Van’wana swi va tekela nkarhi ku dyondza eka swihoxo swa vona. Na mina a swi nga ndzi oloveli. Ndzi velekiwe eBarcelona, ku nga doroba ra vumbirhi lerikulu eSpain. Ndyangu wa ka hina a wu tshama eSomorrostro, ku nga ndhawu leyi tekeke xiphemu lexikulu eribuweni ra Barcelona. Somorrostro a yi dume hi vugevenga ni ku tirhisa swidzidziharisi.

 Vatswari va mina a va ri ni vana va kaye naswona hi mina mativula. Tanihi leswi mhisi a yi tshama yi tlakule tshuri ekaya, papa u ndzi byele leswaku ndzi ya tirha ku rhwalela tibolo etennis club. Loko ndzi ri ni malembe ya khume a ndzi tirha tiawara ta khume hi siku. Hikwalaho, a ndzi swi kotanga ku ya exikolweni ku fana ni vana van’wana. Loko ndzi ri na malembe ya 14, ndzi sungule ku tirha tanihi hi makhanikhi exitolo xa tinsimbi.

 Hi 1975, Ndzi vitaniwe evusocheni naswona sweswo a swi tolovelekile eSpain. A ndzi lava ku endla swo antswa evuton’wini bya mina, kutani ndzi joyine Vuthu Rimbe ra masocha eAfrika N’walungu. Hi nkarhi wolowo ndzi sungule ku va ni mahanyelo yo biha hi ku tihoxa eka swidzidziharisi ni ku kukutlela byala.

 Ndzi tshike vusocha ndzi tlhelela eBarcelona, kutani ndzi fika ndzi vumba ntlawa wa tinsulavoya. A hi nga yivi a ho chela ndlala. A hi xavisa leswi hi swi yiveke leswaku hi kota ku xava swidzidziharisi. Ndzi sungule ku dzaha LSD na amphetamines, a ndzi gembula ni ku kukutlela byala naswona a ndzi nga lavi ku vona xiketi xi hundza. Sweswo swi endle leswaku ndzi ya ndzi va ni madzolonga. A ndzi jikajika ni mukwana, xihloka hambi ku ri banga naswona loko swi bihile a ndzi swi tirhisa.

 Siku rin’wana hi yive movha kutani maphorisa ma hi hlongorisa. Yoleyo a ku ri filimi. Hi chayele kwalomu ka 30 wa tikhilomitara, ku kondza maphorisa makala ma sungula duvula. Loyi a ri eku chayeleni u tlumbile, hi lo namba hi ku ri ntlha hi hlanula swirhendze. Loko mhaka leyi fika etindleveni ta papa, u ndzi hlongorile ekaya.

 Ku ringana malembe ya ntlhanu ndzi sungule ku tshama eswitarateni. A ndzi tlela eminyangweni, etilorini, eswitulwini swa le phakini ni le masirheni. Mikarhi yin’wana a ndzi tshama emabakweni. Vutomi bya mina a byi nga ha ri na xikongomelo, ndzi ti byele leswaku hambiloko ndzo fa a swi na mhaka. Ndzi tsundzuka loko ndzi ti tsema mavoko hikwalaho ka leswi tidrugs a ti ndzi dlonyorile. Swivati swa kona a swi si suka na sweswi.

 Loko ndzi ri ni malembe ya 28, manana u ndzi lavile naswona u ndzi byele leswaku ndzi tlhelela ekaya. Ndzi pfumerile ni ku n’wi tshembisa leswaku ndzi ta lunghisa vutomi bya mina, kambe swi ndzi tekele nkarhi ku endla sweswo.

 Siku rin’wana ni ndzhenga ku te Timbhoni ta Yehovha timbirhi ekaya. Loko ndzi ri karhi ndzi va yingiserile, tatana u huwelerile a ku ndzi pfala rivanti. Tanihi leswi a ndzi nga lavi ku byeriwa, ndzi n’wi bise hi moya. Va ndzi nyike swibukwana swinharhu, ndzi swi amukele hi mbilu yo basa. Ndzi va vutise leswaku kereke ya vona yi le kwihi, endzhaku ka masiku ma nga ri mangani ndzi te humelele eHolweni ya Mfumo.

 Nchumu wo sungula lowu ndzi wu xiyeke hileswaku hinkwavo ka vona a va ambale hi ndlela leyi xiximekaka. Mina a ndzi ri ni misisi yo leha, malebvu yo tala naswona a ndzi ambale timpahla leti nga ha ri ki exiyin’weni lexinene. A swi lo dlaa, leswaku a ndzi nga weli kona kutani ndzi tshame ehandle ka holo. Kambe loko ndzi ku hahlu ndzi hlamarisiwe hi Juan loyi a ri un’wana wa tinsulavoya a tidye hi sudu. Ndzi kume leswaku u ve Mbhoni ya Yehovha lembe leri hundzeke. Ku va ndzi n’wi vonile swi ndzi nyike nkhinkhi wo nghena ndzi yingisela minhlangano. Swilo swi sungule kwalaho ku cinca.

