxa. — Rom. 2:4; 2 Ped. 3:9.