 Ndzi amukele dyondzo ya Bibele naswona ndzi swi xiyile leswaku loko ndzi lava ku amukeriwa hi Xikwembu ndzi fanele ndzi tshika mahanyelo yo biha. A swi nga olovi ku endla ku cinca. Ndzi dyondze leswaku loko ndzi lava ku tsakisa Yehovha Xikwembu ndzi fanele ndzi “hundzuka hi ku hundzula mianakanyo ya [mina].” (Varhoma 12:2) Ndzi khumbiwe hi tintswalo ta Xikwembu. Ku nga khathariseki swihoxo leswi ndzi swi endleke ndzi xiye leswaku u ndzi nyika nkarhi wo lunghisa vutomi bya mina. Leswi ndzi swi dyondzeke hi Yehovha Xikwembu swi dzike embilwini ya mina. Se a swi lo ndlangandla leswaku ku ni Muvumbi loyi a khathalaka hi mina.​—1 Petro 5:6, 7.

 Leswi swi endle leswaku ndzi endla ku cinca. Hi xikombiso, loko ndzi navela fole hi nkarhi wa ku hlaya ka mina ka Bibele, Ndzi ti byele leswaku, ‘Loko Yehovha a lava ndzi tshama ndzi basile, mafole lama ndzi fanele ndzi macukumeta!’ (2 Vakorinto 7:1) Kutani ndzi ma lahle ebinini!

 A ndzi fanele ndzi tshika ku xavisa ni ku dzaha tidrugs. Sweswo swi ndzi tekele nkarhinyana naswona a swi lava matshalatshala. Leswaku ndzi kota ku fikelela sweswo a ndzi fanele ndzi tshika ku tihlanganisa ni vanghana va mina va khale. A va endla leswaku ndzi nga endli nhluvuko hi tlhelo ra moya. Hi ku famba ka nkarhi ndzi sungule ku titshega hi Xikwembu ni hi vanghana lava a ndzi ri na vona evandlheni. A ndzi nga si tshama ndzi kombiwa rirhandzu ni nkhathalelo lowu va ndzi kombeke wona. Hi ku famba ka nkarhi ndzi kote ku tshika tidrugs ndzi “ambala vumunhu lebyintshwa,” lebyi a byi ta endla leswaku Xikwembu xi ndzi amukela. (Vaefesa 4:24) Hi August 1985, ndzi khuvuriwile tanihi un’wana wa Timbhoni ta Yehovha.

 Bibele yi antswise vutomi bya mina. Yi ndzi ntshunxe eka mahanyelo yo biha lawa a ma onha miri wa mina ni ndlela leyi a ndzi tiveka ha yona. Vanghana va mina va khale lava tlulaka 30 va file hi AIDS kumbe mavabyi man’wana lama vangiwaka hi tidrugs. Ndza tsaka hi leswi ndzi tirhiseke misinya ya Milawu ya Bibele, leswaku ndzi papalata makhombo lawa.

 Mikwana ni swihloka leswi a ndzi swi khoma loko ndza ha ri nsulavoya se ndzi swi tshikile. A ndzi nga tshembi leswaku siku rin’wana ndzi ta famba ndzi khome Bibele leswaku ndzi pfuna vanhu. Sweswi mina ni nsati wa mina hi vachumayeri va nkarhi hinkwawo tanihi Timbhoni ta Yehovha.

 Vatswari va mina a va kalanga va amukela ntiyiso kambe va tsaka hi leswi ndzi dyondzeke Bibele. Hambiswiritano papa u kota ku yimelela Timbhoni eka vatirhikulobye. Swi ve erivaleni leswaku ripfumelo hi rona leri endleke leswaku ndzi kota ku endla ku cinca lokukulu. Hakanyingi manana u tala ku vula leswaku a ndzi fanele ndzi hatle ndzi sungula ku dyondza Bibele. Ndzi pfumelelana na yena emhakeni leyi!

 Ntokoto wa mina wu ndzi pfune ku vona leswaku ku lava ntsako eka tidrugs ni swilo swin’wana swi fana ni ku hlongorisa mheho. Swa ndzi tsakisa ku pfuna van’wana va dyondza ntiyiso lowu humaka eRitweni ra Xikwembu, ku nga tidyondzo leti ndzi pfuneke.